U sudzie Leninskaha rajona Minska 2 vieraśnia pačaŭsia razhlad kryminalnaj spravy palitźniavolenaha siabra BSDP z Barysava Ihara Lednika. Vieterana partyjnaha ruchu abvinavačvajuć u paklopie na prezidenta (č.2 art. 367 Kryminalnaha kodeksa), paviedamla «Viasna».
Spravu razhladaje sudździa Taćciana Šocik.
Ihar Lednik byŭ zatrymany 18 krasavika 2022 hoda. Napačatku jamu prysudzili 15 sutak administracyjnaha aryštu, ale paśla ich jon na volu nie vyjšaŭ — byŭ źmieščany ŭ Śledčuju turmu № 8 u Žodzina.
61-hadovy Ihar Lednik maje invalidnaść 2-j hrupy praz prablemy z sercam. U červieni 2022 h. advakatka paviedamiła, što stan zdaroŭja palitviaźnia pahoršyŭsia, Ihar znachodziŭsia ŭ sančastcy śledčaha izalatara ŭ lažačym stanie. U lipieni stała viadoma, što aktyvistu zrabili apieracyju na straŭnikava-kišačnym trakcie.
Zhodna z materyjałami spravy, Ihar Lednik z červienia pa śniežań 2020 hoda pradstaviŭ dla publikacyi ŭ adzin z časopisaŭ artykuł z zahałoŭkam «Mižnarodna pryznany niejtralitet Biełarusi — harantyja biaśpieki ŭ rehijonie ABSIE».
Nazvany materyjał apublikavany ŭ drukavanym vydańni «Pazicyja» 28 śniežnia 2020 hoda, a 7 červienia 2021 hoda raźmieščany na jaho sajcie ŭ sietcy Internet. U im, pavodle abvinavačvańnia, utrymlivalisia zahadzia iłžyvyja źviestki, jakija hańbiać i źnievažajuć honar dy hodnaść Łukašenki.
18 lipienia 2022 h. sud Barysaŭskaha rajona pryznaŭ infarmacyjnuju pradukcyju Facebook-staronki Ihara Lednika «ekstremisckimi materyjałami».
Častka 2 art. 367 Kryminalnaha kodeksa (dziejańnie, ździejśnienaje asobaj, jakaja raniej była asudžana za paklop ci abrazu, albo złučanaje z abvinavačvańniem u ździajśnieńni ciažkaha ci asabliva ciažkaha złačynstva) — bolš surovaja i praduhledžvaje abmiežavańnie voli na termin da piaci hadoŭ abo pazbaŭleńnie voli na termin da šaści hadoŭ.
Abvinavačańnie ŭ chodzie sudovaha pracesu zaprasiła dla Ihara Lednika pazbaŭleńnia voli terminam na try hady ŭ kałonii ahulnaha režymu.
Vyniasieńnie prysudu adbudziecca 6 vieraśnia ŭ 10:30 u sudzie Leninskaha rajona Minska.
Zahinuŭ biełaruski dobraachvotnik Vasil «Dzir» Rapicki11
Kamientary