Łukašenka: Ja chaču zrabić tak, kab Biełaruś stała jeŭrapiejskaj krainaj

«Ja chaču tak zrabić, kab skazali, što za Łukašenkam Biełaruś stała jeŭrapiejskaj krainaj», — zajaviŭ 2 kastryčnika na pres‑kanfierencyi dla rasijskich rehijanalnych ŚMI ŭ Minsku Alaksandr Łukašenka.

«U mianie i va ŭrada skłałasia dumka, što my možam žyć nie horš, čym u Jeŭropie. My nie horš za ich, — skazaŭ kiraŭnik dziaržavy. — Heta razumieje narod. Kali ŭ nas niešta atrymlivajecca, my ŭsio robim z padvojnaj siłaj».

Na dumku Łukašenki, dziela hetaha nieabchodna «iści razam z kalehami napierad, ludzi pavinny heta bačyć, my pastajanna pavinny dumać zrabić lepiej, čym u Jeŭropie, čym u śviecie».

Łukašenka jašče raz padkreśliŭ, što ideałohija krainy — mocnaja i kvitniejučaja Biełaruś.

«I my budujem jaje na tym ža ŭzroŭni, jak pieradavyja jeŭrapiejskija krainy, — skazaŭ Łukašenka. — Heta treba rabić, choć heta i ciažka».

* * *

Łukašenka pierad rasijskimi žurnalistami vilaŭ u adkaz na pytańnie, čamu Biełaruś nie pryznała niezaležnaści zaniatych rasijskimi vojskami rehijonaŭ Hruzii.

Rasija sama vinavata ŭ tym, što Biełaruś dahetul nie pryznała niezaležnaść Abchazii i Paŭdniovaj Asiecii, zajaviŭ Łukašenka.

Łukašenka padkreśliŭ, što ŭ Biełarusi «cudoŭnyja adnosiny» z hetymi respublikami. «Ja ŭžo šmat razoŭ pra heta kazaŭ, što ŭ Abchazii ja — dobry čałaviek vielmi dla ich. Dahetul dobryja adnosiny składvalisia z Abchazijaj. Z Paŭdniovaj Asiecijaj u nas kantaktaŭ było vielmi mała, ale, kali heta niaščaście adbyłosia, ja pasłaŭ tudy hrupu ludziej z humanitarnaj dapamohaj, deputaty našy tudy jeździli», — skazaŭ kiraŭnik dziaržavy.

Pavodle jaho słoŭ, kali paŭstała pytańnie ab pryznańni dźviuch respublik, jon chacieŭ vyvučyć, jakaja situacyja i što tam adbyłosia. «My adnaznačna zaniali pazicyju Rasijskaj Fiederacyi, padtrymaŭšy na ŭsich uzroŭniach. Ale pryznańnie ž — surjozny akt. Usie respubliki SND kateharyčna admovilisia pryznavać, — skazaŭ Łukašenka. — Pa vialikim rachunku, my daŭno pavinny byli pryznać Abchaziju i Paŭdniovuju Asieciju — nie maje značeńnia, što tam adbyłosia, — tym samym padtrymaŭšy našaha sajuźnika. Na žal, sam sajuźnik vinavaty ŭ tym, što my dahetul nie vyrašyli hetaje pytańnie».

Jak zaznačyŭ Łukašenka, ES i ZŠA byli prainfarmavanyja ab tym, što Biełaruś budzie «iści da pryznańnia hetych respublik».

«Ale kamuści ŭ Rasii vielmi chaciełasia abo nas «nachilić» chutčej, abo, moža, naohuł nie chaciełasia, kab my pryznavali hetyja respubliki, — zajaviŭ jon.

— Pačali nas centralnyja ŚMI, jaŭna padkantrolnyja dziaržaŭnym čynoŭnikam, prosta travić, što nie pryznaje, tamu što 500 młn. dalaraŭ nie dali. Nibyta ja za hrošy pavinien pryznavać hetyja respubliki. Nu i pajšła hetaja chvala ŭ toj momant, kali my pavinny byli pryznać. Heta pryznali vašy kiraŭniki. Tamu ja skazaŭ: «Stop, chłopcy, u hetaj situacyi tak nie budzie». Ja pra heta niadaŭna skazaŭ adnamu i druhomu (Dźmitryju Miadźviedzievu i Uładzimiru Pucinu): «Chłopcy, vy sami stvaryli takuju situacyju, tamu ciarpicie». Heta vielmi balučaje pytańnie, ale, dumaju, raźbiaromsia».

* * *

Łukašenka raskrytykavaŭ budaŭnictva Rasijaj hazapravoda Nord Strieam.

