«Paśla ŭviadzieńnia sankcyj asnoŭny zbyt išoŭ praz Ukrainu». Što ciapier adbyvajecca z naftapierapracoŭkaj
Sakret biełaruskaha «ekanamičnaha cudu» prosty: heta atrymańnie rasijskich enierharesursaŭ pa subsidavanych cenach, pierapracoŭka ich i prodaž vyrablenych ź ich naftapraduktaŭ i chimii ŭ Jeŭropu i Ukrainu. Vajna źmianiła raskład. «Naša Niva» daviedałasia, jak u ciapierašnich umovach iduć spravy na biełaruskich naftapierapracoŭčych zavodach.
Reziervuary zapoŭnienyja
Praz adsutnaść rynkaŭ zbytu Mazyrski naftapierapracoŭčy zavod i «Naftan» apynulisia ŭ składanym stanoviščy.
«Praź lišak hatovaj pradukcyi ŭ Mazyry spynili častku ŭstanovak. Uvieś tavarny park (reziervuary) zapoŭnienyja, hatovuju pradukcyju raźlivajuć u cysterny na kołach. Dźvie tysiačy cysternaŭ užo stajać poŭnymi, vahony pad śvietłyja naftapradukty zakančvajucca», — kaža Alaksandr Sakałoŭ, pradstaŭnik «Rabočaha ruchu».
Pavodle jaho słoŭ, paśla ŭviadzieńnia sankcyj u dačynieńni da biełaruskich NPZ Ukraina stała asnoŭnym napramkam, kudy išła naša pradukcyja. Na hetuju krainu prychodziłasia kala 80 % ekspartu. Niejkaja častka pakryvała patreby samoj Ukrainy, astatniaje išło dalej u Jeŭropu.
«Treba razumieć, što, choć «Naftan» i byŭ pad sankcyjami, z dapamohaj roznych schiem i sadziejničańnia ŭkrainskaha boku jon usio roŭna pastaŭlaŭ svaju pradukcyju ŭ Jeŭropu. Ciapier hety šlach začynieny, u tym liku fizična, bo niama čyhunačnaha złučeńnia pamiž Biełaruśsiu i Ukrainaj», — adznačaje surazmoŭca.
Ukraincy pierakryli čyhunki, kab pa ich nie mahli pierakidać padmacavańni i paliva dla rasijskich intervientaŭ.
Letaś pastaŭki biełaruskaha bienzinu va Ukrainu vyraśli na 17%, paviedamlali ŚMI sa spasyłkaj na kansałtynhavuju hrupu «A-95». 78% u imparcie bienzinu va Ukrainu prychodziłasia na biełaruskuju dolu.
Niapoŭnuju zahruzku zavodaŭ u siońniašnich umovach pryznavali i ŭłady. Tak, kali Mazyrski NPZ u 2020-m pierapracoŭvaŭ 24—25 tysiač ton syraviny ŭ dzień, to ciapier tempy źnizilisia da 13,7 tysiač. Premjer-ministr Raman Hałoŭčanka na naradzie Rady biaśpieki ŭ krasaviku kazaŭ, što va ŭmovach sankcyj zavody pracujuć na zabieśpiačeńnie ŭnutranaha rynku.
13,7 tysiač za dzień dla ŭnutranaha, adnak, zašmat. Častku pradukcyi, miarkujučy pa ŭsim, taki ŭdajecca ekspartavać u abychod sankcyj.
«Zarobki supracoŭnikaŭ upali pryblizna na tracinu»
Ciažkaści z prodažam pradukcyi pryviali da źnižeńnia zarobkaŭ rabočych. Pa słovach Sakałova, supracoŭniki Mazyrskaha NPZ atrymlivajuć tolki akład i premiju, vypłaty inšych vidaŭ nadbavak prypynienyja. Na «Naftanie», pa infarmacyi surazmoŭcy, situacyja jašče horšaja.
