«Ukłaŭ usie svaje hrošy». Biełarus z Polščy palacieŭ lačyć zuby ŭ Turcyju — ciapier jamu treba bolš za 25 tysiač jeŭra na vypraŭleńnie

Adnak užo paśla pieršaj pajezdki pačalisia ŭskładnieńni, jakija pryviali da dadatkovych vydatkaŭ. Ciapier biełarus sprabuje znajści bolš za 25 tysiač jeŭra, kab paśla tureckaj kliniki adnavić zuby ŭ Polščy. Svajoj historyjaj jon padzialiŭsia z Most.

Skłali płan lačeńnia pa zdymkach

Da pajezdki ŭ Turcyju Alaksandr užo prachodziŭ lačeńnie ŭ Polščy — vypraŭlaŭ prykus i adnaŭlaŭ adsutnyja zuby. Heta kaštavała doraha, pry hetym častka zuboŭ usio ž była stračana. Z-za vysokich koštaŭ jon pačaŭ šukać alternatyŭnyja varyjanty.

— Ja paraŭnoŭvaŭ roznyja krainy, dzie vynikovaja suma vychodziła nižejšaj, i spyniŭsia na Turcyi. Da taho ž ja bajaŭsia moŭnaha barjeru, tamu vybraŭ kliniku z ruskamoŭnym kansultantam.

Pa zdymkach, zroblenych u Polščy, u klinicy skłali płan lačeńnia. Prapanavanaja cana — kala 4 tysiač jeŭra — zdałasia jamu pryvabnaj.

Košt uzros na tysiaču jeŭra

Pieršy tryvožny sihnał źjaviŭsia ŭžo pa pryjeździe. U aeraporcie Alaksandra nichto nie sustreŭ: kansultant-pierakładčyk, jaki pavinien byŭ supravadžać jaho, źjechaŭ, i znosiny z klinikaj daviałosia vieści anłajn. Heta naściarožyła, ale jon vyrašyŭ praciahnuć lačeńnie, bo pajezdka ŭžo była apłačana.

U samoj klinicy vyśvietliłasia, što pačatkovy płan lačeńnia źmianiŭsia: spatrebiłasia vydalić jašče adzin zub i ŭstalavać dadatkovy impłant. Košt pavialičyŭsia prykładna na tysiaču jeŭra.

— Ja pasprabavaŭ piarečyć, ale potym stała zrazumieła, jak heta pracuje: spačatku nazyvajuć nizkuju canu, a potym pavialičvajuć jaje ŭžo na miescy. Ty akazvaješsia ŭ situacyi, kali admovicca składana — ty ŭžo prylacieŭ, patraciŭ hrošy, uziaŭ adpačynak.

Alaksandr pahadziŭsia i prajšoŭ dvuchtydniovaje lačeńnie. Jamu abtačyli zuby, pastavili karonki na ŭsie najaŭnyja zuby, pastavili impłanty i masty. Try impłanty pakinuli biez karonak — dla hetaha treba było viarnucca praz paŭhoda.

«Paraili źmianić zubnuju ščotku i pastu»

Praź niekalki tydniaŭ paśla viartańnia ŭ Polšču ŭ Alaksandra pačalisia prablemy: dziasny pačali kryvavić, zuby stali reahavać na chałodnaje i haračaje.

Jon źviazaŭsia z klinikaj, ale ruskamoŭny kansultant užo nie adkazvaŭ. Znosiny praciahnulisia praź inšaha supracoŭnika z dapamohaj pierakładčyka. U adkaz jamu rekamiendavali źmianić zubnuju ščotku i pastu.

Klinika prapanavała pryjechać na pierarobku. Alaksandr vyrašyŭ sumiaścić heta z ustanoŭkaj karonak na impłanty i damoviŭsia viarnucca praz paŭhoda.

Adkałolisia piarednija karonki

U druhi raz Alaksandr lacieŭ u Stambuł užo całkam za svoj košt: jon apłaciŭ pieralot, pražyvańnie i ŭsie supravadžalnyja vydatki.

Jon uspaminaje, što jurydyčna situacyja z samaha pačatku vyhladała nieprazrystaj. Pry pieršym vizicie ŭsiu sumu treba było apłacić najaŭnymi. Aficyjnaj damovy nie zaklučali — jamu vydali tolki papieru z sumaj i podpisam asistenta. Tady heta padałosia jamu padazronym, ale jon nie nadaŭ hetamu vialikaha značeńnia.