«Nie padabajucca maršruty pa Biełarusi pa pastaŭkach nafty i hazu. Ubuchali tudy da 25 młrd. dalaraŭ — budujuć Nord Strieam», — skazaŭ kiraŭnik dziaržavy.

Łukašenka adznačyŭ, što pry budaŭnictvie hazapravoda «Jamał — Jeŭropa» «prakłali infrastrukturu ad padmurka da elektrazabieśpiačeńnia, suviazi i hetak dalej pad inšuju trubu». «Kładzicie. Navošta vy leziecie ŭ Prybałtyku? …Nie, chočam być niezaležnymi. Ad kaho? Ad svaich ludziej, ad svajoj krainy. Jakaja ž tady sajuznaja dziaržava? I čym vinavaty Łukašenka, kali razvalvajecca cajuznaja dziaržava, kali my razburajem ekanamičnyja asnovy našaha adzinstva», — zajaviŭ prezident.

* * *

Apošnija biełaruska‑rasijskija vajennyja vučeńni pakazali, z kim Biełaruś, zajaviŭ Łukašenka.

Kali b Biełaruś «razyšłasia» z Rasijaj u takoj «samaj adčuvalnaj» śfiery, jak vajennaje supracoŭnictva, «to my b hetyja vučeńni ŭ takim płanie nie praviali», padkreśliŭ kiraŭnik dziaržavy.

Vučeńni, miarkuje jon, śviedčać pra toje, «što my sapraŭdy adzinaja dziaržava, kali ŭ hetym adčuvalnym pytańni faktyčna dziejničajem jak adna dziaržava».

Pavodle słoŭ Łukašenki, jašče «ź jelcynskich časoŭ» prezidenty Biełarusi i Rasii «raz piać» padychodzili da praviadzieńnia sumiesnych vučeńniaŭ. «Ale prezidenty Rasii ź niejkimi dryžykami ŭsprymali hetyja pytańni i prapanovy», — dadaŭ jon. Zaraz kiraŭnik rasijskaj dziaržavy pryjechaŭ na vučeńni i «byŭ zachopleny tym, što ŭbačyŭ», skazaŭ Łukašenka.

Pavodle jaho słoŭ, vučeńni mieli «maštabny» charaktar i achapili «vializny rehijon»: akvatoryju Bałtyjskaha mora, rehijanalnuju hrupoŭku sajuznaj dziaržavy, asnovu jakoj składaje biełaruskaja armija, a taksama rasijskija voinskija farmiravańni na zachadzie Rasii i rakietny palihon u Ašułuku (Astrachanskaja vobłaść), dzie pravodzilisia puski rakiet vojskaŭ SPA.

* * *

«Ja — zaŭziaty praciŭnik ilhot», — zajaviŭ kiraŭnik dziaržavy 2 kastryčnika na pres‑kanfierencyi dla rasijskich žurnalistaŭ u Minsku. Pra heta, pavodle słoŭ Alaksandra Łukašenki, jon adkryta zajaŭlaŭ vybarščykam padčas prezidenckich kampanij.

Z druhoha boku, adznačyŭ kiraŭnik dziaržavy, jon padtrymlivaje lhoty dla vieteranaŭ vajny: «My ich padtrymlivajem, hrošy dajem, kab było što vypić i zakusić».

Pavodle słoŭ Łukašenki, ilhoty majuć i «čarnobylcy». «Paśla katastrofy ŭ nas «čarnobylcami» stała ledź nie pałova nasielnictva, i ŭsim pavypisvali paśviedčańni. Tamu my ŭsio heta ŭparadkavali. Była masa vypłat pa 3, 10, 15 dołaraŭ, — adznačyŭ prezident. — Ale jość ža sapraŭdnyja paciarpiełyja, ich tysiačy. My spynili hetyja drobnyja vypłaty, nieabhruntavanyja lhoty».

Na hetyja hrošy, paviedamiŭ prezident, pabudavany navukova‑praktyčny reabilitacyjny centr u Homieli. «Hety centr źbiraje tearetykaŭ i praktykaŭ, tam prachodziać lačeńnie i rasijanie, i ŭkraincy. Jany hatovy płacić za heta lubyja hrošy. Akramia hetaha, na zekanomlenyja srodki byli pabudavany darohi i hazifikavana ŭsia čarnobylskaja zona», — zajaviŭ Łukašenka.

Pavodle jaho słoŭ, 700 młrd. rubloŭ było nakiravana ŭ čarnobylski rehijon. U vyniku ŭparadkavańnia lhot vyzvaliłasia 160 młrd. rubloŭ. «My nie pazbavili ludziej hetych vypłat, my ich skancentravali, i nam udałosia hazifikavać rehijon i dać ludziam ciapło», — padkreśliŭ Łukašenka.

BiełaPAN

• 0
• 0
• 0
• 0
• 0
• 0
• 0
• 0