Uitkaf i Kušnier acanili sustreču ŭ Kijevie. Zialenski padaryŭ im futbołki z nadpisam «Kijivśkij riežim»
«U nas adbyłasia vielmi značnaja, źmiastoŭnaja i važnaja razmova. My vielmi natchnionyja», — skazaŭ Styŭ Uitkaf.
Śpiecpradstaŭniki prezidenta ZŠA Styŭ Uitkaf i Džared Kušnier u Kijevie zrabili pieršyja zajavy pra pieramovy. 6 vieraśnia jany ŭpieršyniu prybyli va Ukrainu ź vizitam.
Uitkaf padziakavaŭ Uładzimiru Zialenskamu za haścinnaść i adznačyŭ, što pajezdka va Ukrainu była «vydatnaj». Pavodle jaho słoŭ, amierykanski bok pravioŭ źmiastoŭnuju razmovu z ukrainskimi pradstaŭnikami, pieradaje «RBK-Ukraina».
«U nas adbyłasia vielmi značnaja, źmiastoŭnaja i važnaja razmova. My vielmi natchnionyja. My płanujem zastavacca tut stolki, kolki spatrebicca», — zajaviŭ Uitkaf.
Kušnier pieradaŭ Zialenskamu pavahu ad prezidenta ZŠA Donalda Trampa.
Jon adznačyŭ, što Tramp ličyć situacyju, jakaja skłałasia, składanaj, bo havorka idzie nie tolki pra zakančeńnie vajny, ale i pra stvareńnie ŭmoŭ dla doŭhaterminovaha miru.
Pavodle słoŭ Kušniera, amierykanski prezident choča, kab paśla zaviaršeńnia vajny Ukraina mahła vykarystać svoj patencyjał dla adnaŭleńnia i raźvićcia.
«Tramp vielmi hetaha chacieŭ by. Jon nie baicca składanych zadač — čym składaniejšaja zadača, tym nastojliviej treba pracavać i addavać usio, što ŭ ciabie jość», — dadaŭ Kušnier.
Jon taksama zajaviŭ, što Tramp imkniecca spynić śmierci, a zatym adnavić inviestycyi i ekanamičnaje supracoŭnictva, što musić spryjać roskvitu Ukrainy i Jeŭropy.
«My spadziajomsia, što pa vynikach hetaj pajezdki my znojdziem novy šlach da miru», — zajaviŭ pradstaŭnik ZŠA.
Jak piša Financial Times, Uitkaf i Kušnier pryvieźli ŭ Kijeŭ abnoŭlenyja viersii raniejšych dakumientaŭ. Ale pryncypova novych idej tam niašmat, bo pieraškodaj zastajecca žadańnie Pucina całkam zachapić Danbas. Na sustrečy pahadzilisia, što vajna naŭrad ci skončycca da zimy.
Paśla pieramoŭ u Kijevie Zialenski padaryŭ Uitkafu i Kušnieru futbołki z nadpisam «Kijivśkij riežim».
Uitkaf i Kušnier upieršyniu pryjechali va Ukrainu
Uitkafa i Kušniera ŭ Maskvie supravadžaŭ adkazny za sankcyi čynoŭnik Minfina ZŠA
Pucin na pieramovach z pasłańnikami Trampa zajaviŭ, što «paśpiachova prasoŭvajecca» va Ukrainie i dabjecca «metaŭ SVA»
Pucin pryznaŭsia Uitkafu i Kušnieru, što jamu kamfortna ź imi pracavać
Kamientary