Padčas druhoha vizitu vyśvietliłasia, što paśla pieršaha lačeńnia ŭ jaho adkałolisia piarednija karonki, a prykus zastaŭsia niapravilnym.

— U mianie ŭžo byli surjoznyja prablemy. Ja nastojvaŭ, kab usio pierarabili pa harantyi.

Pa jaho słovach, u klinicy raniej abiacali harantyju — dva hady na pracu i da 20 hadoŭ na materyjały, adnak heta nidzie nie było aficyjna zamacavana.

— Doktar nie chacieŭ pierarablać biaspłatna. Paśla doŭhich sprečak jany pahadzilisia, ale z dapłataj za karonki na impłanty.

Alaksandr kaža, što faktyčna značnuju častku lačeńnia pryjšłosia rabić nanova. Hety praces akazaŭsia ciažkim nie tolki fizična, ale i psichałahična.

— Ja ŭžo tady razumieŭ, što heta była miedycynskaja pamyłka.

«Lekary prosta ŭ šoku»

Niahledziačy na paŭtornaje lačeńnie, prablemy nie źnikli. Pa słovach Alaksandra, vynik jaho nie zadavoliŭ ni funkcyjanalna, ni estetyčna.

— Mnie abiacali pryhožuju ŭśmiešku, ale karonki dahetul vyhladajuć nienaturalna. Lekar skazaŭ, što nie moža zrabić lepš, bo vypadak składany. Ale pra heta treba było kazać da lačeńnia, a nie paśla taho, jak mnie abtočyli ŭsie zuby.

Viarnuŭšysia ŭ Polšču, jon źviarnuŭsia ŭ niekalki klinik, kab atrymać niezaležnaje mierkavańnie.

— Usie prychodziać prykładna da adnaho i taho ž. Kažuć, što pad karonkami pakinuli zapalenyja ŭčastki — kisty abo hranulomy. Akramia taho, niedzie karonki ŭstalavanyja niaščylna. Jość navat impłant, jaki staić pad dziŭnym vuhłom. Lekary prosta ŭ šoku ad takoha padychodu da lačeńnia.

Pajšli ŭsie źbieražeńni za try hady

Spačatku Alaksandr raźličvaŭ patracić kala 4—5 tys. jeŭra, adnak u vyniku suma lačeńnia ŭ Turcyi pieravysiła 6 tys. — biez uliku pieralotaŭ i pražyvańnia. Na heta pajšli amal usie jaho źbieražeńni za try hady pracy.

Kali jon dasłaŭ u tureckuju kliniku zaklučeńni polskich lekaraŭ, adkaz byŭ, pa jaho słovach, pradkazalnym: jamu prapanavali znoŭ pryjechać, ale biez harantyj, što pierarableńnie budzie biaspłatnym.

— Ja pačaŭ vyvučać, jak možna vyrašyć pytańnie jurydyčna. Kansultavaŭsia ź jurystami, daviedvaŭsia pra sudy ŭ Turcyi. Pracesy mohuć ciahnucca hadami, i rašeńni časta prymajucca nie na karyść zamiežnikaŭ. Navat kali vyjhraješ, kampiensujuć tolki častku škody — biez uliku pieralotaŭ, pražyvańnia i pasłuh advakataŭ.

Pa jaho słovach, pasłuhi advakata kaštujuć ad 1500—1700 jeŭra na starcie, i dalej vydatki tolki pavialičvajucca.

Alaksandr źviarnuŭsia ŭ niekalki polskich klinik za raźlikam vydatkaŭ na lačeńnie. Jany vielmi adroźnivajucca — ad niekalkich dziasiatkaŭ tysiač złotych da 172 tys. u adnoj z klinik (mužčyna pradstaviŭ redakcyi MOST miedycynskuju dakumientacyju). Alaksandr aryjentujecca bolš čym na 100 tys. złotych (25 tysiač jeŭra). Pry hetym dachod u biełarusa nievialiki: jaho ledź chapaje na arendu žylla i bazavyja vydatki.

Alaksandr kaža, što sprabavaŭ źviarnucca ŭ roznyja fondy, kab adkryć zbor srodkaŭ, ale atrymaŭ admovy. Tamu jon raspaviadaje pra zbor u siabie ŭ Facebook.

«Klinika nasamreč jak byccam nie isnuje»

Sprabujučy razabracca ŭ situacyi, Alaksandr pačaŭ samastojna šukać infarmacyju pra kliniku.

