U Hrodnie likvidujuć abjadnańnie byłych małaletnich viaźniaŭ fašysckich kancłahieraŭ
U Hrodzienskim abłasnym sudzie pačali praces likvidacyi dźviuch hramadskich arhanizacyj. Heta abłasny spartyŭna-patryjatyčny kłub «Honar Radzimy» i Hrodzienskaje abłasnoje hramadskaje abjadnańnie byłych małaletnich viaźniaŭ fašysckich kancłahieraŭ, paviedamlaje hrodna.life.
Pasiadžeńni pa abodvuch pracesach pačalisia 17 maja. «Honar Radzimy» likviduje sudździa Žanna Kraŭčanka, abjadnańnie byłych małaletnich viaźniaŭ fašysckich kancłahieraŭ — Juryj Karecki. Abiedźvie likvidacyi pačalisia pa isku ŭpraŭleńnia justycyi Hrodzienskaha abłvykankama.
«Honar Radzimy» zarehistravali 20 červienia 2017 hoda. Bolš pra hetuju arhanizacyju ničoha nie viadoma.
Hrodzienskaje abłasnoje hramadskaje abjadnańnie byłych małaletnich viaźniaŭ fašysckich kancłahieraŭ zasnavanaje ŭ 1995 hodzie. Jaho meta — uzmacnieńnie hramadskaj uvahi da byłych viaźniaŭ fašyzmu. Bolš za 30 hadoŭ uznačalvaje arhanizacyju Zachar Tarasievič. Jaho ź siamjoj padčas vajny pavieźli ŭ kancłahier u Viciebsku, a adtul u vieraśni 1943 hoda dastavili ŭ kancłahier «Aŭšvic» (kala horada Aśviencim u Polščy). «Tam darosłym i dzieciam na levaj ruce vykałali łahiernyja numary. Moj numar 149 801. I siońnia, praź dziesiacihodździ, jon vyrazna bačny, nie daje zabyć pieražytaje», — raskazvaŭ Tarasievič «SB — Biełaruś Siehodnia». Ź jaho siamji vyžyli tolki jon i jaho baćka.
Nie pieršaja likvidacyja ŭ 2022 hodzie
U 2022 hodzie ŭ Hrodnie ŭžo likvidavali Hrodzienskaje hramadskaje abjadnańnie «Krajaznaŭčaje tavarystva — Komatava». Pasiadžeńni prajšli pa likvidacyi jašče dźviuch arhanizacyj: Hrodzienski abłasny spartyŭny kłub pa volnaj baraćbie «Miadźviedź» i sacyjalna-infarmacyjnaje hramadskaje abjadnańnie «Ustojlivaje raźvićcio vioski». Pakul u Adzinym dziaržaŭnym rejestry jany paznačanyja jak «dziejučyja». Ź leta 2021 hoda bolš za 10 arhanizacyj u Hrodnie likvidavali pa rašeńni suda, siem — pa rašeńni vykankamaŭ, niekatoryja pačali praces likvidacyi samastojna.
Kamientary