Fejkavy skrynšot? Jak adna detal z rasśledavańnia pasadki Ryanair stavić pad sumnieŭ viersiju aficyjnaha Minska

Zhodna ź infarmacyjaj Departamienta pa avijacyi Biełarusi, pieršaje paviedamleńnie ab pahrozie vybuchu na borcie było atrymanaje 23 maja 2021 hoda ŭ 12:25 na elektronnuju poštu [email protected].

Druhoje paviedamleńnie na poštu minskaha aeraporta, pa ich słovach, pryjšło ŭ 12:56, kali rejs Ryanair FR4978 užo pačaŭ źnižeńnie dla pasadki ŭ Minsku.

Adnak rasśledavańnie pakazała inšuju karcinku. Z paštovaha adrasa, jaki nibyta skarystaŭ «Chamas», u toj dzień było adpraŭlena šeść paviedamleńniaŭ. Čatyry amal adnačasova — u aeraporty Vilni (12:25), Afin (12:26), Safii (12:27) i Bucharesta (12:28). U 12:34 taki list pryjšoŭ na imejł aeraporta ŭ Kijevie.

Adpraŭka lista ŭ aeraport Minska zafiksavanaja tolki ŭ 12:56 — amal praz paŭhadziny paśla taho, jak dyśpietčar pieradaŭ bortu paviedamleńnie ab mahčymaj pahrozie (dyśpietčar paviedamiŭ pra heta ekipažu ŭ 12:30).

Što da pieršaha lista, jaki nibyta atrymlivaŭ minski aeraport, to adzinaje dakumientalnaje śviedčańnie jaho isnavańnia — skrynšot, pieradadzieny Departamientam pa aviacyi. Inšyja źviestki ŭ elektronnaj pošcie aeraporta «nie zachavalisia».

Treba adznačyć, što pakolki adpraŭščyki karystalisia abaronienaj poštaj Protonmail, to rasśledavalniki nie mahli bačyć źmiest paviedamleńniaŭ — tolki čas, u jaki jany dasyłalisia na toj ci inšy adras. I nijakaha lista ŭ 12:25 zafiksavana nie było.

Pavialičyć

Mahčyma, infarmacyju pra bombu Minsk atrymaŭ pa telefonie ad kaleh ź inšych aeraportaŭ? Adnak Departamient pa avijacyi admoviŭsia pieradać dla rasśledavańnia telefonnyja razmovy pamiž rabotnikami aeraporta ŭ toj dzień. Jany spasłalisia na artykuł 28 Kanstytucyi, jakaja harantuje nieŭmiašańnie ŭ asabistaje žyćcio i zachoŭvaje tajnu karespandencyi, telefonnych i inšych paviedamleńniaŭ.

Ulikovy zapis karystalnika, ź jakoha razasłali tyja listy, byŭ stvorany 14 maja 2021 hoda i apošni raz vykarystoŭvaŭsia 25 maja taho ž hoda.

Dyśpietčar paviedamiŭ rasśledavalnikam, što nieŭzabavie paśla taho, jak jon zastupiŭ na dziažurstva i hienieralny dyrektar «Biełaeranavihacyi» ŭ supravadžeńni nieŭstanoŭlenaj asoby ŭvajšoŭ u pracoŭnaje pamiaškańnie punkta kiravańnia pavietranym sudnam, abmiarkoŭvałasia pytańnie ab najaŭnaści bomby na borcie Ryanair i havaryłasia, što samalot pavinien pryziamlicca ŭ aeraporcie Minska.

Hetyja abmierkavańni mieli miesca prykładna ŭ 10:10 — heta značyć, da vyletu rejsu z Afin.

Nieŭstanoŭlenaja asoba — mierkavana, supracoŭnik KDB. 

Što da samalota MiH-29, to jon byŭ padniaty ŭ pavietra ŭ 13:04, i ŭ 13:09 zrabiŭ pasadku. U pavietry jon znachodziŭsia na adlehłaści 55 km ad samalota. Adnak nijakaj kamunikacyi pamiž piłotam źniščalnika i Ryanair nie było. Rasśledavańnie pryjšło da vysnovy, što MiH-29 niepasredna nie datyčny da pasadki borta z Pratasievičam.

• 126
• 0
• 16
• 35
• 7
• 5
• 18
• 0