Chto trapiŭ u iranskuju škołu pa susiedstvie z bazaj KVIR? Voś što pra trahiedyju kažuć ekśpierty
Udar pa škole staŭ samym kryvavym vypadkam hibieli cyvilnaha nasielnictva z pačatku vajennych dziejańniaŭ Złučanych Štataŭ i Izraila suprać Irana. Na hety momant nivodzin z bakoŭ aficyjna nie ŭziaŭ na siabie adkaznaść za toje, što adbyłosia.
Pačatkovaja škoła dla dziaŭčynak «Šadžare Tajiebie» (Shajareh Tayyebeh) znachodzicca ŭ nievialikim paŭdniovym horadzie Minab, bolš čym za 965 kiłamietraŭ ad Tehierana, ale niepadalok ad žyćciova važnaha vodnaha šlachu — Armuzskaha praliva. Pakolki subota ŭ Iranie źjaŭlajecca pačatkam pracoŭnaha tydnia, dzieci i nastaŭniki ŭ momant udaru znachodzilisia na zaniatkach.
Pieršyja paviedamleńni pra ŭdary źjavilisia ŭ sacyjalnych sietkach 28 lutaha paśla 11:30 pa miascovym časie. Na adnym ź videa, hieałakavanym ekśpiertami, bačnyja vialikija słupy dymu, što ŭzdymajucca z rajona bazy i škoły.
Fatahrafii, jakija śviedčać pra surjoznyja razbureńni budynka škoły, byli apublikavanyja iranskaj pravaabarončaj hrupaj nieŭzabavie paśla zdareńnia.
Jak piša The New York Times, analiz spadarožnikavych zdymkaŭ Planet Labs, videa vidavočcaŭ i publikacyj u sacyjalnych sietkach pakazvaje, što budynak škoły byŭ razburany vysokadakładnym udaram, jaki adbyŭsia adnačasova z atakaj na raźmieščanuju pobač vajskova-marskuju bazu Korpusa vartavych isłamskaj revalucyi (KVIR).
Vydańnie adznačaje, što, pavodle aficyjnych zajaŭ, amierykanskija siły ŭ toj dzień pravodzili apieracyi ŭ rajonie Armuzskaha praliva, dzie znachodzicca hetaja baza. Heta dazvalaje vykazać zdahadku, što mienavita jany, chutčej za ŭsio, nanieśli hety ŭdar.
Na spadarožnikavych zdymkach vidać, što niekalki ŭdaraŭ pryjšlisia jak minimum pa šaści budynkach KVIR, a taksama pa škole. Čatyry budynki na terytoryi vajskova-marskoj bazy byli całkam razburanyja, a na dvuch inšych bačnyja punkty traplańnia ŭ centry dachaŭ — paškodžańni, charakternyja dla vysokadakładnych udaraŭ.
Analiz ekśpiertaŭ
Ues Dž. Brajant, analityk pa pytańniach nacyjanalnaj biaśpieki, jaki słužyŭ u Vajskova-pavietranych siłach ZŠA i byŭ staršym savietnikam pa pytańniach škody cyvilnamu nasielnictvu ŭ Pientahonie, vyvučyŭ novyja spadarožnikavyja zdymki i pryjšoŭ da vysnovy, što ŭsie budynki, uklučajučy škołu, parazili «idealna dakładnymi» kropkavymi ŭdarami.
Padobnaje mierkavańnie vykazaŭ i N. R. Dženzien-Džons. Jon źjaŭlajecca dyrektaram daśledčaj kampanii Armament Research Services, jakaja śpiecyjalizujecca na vyvučeńni bojeprypasaŭ. Da jaho pa kamientar źviarnułasia ahienctva Reuters.
«U sukupnaści spadarožnikavyja zdymki i dastupnyja videa śviedčać, što škoła i susiedni kompleks KVIR parazili niekalkimi adnačasovymi abo amal adnačasovymi ŭdarami vybuchovych bojeprypasaŭ, chutčej za ŭsio avijacyjnaha typu», — paviedamiŭ ekśpiert.
Pavodle słoŭ Uesa Dž. Brajanta, najbolš vierahodnym tłumačeńniem źjaŭlajecca
«pamyłkovaja identyfikacyja celi» — heta značyć, siły, jakija nanosili ŭdar, mahli atakavać abjekt, nie ŭśviedamlajučy, što ŭnutry znachodzicca vialikaja kolkaść mirnych žycharoŭ.
Satellite imagery shows the Shajareh Tayyebeh girls' school in Minab, southern Iran, before and after it was hit in a strike during a joint offensive by the United States and Israel on February 28.
Iranian officials say as many as 175 people were killed. Neither the U.S. nor… pic.twitter.com/vveKwp5gIx
Hienierał Den Kiejn, staršynia Abjadnanaha kamiteta načalnikaŭ štaboŭ ZŠA, zajaviŭ na pres-kanfierencyi ŭ sieradu, što amierykanskija siły ŭ toj čas nanosili ŭdary ŭzdoŭž paŭdniovaha ŭźbiarežža Irana. Pradstaŭlenaja im karta pakazvała, što rajon, jaki ŭklučaje Minab, staŭ adnoj z celaŭ atak u pieršyja 100 hadzin apieracyi, choć sam horad na joj nie byŭ nazvany niepasredna.
