«Pakul zajavak nul». U vilenskaj škole Stembridge raskazali, jak idzie nabor u sadkoŭskuju hrupu ź biełaruskaj movaj navučańnia
Mienš jak miesiac tamu pryvatnaja škoła Stembridge abviaściła nabor u biełaruskamoŭnuju hrupu ŭ Vilni dla dziaciej ad 2 da 6 hadoŭ. Tam buduć vyvučać jašče i litoŭskuju dy anhlijskuju movy. Niahledziačy na toje, što ŭ Vilni žyvuć bolš za 18 tysiač biełarusaŭ, achvotnych addać dziaciej u hrupu ad Stembridge pakul nie znajšłosia. «Biełsat» pacikaviŭsia, u čym prablema i kolki kaštuje navučańnie.
Patrebna minimum 15 dziaciej
Pra stvareńnie hrupy ź biełaruskaj movaj navučańnia ŭ dziciačym sadku zasnavalniki Stembridge dumali jašče ŭ 2022 hodzie. Tady ŭ škole pravodzili apytańnie siarod baćkoŭ, nakolki jana patrebnaja, ale na toj momant popytu nie było.
«My pryvatnaja ŭstanova i musim aryjentavacca na popyt. Kali jaho niama, adkryć hrupu niemahčyma», — tłumačyć Anton Maziejka, kiraŭnik departamientu kamunikacyjaŭ Stembridge.
Pavodle Antona, ciapier situacyja źmianiłasia, mnohija biełarusy padtrymali ideju. Ale paradoks u tym, što na 24 krasavika nichto ź ich tak i nie padaŭ nivodnaj zajaŭki. Ich źbirajuć da kanca červienia.
«Moža, jašče mała času prajšło, mienš za miesiac, jak my publična abviaścili pra nabor. Tamu my čakajem, pracujem, robim usio, što ad nas zaležyć, kab jak maha bolš ludziej daviedałasia pra hrupu», — kaža Anton.
Dla zapusku hrupy patrebnyja minimum 15 dziaciej. Mienavita takuju kolkaść u Stembridge nazyvajuć finansava ŭstojlivym scenarom, pry jakim možna harantavana pačać pracu ź vieraśnia.
«Heta samy biaśpiečny varyjant dla startu. Ale kali budzie krychu mienš zajavak — 12 ci 13, my ŭsio roŭna budziem dumać, jak znajści mahčymaść adkryć hrupu», — adznačaje Anton Maziejka.
«Mahčyma, niedastatkova padkreślili rolu litoŭskaj movy»
U hetym hodzie Siejm Litvy pryniaŭ zakon, pavodle jakoha dzieci mihrantaŭ, što ŭpieršyniu iduć u pačatkovuju municypalnuju škołu, mohuć vučycca tolki ŭ škołach ź litoŭskaj movaj. Heta značyć, što paśla sadka ŭžo nielha vybrać municypalnuju škołu z rasiejskaj movaj navučańnia — tolki litoŭskuju.
Dyrektarka dziciačaha sadka Stembridge Volha Mackievič adznačaje, što ichnaja hrupa zadumvajecca nie jak vyklučna biełaruskamoŭnaja prastora, budzie vyvučacca i litoŭskaja mova. Hałoŭnaja ideja — sumiaścić zachavańnie biełaruskaj movy z naturalnaj intehracyjaj u litoŭskaje asiarodździe.
«Dbajučy pra budučyniu dziaciej, my razumiejem, što biełaruska-litoŭskaja intehracyja — heta toje, što ciapier patrebna, kab dzieci nie adčuvali svajoj adarvanaści ad litoŭskaj supolnaści», — kaža Volha.
Anton miarkuje, što, mahčyma, adna z pryčynaŭ, čamu ciapier niama popytu na ichniuju prapanovu, — niedastatkova padkreślili rolu litoŭskaj movy.
