Mer Minska patłumačyŭ, čamu drevy na praśpiekcie Niezaležnaści zamianili na raśliny ŭ kadkach
Pavodle jaho słoŭ, pryčynaj hibieli dreŭ staŭ pierahreŭ karaniovaj sistemy.
Staršynia Minharvykankama Uładzimir Kucharaŭ raspavioŭ u efiry telekanała STB, čamu drevy, jakija niekalki hadoŭ raśli ŭ hruncie na praśpiekcie Niezaležnaści, daviałosia zamianić raślinami ŭ śpiecyjalnych kadkach, piša Mlyn.by.
Pavodle jaho słoŭ, pryčynaj hibieli dreŭ staŭ pierahreŭ karaniovaj sistemy. Na hetym učastku praśpiekta pad ziamloj prachodziać kamunikacyi ciepłazabieśpiačeńnia, pryčym truby raźmieščanyja adnosna niehłyboka.
«Jany ŭžo raśli niekalki hadoŭ, usio išło narmalna, ale jość asablivaść: na praśpiekcie Niezaležnaści na hetym adrezku prakładzieny kamunikacyi, heta značyć ciepłazabieśpiačeńnie, truby znachodziacca niehłyboka pad ziamloj», — rastłumačyŭ Kuchareŭ.
Jak adznačyŭ mer, asabliva surjoznaj prablema stała paśla zimy z praciahłymi marazami.
Kab padtrymlivać nieabchodnuju tempieraturu ŭ damach, kamunalnym słužbam davodziłasia zabiaśpiečvać vysokuju tempieraturu ciepłanośbita.
«I voś hetaja zima, kali sapraŭdy na praciahu dvuch miesiacaŭ byli marazy, patrabavała padtrymlivać vysokuju tempieraturu ciepłanośbita, kab zabiaśpiečyć aciapleńnie ŭ damach. Heta pryviało da taho, što adbyłosia pierahravańnie karaniovaj sistemy hetych dreŭ, i jany zahinuli», — raspavioŭ Kucharaŭ.
Havorka idzie pra viazy i jasieni, jakija śpiecyjalna padbirali śpiecyjalisty Nacyjanalnaj akademii navuk Biełarusi i adaptavali da ŭmoŭ haradskoha asiarodździa.
Paśla taho jak raśliny pačali hinuć, śpiecyjalisty pasprabavali ich adnavić. Dla hetaha vykarystoŭvali padkormku i inšyja mietady reanimacyi, a da pracy pryciahnuli śpiecyjalistaŭ Bataničnaha sadu i profilnych navukovych ustanoŭ. Adnak vyratavać drevy nie ŭdałosia.
Paśla hetaha haradskija ŭłady pryjšli da vysnovy, što paŭtornaja vysadka dreŭ niepasredna ŭ ziamlu moža praź niekalki hadoŭ pryvieści da toj ža prablemy.
Karani novych raślin z časam znoŭ dasiahnuli b kamunikacyj, raźmieščanych pad praśpiektam, paśla čaho drevy mahli b zahinuć.
«Ale, bačačy hetuju situacyju i razumiejučy, što i dalej, kali vysadzić drevy, praz 4—5 hadoŭ karaniovaja sistema znoŭ padydzie da kamunikacyj, my pryniali ŭzvažanaje rašeńnie, što heta budzie niapravilna. Było pryniata rašeńnie vysadžvać drevy ŭžo mienavita ŭ kadkach. Jany buduć raści, i ich karaniovaja sistema dazvolić im znachodzicca tam 15 hadoŭ i bolš», — patłumačyŭ Kucharaŭ.
Pry hetym sam jon udakładniŭ, što ŭstanoŭlenych kadkaŭ pavinna chapić prykładna na dziesiać hadoŭ.
Ciapier čytajuć
Hetaja biełaruskaja instazorka dajšła da Playboy — ale, u adroźnieńnie ad mnohich, nie spyniłasia5
Kamientary
Pra mahčymy niehatyŭny ŭpłyŭ ciepłatras ja kazaŭ raniej (tut spračalisia).
Nasamreč, niekalki pryčyn mahli ŭ kompleksie dabić drevy: pamienšanaja prastora dla karanioŭ pad ziamloj z-za ščylnych kamunikacyj, paškodžańni ich pry budaŭnictvie mietro i pierakładcy kamunikacyj, škodny ciepłavy režym zimoj, pamienšanaja prastora hazonaŭ źvierchu z-za vialikich paloŭ plitki, i pavierch usiaho hetaha jašče i słoj soli zimoju.
Pravilnym rašeńniem było b svoječasova achoŭvać zialony kalidor z dreŭ, hazonaŭ i kustoŭja jak asobny abjekt, nie adnosicca da ich jak da apošniaha, što pavinna vyžyć, kali zdoleje. A kadki ŭžo vynik. Kali dumać stratehična, nie pozna jašče pryniać takija achoŭnyja normy dla inšych terytoryj.