MZS uhavorvaje Braziliju naładzić pastaŭki biełaruskaha kaliju, niahledziačy na sankcyi
Pasoł Biełarusi ŭ Brazilii Siarhiej Łukaševič daŭ intervju brazilskaj haziecie Correio Braziliense. Jaho pierakład publikuje sajt MZS.
Pavodle tekstu, sa studzienia pa sakavik 2022 hoda ŭ Braziliju było pastaŭlena kala 612 tysiač ton chłorystaha kaliju ź Biełarusi, kala 659 tysiač ton z Rasii i 719 tysiač ton z Kanady.
Hetyja try krainy, jak i ŭ 2021 hodzie, zastajucca lidarami ŭ pastaŭkach kalijnych uhnajeńniaŭ u Braziliju.
«Naša pradukcyja pastaŭlajecca na samych vyhadnych umovach: siaredniaja cana kalijnych uhnajeńniaŭ ź Biełarusi ŭ 2022 hodzie była na 60% nižejšaja, čym uhnajeńniaŭ z Rasii i Kanady», — paviedamlaje pasoł.
Biełaruski kalij na brazilskim rynku składaje amal 20%, tamu, pavodle pasła, «zamianić jaho niemahčyma».
Adnak pastavak ciapier niama.
«1 lutaha 2022 hoda tranzit u Braziliju praz tradycyjny marski port Kłajpieda (Litva) byŭ spynieny rašeńniem litoŭskaha ŭrada pa nadumanych palityčnych pryčynach», — paviedamlaje pasoł.
«Važna razumieć, što zachady suprać tranzitu kalijnych uhnajeńniaŭ ź Biełarusi praź Litvu nie źviazanyja z vajennymi dziejańniami va Ukrainie, — tłumačyć jon braziłcam. — U asnovie sankcyj lažyć niepryznańnie ZŠA i Jeŭrasajuzam prezidenckich vybaraŭ u Biełarusi ŭ žniŭni 2020 hoda i nastupnyja varožyja dziejańni ZŠA i ES, nakiravanyja na naniasieńnie škody krainam, jakija zaležać ad kalijnych uhnajeńniaŭ ź Biełarusi, takim jak Brazilija, Kitaj, Indyja».
Pavodle Łukaševiča, biełaruski bok razhladaje mahčymyja varyjanty pastavak razam z brazilskimi ŭładami.
«Biahučyja ceny na rynku ŭhnajeńniaŭ, na jakija ŭpłyvajuć ciažkaści z pastaŭkami ŭ Biełaruś, pavialičvajuć košt sielskahaspadarčaj vytvorčaści ŭ Brazilii z-za skaračeńnia dostupu da kalijnych uhnajeńniaŭ. Adnaŭleńnie pastavak kaliju ź Biełarusi ŭ Braziliju, biezumoŭna, pryviadzie da značnaha źnižeńnia cen na brazilskim rynku na hety vid uhnajeńniaŭ i sabiekoštu sielskahaspadarčaj pradukcyi. Biełaruś hulaje na panižeńnie cen na kalijnyja ŭhnajeńni. Niekatoryja krainy abiacajuć dapamahčy z zakupkaj uhnajeńniaŭ. Ale jość roźnica pamiž kuplaj tony za 1000 reałaŭ ci za 5000 reałaŭ. Hetaja situacyja patrabuje kompleksnaha rašeńnia», — pierakonvaje pasoł brazilcaŭ kuplać biełaruskija ŭhnajeńni, niahledziačy na sankcyi.
Da taho ž, «biełaruski ŭrad pryniaŭ rašeńnie ab libieralizacyi pracedur ekspartu kalijnych uhnajeńniaŭ z 6 krasavika 2022 hoda», tamu treba kuplać naŭprost u Biełarusi, biez pasiarednikaŭ.
Łukaševič padkreślivaje, što Biełaruś nie maje dačynieńnia da vajny z Ukrainaj.
«Jość šmat infarmacyi ab padziejach va Ukrainie, susiedniaj z nami krainie. Isnuje šmat niepravieranaj i adkryta łžyvaj infarmacyi ab udziele biełaruskich vajskoŭcaŭ tam.
My zajaŭlali pra heta raniej, i voś 13 krasavika 2022 hoda Arhanizacyja pa biaśpiecy i supracoŭnictvie ŭ Jeŭropie ŭ svajoj aficyjnaj zajavie paćvierdziła, što Biełaruś nie ŭdzielničaje ŭ «śpiecapieracyi va Ukrainie».
Na Biełaruś, jak krainu, jakaja maje miežy i z Ukrainaj, i z Rasijaj, lahła značnaja nahruzka: dapamoha biežancam, fizičnaja abarona svaich miež. Biełaruś daje płatformu dla mirnych pierahavoraŭ, a zachodnija krainy — uzbrajeńnie», — kaža pasoł.
Raniej ŚMI paviedamili ab zamiaščeńni biełaruskich uhnajeńniaŭ pastaŭkami z Kanady, Izraila i Ijardanii.
Ciapier čytajuć
Alaksandr Łukašenka tak lasnuŭsia na lod na chakiei, što trybuny zamierli VIDEA95
Alaksandr Łukašenka tak lasnuŭsia na lod na chakiei, što trybuny zamierli VIDEA
«Pa-biełarusku «Słana» Filipienki nabyvali bolš achvotna, čym pa-rusku». Jakija knihi siońnia ŭ topie? Intervju z kiraŭnicaj vydaviectva Gutenberg Publisher55
Kamientary