Ścianu źnieśli, ale karcinu častkova zachavali. Stała viadoma, što stała z rośpisam, jaki vyjavili pry rekanstrukcyi kinateatra «Pieramoha»
Padčas rekanstrukcyi minskaha kinateatra «Pieramoha» budaŭniki demantavali pieraharodku, a pad hipsakardonam vyjaviłasia znachodka-rośpis. Tady atrymałasia vyśvietlić jaje aŭtaraŭ, a na abjekt paklikali kamisiju: vyznačać, što dalej rabić z vyjaŭlenymi vieršnikami. Onlíner daviedaŭsia, čym urešcie skončyłasia sprava.
Sam kinateatr «Pieramoha» — pomnik architektury XX stahodździa, ciapier budynak zakryty na rekanstrukcyju.
Rośpisy budaŭniki vyjavili padčas demantažu adnoj ź pieraharodak. Nieŭzabavie znajšlisia i jaje aŭtary. Adzin ź ich — mastak Andrej Zadoryn, jaki ciapier žyvie ŭ Francyi.
Zadoryn tady ŭzhadaŭ u Fejsbuku, što zamovu na hetuju vyjavu ŭ 1990 hodzie atrymali čatyry mastaki — jon, Vasil Baranaŭ, Viačasłaŭ Lamačka i Raman Zasłonaŭ. Apošni ŭ rośpisie nie ŭdzielničaŭ, ale jaho imia ŭsio adno ŭviekaviečyli (proźviščy vybityja pad rośpisam). Pa infarmacyi Zadoryna, fresku ŭ svoj čas prybrali «pa patrabavańni vieteranaŭ».
Što z toj ścianoj ciapier? «Ścianu z rośpisam demantavali», — paviedamiŭ Siarhiej Abramaŭ, hałoŭny inžynier pradapryjemstva «Minskaja spadčyna», jakoje arhanizuje rekanstrukcyju kinateatra. A kab dać acenku vyjavie, pradpryjemstva pryciahnuła śpiecyjalistaŭ dziaržaŭnaj navukovaj ustanovy «Centr daśledavańniaŭ biełaruskaj kultury, movy i litaratury NAN Biełarusi».
«Jany praviali daśledčuju pracu i dali zaklučeńnie, što hetaja praca nie ŭjaŭlaje histaryčnaj kaštoŭnaści i moža być demantavanaja. Ale niešta ŭdałosia zachavać — pa-mojmu, frahmienty pavieźli ŭ kaścioł Panny Maryi».
Jak vyśvietliŭ Onlíner, častki rośpisu sapraŭdy časova znachodziacca ŭ padvale kaścioła na płoščy Svabody. Vyłučanyja častki rośpisu, jakija zachavajuć.
Navukovy supracoŭnik Instytuta mastactvaznaŭstva NAN Biełarusi Kaciaryna Šaŭruk udakładniła abstaviny demantažu. Pa jaje słovach, skazać, što praca «nie ŭjaŭlaje kaštoŭnaści», nielha:
«U pracy znajšli mastacki i kalekcyjny intares. Sprava ŭ tym, što ŭ nas zastalisia adzinkavyja prykłady manumientalnaha žyvapisu z hetaha pieryjadu. Tamu vynieśli rašeńnie rekamiendacyjnaha charaktaru: zachavać chacia b frahmienty dla dalejšaha ekspanavańnia tam ža».
Usiaho navukoŭcy adabrali šeść frahmientaŭ: asoby końnikaŭ, niekalki frahmientaŭ sa zbrui koniej, zbroi. Całkam ža źbierahčy žyvapis u pieršapačatkovym vyhladzie było nibyta niemahčyma. Pa-pieršaje, ściana išła pad znos pa prajekcie, a pa-druhoje, praca była mocna paškodžanaja.
Ciapier kavałki tynkoŭki z rośpisam znachodziacca ŭ kaściole, pakul vyrašajecca ich los.
Čytajcie taksama:
Padčas rekanstrukcyi kinateatra «Pieramoha» niespadziavana znajšli karcinu
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali23
Kamientary