Pavodle spadarožnikavych zdymkaŭ 2013 hoda, vyvučanych The New York Times, škoła kaliści była častkaj vajskova-marskoj bazy KVIR. Darohi viali ad inšych abjektaŭ bazy da budynka škoły, pa jakim u subotu byŭ naniesieny ŭdar. Adnak na zdymkach vieraśnia 2016 hoda vidać, što hety ž budynak byŭ adharodžany i bolš nie złučaŭsia z bazaj.
Na ahulnadastupnych histaryčnych spadarožnikavych zdymkach bačna, što budynak maje ŭsie prykmiety škoły, uklučajučy spartyŭnuju placoŭku i inšyja rekreacyjnyja zony, jakija dadavalisia ź ciaham času.
«Uličvajučy raźviedvalnyja mahčymaści ZŠA, jany pavinny byli viedać, što pablizu znachodzicca škoła», — cytuje The New York Times byłuju supracoŭnicu Dziaržaŭnaha departamienta ZŠA Bet Van Šaak, jakaja vykładaje ŭ Centry pa pravach čałavieka i mižnarodnym pravasudździ Stenfardskaha ŭniviersiteta.
Na zapyt The New York Times Bieły dom pieraadrasavaŭ žurnalistaŭ da vykazvańniaŭ pres-sakratarki Kerałajn Levit na bryfinhu 4 sakavika. Na pytańnie, ci pravodzili Złučanyja Štaty avijaŭdar pa škole, jana adkazała:
«Nakolki nam viadoma, nie», — dadaŭšy, što «Ministerstva vajny rasśleduje hetuju spravu».
Što kažuć ZŠA i Izrail
U toj ža čas, jak paviedamlaje Reuters sa spasyłkaj na dvuch amierykanskich čynoŭnikaŭ, amierykanskija vajskovyja śledčyja ličać vierahodnym, što ŭdar moh nanieści amierykanski bok. Adnak rasśledavańnie jašče nie zavieršana, kančatkovych vysnoŭ pakul niama.
Jak paviedamili ahienctvu vysokapastaŭleny izrailski čynoŭnik i krynica, znajomaja z sumiesnym płanavańniem apieracyj, da hetaha času izrailskija i amierykanskija siły raźmiarkoŭvali svaje ataki ŭ Iranie jak hieahrafična, tak i pa typach celaŭ. Pavodle ich słoŭ, Izrail nanosiŭ udary pa puskavych ustanoŭkach rakiet u zachodnim Iranie, u toj čas jak Złučanyja Štaty atakavali padobnyja abjekty, a taksama marskija celi na poŭdni krainy.
Za niekalki dzion paśla ataki amierykanskija aficyjnyja asoby nie paćvierdzili i nie abvierhli svaju datyčnaść. Ministr abarony ZŠA Pit Chiehset zajaviŭ u sieradu, što incydent rasśledujecca.
Pradstaŭnik izrailskaj armii Nadaŭ Šašani paviedamiŭ žurnalistam u niadzielu, što «na hety momant» jamu nieviadoma pra jakija-niebudź vajennyja apieracyi Izraila «ŭ hetym rajonie» ŭ toj čas.
Čamu składana vyśvietlić praŭdu
Vyśviatleńniu dakładnych abstavin zdareńnia pieraškadžaje adsutnaść bačnych abłomkaŭ uzbrajeńnia i niemahčymaść dla zamiežnych žurnalistaŭ trapić na miesca padziej.
Ahulnaja kolkaść zahinułych pakul nie paćvierdžanaja niezaležnymi krynicami. Iranskija aficyjnyja asoby ŭ śfiery achovy zdaroŭja i dziaržaŭnyja ŚMI paviedamili, što ŭ vyniku ŭdaru pa pačatkovaj škole zahinuli jak minimum 175 čałaviek, mnohija ź jakich — dzieci. Adnak heta kolkaść nijak nie moža być pravieranaja.
U internecie raspaŭsiudžvalisia viersii pra toje, što za ŭdar pa škole adkaznaja iranskaja rakieta, jakaja źbiłasia z kursu. Adnak The New York Times i inšyja analityki pastavili pad sumnieŭ hetu viersiju. Siarod inšaha jany adznačyli, što adna niaspraŭnaja rakieta naŭrad ci mahła b vyklikać nastolki dakładnyja i kropkavyja paškodžańni adrazu niekalkich budynkaŭ na terytoryi vajskova-marskoj bazy.
Aficyjnyja asoby ZŠA zajaŭlajuć, što rasśledavańnie incydentu praciahvajecca. Kali budzie paćvierdžana, što pa škole trapiŭ mienavita amierykanski bojeprypas, hałoŭnym pytańniem stanie toje, byŭ hety ŭdar vynikam pamyłki, ci cel była abranaja na padstavie sastarełych raźviedvalnych danych.
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku16
Kamientary