«Mahčyma, treba było rabić bolšy akcent mienavita na jaje vyvučeńni, ale pry hetym zachoŭvać biełaruskuju identyčnaść.
Majoj dačce amal try hady, jana ŭžo chodzić u litoŭski sadok i pačynaje havaryć pa-litoŭsku. Pry hetym jana naturalna źmiešvaje biełaruskuju i litoŭskuju ŭ adnym skazie. I šmat inšych baćkoŭ raspaviadajuć pra toje samaje. My ŭsprymajem heta jak plus — jak prykmietu žyvoha šmatmoŭnaha asiarodździa», — kaža Anton.
Poŭny dzień — 550 jeŭra na miesiac
Sioleta sadok Stembridge pierajechaŭ u novaje pamiaškańnie na adrasie Žalgirio g. 135 u Vilni. Pobač pracuje litoŭski dziciačy sadok Gervuogė, i dzieci majuć supolnyja prastory dla hulniaŭ. U škole ličać, što heta važnaja pieravaha: mova budzie ŭsprymacca nie jak asobny pradmiet, a jak naturalny srodak znosinaŭ.
«Spačatku my ładzili śviaty na biełaruskaj movie (Kalady, Maślenka, Hukańnie viasny dy inšyja), ale potym šmat stała dziaciej z roznych krainaŭ, tamu ciapier robim śviaty ź intehracyjaj ź litoŭskimi śviatami, pravodziačy paraleli dla kožnaj krainy, adkul našyja dzietki. Šmat razmaŭlajem pra tradycyi i śviatkavańni Litvy», — raskazvaje jana.
Košt naviedvańnia zaležyć ad farmatu. Da 12:30 — 360 jeŭra na miesiac, da 16:00 — 480 jeŭra, poŭny dzień (da 18:30) — 550 jeŭra.
Dla siemjaŭ u Vilni dziejničaje kampiensacyja ad municypaliteta na 120 jeŭra, kali dzicia naviedvaje pryvatny sadok zamiest dziaržaŭnaha. Takim čynam, poŭny dzień moža kaštavać kala 430 jeŭra paśla kampiensacyi.
Arhanizatary pryznajuć, što dla mnohich biełaruskich siemjaŭ u emihracyi heta značnaja suma. Ale padkreślivajuć: košt źviazany z arendaj pamiaškańnia, zarobkami piedahohaŭ i štodzionnaj pracaj sadka. Darečy, dźviuch vychavalnic, jakija razmaŭlajuć pa-biełarusku, Stembridge užo znajšoŭ.
Kali da kanca červienia nieabchodnaj kolkaści zajavak nie nabiarecca, hrupu mohuć nie adkryć. Ale ŭ Stembridge kažuć, što ad samoj idei nie admoviacca.
«Budziem dumać, što možna źmianić, i prapanujem niejki inšy farmat. Dla nas heta nie razavaja sproba, a doŭhaterminovaja pierśpiektyva», — kaža Anton Maziejka.
Padać zajaŭku ŭ hrupu ź biełaruskaj movaj navučańnia možna tut.
-
Cichanoŭskaja zaklikała Estoniju pravodzić roźnicu pamiž biełarusami i rasijanami
-
Anžalicy Mielnikavaj vydali pašpart prykryćcia na imia Anhieliny Radzivonavaj?
-
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ
Kamientary
Voś košt asnovy (va ŭsich sensach) biełaruskaj prysutnaści ŭ Vilni.
A ciapier pytańnie - ČAMU hetuju sumu nie znajšli pa piać z pałovaj hod Cichanoŭskaja, usie ofisy, kabiniety i ministry pa nacyjanalnym adradžeńni?
Heta što, mieniej važna, čym roznyja jutuju-šoŭ u farmacie "chichi-chacha", jak Časiki cikajuć, pieratrom z Chalezinym, Saša što ty niasieš i proćma inšych.
Čamu?!..