Erdahan pahražaje zabłakavać ustupleńnie Finlandyi i Šviecyi ŭ NATA
U paniadziełak prezident Turcyi Redžep Erdahan znoŭ zajaviŭ pra toje, što nie padtrymaje pryniaćcie Finlandyi i Šviecyi ŭ Paŭnočnaatłantyčny aljans.
Erdahan navat skazaŭ, što Stakholm i Chielsinki mohuć nie pasyłać svaich dypłamataŭ u Ankaru i nie sprabavać pierakanać Turcyju pahadzicca, piša «Bi-bi-si».
Hałoŭnaja pretenzija tureckaha lidara — toje, što hetyja dźvie krainy dajuć prytułak kurdskim sieparatystam.
Na pres-kanfierencyi ŭ paniadziełak Erdahan nazvaŭ Šviecyju rassadnikam terarystyčnych arhanizacyj.
«Ni ŭ adnoj z hetych krain niama vyraznaha i jasnaha staŭleńnia da terarystyčnych arhanizacyj. Jak my možam im daviarać?»— zajaviŭ prezident Turcyi.
Turcyja abvinavačvaje dźvie skandynaŭskija krainy va ŭkryvalnictvie členaŭ Rabočaj partyi Kurdystana (RPK), jakuju jana ličyć terarystyčnaj arhanizacyjaj, a taksama paśladoŭnikaŭ Fietchułacha Hiulena, jakoha Ankara abvinavačvaje ŭ arhanizacyi sproby dziaržaŭnaha pieravarotu ŭ 2016 hodzie.
Urad Erdahana taksama abiacaŭ błakavać pryniaćcie zajavak na ŭstupleńnie ŭ NATA ad tych krain, jakija ŭviali sankcyi suprać Turcyi.
U 2019 hodzie Finlandyja i Šviecyja ŭviali embarha na pastaŭki ŭzbrajeńniaŭ Turcyi paśla jaje ŭvarvańnia ŭ Siryju.
Adnak choć Erdahan i zajaviŭ, što turbavacca nie varta, abiedźvie krainy ŭsio ž pasyłajuć u Ankaru svaje delehacyi. U Turcyju adpraviacca ministry zamiežnych spraŭ dźviuch krain An Linde i Pieka Chaavista.
Prezident Turcyi, piša Adams, miarkujučy pa ŭsim, poŭny rašučaści vyhandlavać peŭnuju canu za taki darahi hołas.
Ciapier čytajuć
Što Babaryka i Kaleśnikava adkazali na pytańni pra vajnu85
Kamientary