Doŭhažychary ŭ jasnym rozumie. Voś chto moža viedać sakret baraćby z chvarobaj Alchiejmiera
Doŭhažycharstva — zahadkavaja źjava, i vučonyja daŭno daśledujuć sakrety tych, chto viedaje, jak žyć šmat. Ciapier da hetych sakretaŭ dadaŭsia jašče adzin: tyja, chto dažyvaje da sta hadoŭ, niejkim čynam paźbiahajuć simptomaŭ chvaroby Alchiejmiera, chacia i majuć u mazhu ŭsie jaje nieŭrałahičnyja prykmiety.
Daśledčyki miarkujuć, što takija ludzi mohuć być klučom da pieramohi nad chvarobaj Alchiejmiera. Ciapier hrupa navukoŭcaŭ z Hiermanii i Niderłandaŭ sprabuje vyśvietlić, što ž dapamahaje im nie stracić jasny rozum, i, mahčyma, stvaryć na asnovie svaich znachodak novaje lačeńnie ad demiencyi, piša The Times.
Adna z takich navukoŭcaŭ — doktar Chien Cholstehie, nieŭrołah z Amsterdamskaha ŭniviersiteta, jakaja za apošnija dzieviać hadoŭ vyvučyła sotni doŭhažycharoŭ, što znachodziacca ŭ absalutna ćviarozym rozumie.
Niadaŭna daśledčyca apublikavała pracu, dzie raspaviała pra nazirańnie na praciahu 19 miesiacaŭ za 340 hałandcami, jakim bolš za 100 hadoŭ. Cholstehie nie zdoleła zafiksavać u doŭhažycharoŭ źnižeńnie asnoŭnych kahnityŭnych zdolnaściej, jana zaśviedčyła tolki nievialikaje paharšeńnie pamiaci. Udzielniki pracy zhadzilisia achviaravać svoj mozh dla daśledavańniaŭ paśla śmierci, i ŭskryćcio pakazała, što šmat u kaho z doŭhažycharoŭ u mazhu prysutničali blaški i kłubki, jakija źjaŭlajucca vyraznaj prykmietaj chvaroby Alchiejmiera.
Čamu ž tady hetyja ludzi byli pry pamiaci? Niekatoryja navukoŭcy ličać, što ich vyratavała zvyčka vieści zdarovy ład žyćcia, inšyja źviazvajuć taki dobry stan rozumu z hienami.
Chvaroba Alchiejmiera charaktaryzujecca nazapašvańniem u mazhu anamalnych białkoŭ, i vučonyja miarkujuć, što hieny doŭhažycharoŭ mohuć abaraniać ich ad praźmiernaj reakcyi imunitetu na hetyja białki. Časta, jak razumiejuć navukoŭcy, nieŭrałahičnyja paškodžańni pry chvarobie Alchiejmiera vyklikanyja zanadta mocnaj reakcyjaj imunitetu na śpiecyfičnyja białki. Praz takuju reakcyju ŭźnikaje mocnaje chraničnaje zapaleńnie, jakoje zabivaje žyćciova važnyja kletki mozha.
Akramia hetaha, jość mierkavańnie, što ŭ mazhu stahadovych ŭtvarajucca mienš taksičnyja amiłoidnyja blaški, čym u mazhu maładziejšych ludziej, jakija majuć chvarobu Alchiejmiera. Chien Cholstehie ciapier daśleduje hieny doŭhažycharoŭ, kab zrazumieć, ci mohuć jany stać klučom da stvareńnia revalucyjnaha lačeńnia demiencyi.
Ale ž nie ŭsie vierać u siłu hienaŭ. Tara Spajrz-Džons, daśledčyca nieŭradehienieracyi ź Instytuta vyvučeńnia demiencyi va ŭniviersitecie Edynburha, ličyć, što ad chvaroby Alchiejmiera lepš za ŭsio ratuje intelektualnaja ŭstojlivaść. Hetaje paniaćcie ŭklučaje ŭ siabie adukacyju, pastajannuju nahruzku dla mozha i rehularnyja fizičnyja praktykavańni. U vyniku, jak ličyć Spajrz-Džons, čałaviek buduje ŭ mazhu bolš sinaptyčnych suviaziej i lepšuju niejronnuju sietku, što moža dapamahčy jamu daŭžej zachoŭvać intelektualnyja zdolnaści.
Kamientary