«Akramia taho, što tam prypynienyja materyjalnyja vypłaty pa kalektyŭnych damovach i źnikli vypłaty dapamohi da adpačynku, zrezanyja i sami premii. Takim čynam, realnyja zarobki supracoŭnikaŭ upali pryblizna na tracinu», — paviedamiŭ Alaksandr Sakałoŭ.
Ab składanaj situacyi ŭ biełaruskaj naftapierapracoŭčaj haliny «Našaj Nivie» raspaviali i ŭ ekanamičnaj słužbie NAU.
Pa ich słovach, biełaruski ekanamičny cud u vialikaj stupieni byŭ zasnavany na pieraprodažy rasijskich enierharesursaŭ u Jeŭropu i Ukrainu. Sučasnyja ŭmovy faktyčna pazbavili Biełaruś hetaj krynicy dachodu.
«Pa hetaj pryčynie salda handlu tavarami z RF zaŭsiody było admoŭnym, a z Ukrainaj stanoŭčym. Z uvodam sankcyj biełaruski ekspart staŭ usio macniej pieraaryjentoŭvacca na Ukrainu ci tranzit praz Ukrainu», — adznačyli ŭ NAU.
Usio źmianiła vajna
Pa infarmacyi NAU, da pačatku vajny navat siektaralnyja sankcyi ŭ dačynieńni da Biełarusi zastavalisia małaefiektyŭnymi, bo była mahčymaść abychodzić ich praz Ukrainu.
«Vielizarnaja častka pradukcyi padsankcyjnych pradpryjemstvaŭ išła va Ukrainu na prodaž albo dla pieramarkiroŭvańnia i reekspartu ŭ Jeŭropu pad vyhladam ukrainskich.
U samym składanym stanoviščy byŭ «Biełaruśkalij» paśla zabarony tranzitu praź Litvu, ale i tam byli płany pieravałki praz ukrainskija party. Pa šerahu pryčyn jeŭrapiejcy i amierykancy nie rabili zachadu pa prykryćci hetaj ščyliny.
Ale paśla pačatku vajny situacyja rezka pamianiałasia. Pramy pryhraničny handal pakul paralizavany. Jość sproby pravozić traktary MTZ va Ukrainu praz Polšču, ale ź bienzinam, kalijem, azotnymi ŭhnajeńniami situacyja blizkaja da katastrafičnaj», — kažuć u ekanamičnaj słužbie NAU.
Surazmoŭcy adznačajuć, što paśla sychodu rasijskich vojskaŭ z poŭnačy Ukrainy ŭźnikaje mocny zapyt na adnaŭleńnie pastavak paliva. U tym liku dla zabieśpiačeńnia im ukrainskaj armii. Adnak adnaŭleńnie pastavak u hetym kirunku — niaprostaja zadača.
«RF moža być suprać takich pastavak i lohka zmoža prymusić Łukašenku hetaha nie dapuścić. Ź inšaha boku, centralnaja ŭłada va Ukrainie taksama moža być bolš aściarožnaj z padtrymkaj režymu, jaki dazvoliŭ abłažyć Kijeŭ z poŭnačy.
Tak, bienzin z Mazyra tańniejšy, ale jon apłačvaje rakiety, jakija laciać va Ukrainu, taksama ŭźnikaje pytańnie, jak potym patrabavać naftavaha embarha ad Jeŭropy, kali praciahvać kuplać naftu samim?
Tamu kazać ab tym, nakolki realnaje adnaŭleńnie pracy ŭ hetym kirunku, składana», — adznačyli ŭ ekanamičnaj słužbie NAU.
Čytajcie taksama:
Minski zavod biezałkaholnych napojaŭ sprabuje zaniać miesca Coca-Cola na rasijskim rynku
Ciapier čytajuć
Hurt «Drazdy» pakidaje scenu i vinavacić u hetym «hipieraktyŭnych błohieraŭ»5
Hurt «Drazdy» pakidaje scenu i vinavacić u hetym «hipieraktyŭnych błohieraŭ»
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha182182
Kamientary