Dniami rasijskim dyleram Volkswagen paviedamili, što kampanija nie budzie adnaŭlać vytvorčaść aŭtamabilaŭ u Rasii ŭ najbližejšaj budučyni. «Naša Niva» raźbirałasia, jak heta zakranie biełaruski aŭtamabilny rynak.
Aŭtamabili marki VW na stałaj asnovie ŭvachodziać u top-3 samych pradavanych novych aŭto ŭ krainie. Letaś u Biełarusi dylery pradali 4654 aŭtamabili niamieckaj marki, pry hetym amal usie ź ich byli vyrablenyja na zavodach u Rasii. Praz vajnu i sankcyi biełaruskija aŭtamabilisty sutyknulisia ź situacyjaj, kali ceny na novyja aŭtamabili rastuć, a vybar źmianšajecca.
Na biahučy momant biełaruskija dylery raspradajuć reštki mašyn, jakija byli zakupleny raniej. Siarod dasiažnych — VW Polo, VW Taos, VW Tiguan. Usie try madeli vypuskali na zavodach u RF. Aproč hetych aŭto, achvotnyja majuć mahčymaść zamović Touareg i Multivan, hetyja madeli impartujuć ź Jeŭropy.
Surazmoŭca «Našaj Nivy» z šerahu pradstaŭnikoŭ dyleraŭ VW u Biełarusi paćvierdziŭ, što novych pastavak mašyn z Rasii ŭžo dakładna nie budzie. Na jaho dumku, takaja situacyja praciahniecca minimum da kanca hoda.
«Praktyčna ŭsie aŭtamabili VW, jakija pradavali dylery, byli rasijskaj vytvorčaści ciapier hetych mašyn my dakładna nie pabačym bližejšym časam. Dylery hatovy impartavać mašyny ź ES, ale zaraz my možam rabić heta tolki ŭ dačynieńni da tych madelaŭ, na jakija atrymany siertyfikaty. Dla impartu novych madelaŭ, treba prachodzić praciahłuju i vielmi darahuju praceduru siertyfikacyi», — adznačaje surazmoŭca.
Na jaho dumku, kab biełarusy nie zastalisia biez novych aŭto, a ceny na tyja, što buduć impartavacca ź ES, byli kankurentnazdolnymi, našamu rynku treba adasobicca ad rasijskaha na zakanadaŭčym uzroŭni.
«Naładžvać impart aŭto ź Jeŭropy praz Rasiju — heta niemahčyma i navat absurdna. Našaj krainie varta pierahledzieć narmatyŭnyja akty, kab vyrašyć pytańnie ź siertyfikacyjaj novych aŭto, a taksama sa staŭkami ŭtylizacyjnaha zboru. Heta b dazvoliła dyleram handlavać jeŭrapiejskimi aŭtamabilami.
Takija zachady dapamahli b krainie paźbiehnuć deficytu novych mašyn, a rynak tym časam moh by viarnucca na toj ža šlach, što byŭ da ŭvachodu našaj krainy ŭ Mytny sajuz», — miarkuje śpiecyjalist.
Praz znachodžańnie Biełarusi ŭ Mytnym sajuzie biełaruskija dylery ŭ bolšaści svajej byli vymušanyja pradavać aŭtamabili, vyrablenyja na terytoryi sajuza. Pry hetym treba razumieć, što amal usie zavody znachodziacca na terytoryi RF. Takim čynam kala 90% novych aŭto, pradavanych u Biełarusi, zrobleny ŭ RF. Niaredka heta madeli, jakija byli raspracavanyja dla krain treciaha śvietu i nie pradavalisia na rynkach ES. U Biełarusi ž, naadvarot, nie pradavalisia madeli, dasiažnyja ŭ Jeŭropie.
U Rasii zaniepakojeny tym, kab nie zastacca biez novych mašyn, i ŭžo rabilisia kroki pa źmienach u zakanadaŭstvie. Praz adsutnaść patrebnych kampanientaŭ, tam źmienšyli ekałahičnyja patrabavańni dla aŭto. Paźniej deputaty vystupali z prapanovaj pamienšyć mytnyja pošliny na mašyny, kab paźbiehnuć dyficytu.
Čytajcie taksama:
«Ceny vyraśli na 30—50%, novyja mašyny praktyčna nie pastaŭlajuć». Što adbyvajecca na aŭtarynku
Ekanomija składaje tysiačy dalaraŭ. Kupla i pryhon aŭto ź Jeŭropy i ZŠA — što varta viedać
«Łada» adnović vychad. Budzie biez ABS, padušak biaśpieki i škłopad‘iomnikaŭ
Ciapier čytajuć
«Astravok Paŭnočnaj Karei». Baranavickaja škoła vykaciła śpis patrabavańniaŭ da vyhladu vučniaŭ26
«Astravok Paŭnočnaj Karei». Baranavickaja škoła vykaciła śpis patrabavańniaŭ da vyhladu vučniaŭ
Mistyčnaje koła Vilni: Kalinoŭski byŭ pachavany ź miedaljonam śviatyni, kala jakoj vyras hatyčny pałac doktara z-pad Oršy. Ciapier pareštki Kalinoŭskaha pierapachavali ŭ mahilni taho ž doktara1212
Kamientary