Pa jaho słovach, jon vyśvietliŭ, što jana mahła pracavać nie zusim lehalna. Jon publikavaŭ svaju historyju na tureckich internet-placoŭkach, ukazvaŭ nazvu kliniki i spasyłki na jaje staronki ŭ sacyjalnych sietkach — tak jamu ŭdałosia znajści dadatkovyja kantakty.

U niejki momant jon vyjšaŭ na budynak, dzie prachodziła lačeńnie, adnak tam jamu paviedamili, što da hetaj kliniki nie majuć pramoha dačynieńnia.

— Tady ŭ mianie skłałasia ŭražańnie, što heta moža być machlarskaja schiema. Jany aktyŭna rekłamujucca, publikujuć pryhožyja roliki i vodhuki, ale pry hetym nie zaŭsiody majuć dazvoł na miedycynski turyzm.

Alaksandr śćviardžaje, što ŭ kliniki nie było ŭłasnaha pamiaškańnia — jana arandavała kabiniet u inšym miedycynskim centry i pracavała pad inšaj nazvaj.

— Ja źviarnuŭ uvahu, što nas, zamiežnych pacyjentaŭ, prymali na nižnim paviersie, nie navidavoku. A miascovyja lačylisia na pieršym paviersie, dzie vokny vychodziać na vulicu. Ciapier hetaj kliniki tam užo niama — jany źjechali.

Klinika pačała pahražać sudom

Znajści lekara, jaki pravodziŭ lačeńnie, Alaksandru taksama nie ŭdałosia: toj, pa jaho słovach, pierajšoŭ u inšuju kliniku i pierastaŭ vychodzić na suviaź.

— Ja sprabavaŭ źviazacca ź im praz novaje miesca pracy, ale nie ŭpeŭnieny, što jamu ŭvohule pieradali infarmacyju. Jany, chutčej, padtrymlivajuć adzin adnaho.

Akramia taho, kali ŭ klinicy daviedalisia, što były pacyjent raspaŭsiudžvaje svaju historyju — biełarusu pačali pahražać sudom.

— Kazali, što ja paklopničaju i psuju reputacyju. Ale ja prosta raspaviadaju, što sa mnoj adbyłosia.

«Mnohaje ja daviedaŭsia ad byłoj supracoŭnicy»

Častku infarmacyi pra pracu kliniki Alaksandr atrymaŭ ad jaje byłoj supracoŭnicy. Tak jon daviedaŭsia, što klinika, u jakoj jon lačyŭsia, mahła pracavać pad inšaj nazvaj i nie mieć ułasnaha pamiaškańnia.

— U ich šmat staronak u Facebook na roznych movach — na tureckaj, anhielskaj, ruskaj, arabskaj. Jany sprabujuć achapić roznuju aŭdytoryju i pryciahvajuć ludziej pryhožymi rolikami i, jak mnie zdajecca, padmanlivaj infarmacyjaj.

Pry hetym Alaksandr padkreślivaje: vonkava vynik lačeńnia moža vyhladać lepš, čym było spačatku, ale heta nie adlustroŭvaje realnaha stanu.

— Ja vybiraŭ darahija materyjały — dyjaksid cyrkoniju, chacieŭ dobruju ŭśmiešku i ŭkłaŭ u heta ŭsie svaje hrošy. Tamu na fota heta moža vyhladać niabłaha. Ale faktyčna heta tolki vonkavy efiekt, a prablemy zastalisia.

«Abaranić svaje pravy budzie vielmi składana»

Atrymaŭšy taki vopyt, Alaksandr zrabiŭ dla siabie niekalki vysnoŭ.

— Nie varta daviarać vodhukam u internecie. Ich mohuć pisać adrazu paśla lačeńnia, kali jašče nie vidać nastupstvaŭ. Ludzi publikujuć pryhožyja fatahrafii i videa, ale nieviadoma, jak situacyja budzie raźvivacca z časam.

Jon raić zahadzia praviarać reputacyju lekaraŭ, udakładniać, jakija dakumienty jość u kliniki, jakoje abstalavańnie vykarystoŭvajecca, i abaviazkova patrabavać damovu.

— I važna razumieć: kali niešta pojdzie nie tak, abaranić svaje pravy budzie vielmi składana, — reziumuje surazmoŭca.

• 0
• 1
• 2
• 7
• 2
• 6
• 0
• 0