«Značna bolš za 5000». Tramp kaža, što Hiermaniju pakinuć kudy bolš amierykanskich sałdat, čym mierkavałasia
ZŠA skarocić kolkaść svaich vojskaŭ u Hiermanii na fonie kryŭdy Trampa na Mierca.
Prezident ZŠA Donald Tramp płanuje vyvieści značna bolš sałdat z Hiermanii, čym było abvieščana raniej, piša Bild.
«My značna skarocim kolkaść vojskaŭ, pryčym značna bolš, čym na 5000», — skazaŭ jon žurnalistam u aeraporcie Pałm-Bič u Fłarydzie.
U piatnicu ministr abarony Pit Chiehsiet abviaściŭ pra vyvad kala 5000 sałdat.
U čaćvier Tramp raskrytykavaŭ Mierca za jaho słovy ab tym, što ZŠA byli «prynižanyja» iranskimi pieramoŭščykami, i zajaviŭ, što Mierc «žudasna daje rady svajoj pracy».
U ciapierašni čas u Hiermanii raskvataravany kala 39 tysiač amierykanskich sałdat, usiaho kala 86 tysiač u Jeŭropie, ale hetyja ličby rehularna źmianiajucca z-za ratacyj i vučeńniaŭ. Niahledziačy na mahčymyja skaračeńni, Hiermanija zastajecca centralnym miescam dysłakacyi ŭzbrojenych sił ZŠA. Takija abjekty, jak Jeŭrapiejskaje kamandavańnie ZŠA ŭ Štutharcie i avijabaza Ramštajn u Rejnłand-Pfalcy, źjaŭlajucca važnymi vuzłami dla apieracyj, naprykład, na Blizkim Uschodzie.
Pradstaŭnica NATA Elisan Chart zajaviła ŭ X, što vajenny aljans pracuje z ZŠA, «kab lepš zrazumieć detali ich rašeńnia adnosna kantynhientu vojskaŭ u Hiermanii». U toj ža čas takaja «karekciroŭka» śviedčyć pra toje, «što Jeŭropa pavinna praciahvać bolš inviestavać u abaronu i brać na siabie bolšuju častku adkaznaści za našu ahulnuju biaśpieku». Anałahičnaje mierkavańnie vykazaŭ ministr abarony FRH Borys Pistoryus.
Vyvad vojskaŭ pavinien być «zavieršany na praciahu najbližejšych šaści-dvanaccaci miesiacaŭ», zajaviŭ raniej pradstaŭnik Pientahona Šon Parneł. Akramia Hiermanii, Tramp taksama pahražaŭ Ispanii i Italii adklikać dysłacyravanych tam sałdat:
«Italija nam ničym nie dapamahła, a Ispanija pastupiła žudasna», — dadaŭ jon, kažučy pra padtrymku sajuźnikaŭ u iranskim kanflikcie.
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale11
Kamientary