U Čechii małady biełarus trapiŭ u komu — nahłytaŭsia tabletak praz prablemy ź lehalizacyjaj i razryŭ ź dziaŭčynaj
22‑hadovy Jakaŭ Kudzialevič, syn adnaho ź lidaraŭ strajkama «Biełaruśkalija» Dźmitryja Kudzialeviča, trapiŭ u reanimacyju češskaha haradka paśla sproby samahubstva. Chłopiec atruciŭsia vialikaj dozaj prehabalinu — ciažkich psichijatryčnych lekaŭ. Jak heta mahło zdarycca?
Jakaŭ Kudzialevič pierabraŭsia ŭ Čechiju ŭ 2021‑m i pajšoŭ tam vučycca. Vybraŭ hetu krainu, bo tak paraiŭ jamu baćka.
Jakaŭ pastupiŭ u Ostraŭski techničny ŭniviersitet, vyvučaŭ bijamiedycynskija technałohii. Try kursy maładzion pravučyŭsia na toj składanaj śpiecyjalnaści, ale ŭ 2024‑m nie zdaŭ dvojčy adzin ekzamien i byŭ adličany. Tak junak pazbaviŭsia zakonnaj padstavy žyć u Čechii i pajšoŭ šukać inšyja sposaby lehalizacyi.
Spačatku chłopiec sprabavaŭ atrymać novuju vizu, znajšoŭ sabie pracu i ŭniviersitet u Prazie, ale i tam nie skłałasia. Na jaho navat paśpieli vypisać rašeńnie ab departacyi. Kab paźbiehnuć toj vysyłki, dziaciuk vyrašyŭ iści ŭ łahier uciekačoŭ i padavacca na mižnarodnuju abaronu.
10 krasavika Jakaŭ atrymaŭ adkaz, što ŭ mižnarodnaj abaronie jamu admaŭlajuć. Nieviadoma, ci mieŭ jon niejkija dokazy taho, što ŭ Biełarusi jamu sapraŭdy pahražaje pieraśled.
Jakaŭ Kudzialevič. Fota: staronka chłopca Ukantakcie
13 krasavika Jakaŭ źviarnuŭsia da advakata, i toj skazaŭ chłopcu, što abskardžańnie admovy kaštuje 35 tysiač češskich kron — bolš za 1400 jeŭra. Takich hrošaj u Jakava nie było, i jaho pieranakiravali da biaspłatnaha advakata.
Prykładna ŭ toj ža čas junak pasvaryŭsia ź dziaŭčynaj.
Uviečary 13 krasavika Jakaŭ pierastaŭ vychodzić na suviaź. Jamu zvanili, pakul telefon u chłopca całkam nie razradziŭsia, i tady jaho dziaŭčyna paprasiła, kab Jakava naviedali ŭ jaho pakoi — pravieryć, ci ŭsio dobra. Kali zajšli, ubačyli, što chłopiec lažyć nieprytomny.
Z łahiera dla ŭciekačoŭ, dzie jon znachodziŭsia, Jakava pieravieźli ŭ reanimacyju horada Rychnaŭ-nad-Kniažnaŭ. Akazałasia, što ŭ biełarusa mocnaje atručvańnie ciažkimi lekami. Siarod ich, naprykład, prehabalin — hety mocny srodak, jaki vykarystoŭvajuć dla lačeńnia bolaŭ, epilepsii i tryvohi.
Bolš za dva tydni jon znachodzicca ŭ komie. Nakolki viadoma, jaho mozh atrymaŭ mocnaje paškodžańnie, i pierśpiektyvy Jakava niajasnyja.
Nakolki viadoma, chutka taksama moža skončycca strachoŭka, na asnovie jakoj chłopca lečać. U takim vypadku dalejšaja reabilitacyja biełarusa moža kaštavać jaho baćkam dziasiatki tysiač jeŭra.
«Naša Niva» — bastyjon biełaruščyny
PADTRYMAĆ
Sustreču Ryžankova ź Sikorskim paprasiŭ Minsk. Što kamanda Cichanoŭskaj abmiarkoŭvała z palakami da i paśla jaje11
Kamientary