Byŭ delehatam UNS, dačka vučycca ŭ Hiermanii. 5 faktaŭ pra novaha kamandujučaha Vajskova-pavietranymi siłami i vojskami SPA
Siońnia Łukašenka pryznačyŭ Andreja Łukjanoviča kamandujučym Vajskova-pavietranymi siłami i vojskami supraćpavietranaj abarony Uzbrojenych Sił. Raniej Łukjanovič zajmaŭ pasadu načalnika avijacyi. Što viadoma pra hetaha pałkoŭnika?
Ros biez baćki
Andreju Łukjanoviču 52 hady, jon rodam sa Smarhoni. U adnym z intervju jon raspaviadaŭ, što jaho baćka rana pamior, tamu Łukjanoviča vychoŭvała tolki maci. U 1992 hodzie jon skončyŭ rasijskaje Bałašoŭskaje vyšejšaje vajskovaje avijacyjnaje vučylišča.
«Padkazali, što jość takoje vučylišča — adno z najlepšych. Konkurs byŭ vializny, pastupiŭ z druhoha razu. Kali pastupiŭ, amal na ŭsie hrošy, što byli, dasłaŭ telehramu. Usie paryvy svajoj dušy pradyktavaŭ — ź vializnaj padziakaj mamie… Znakavaja padzieja», — zhadvaŭ jon.
Taksama Łukjanovič raspaviadaŭ, što jaho maci — vielmi žyćciaradasny čałaviek.
«Skažu tak: heta moj lubimy čałaviek, jaki navučyŭ mianie mnohamu. Imknusia byvać u jaje ŭ Smarhoni raz na niekalki miesiacaŭ. I, jak praviła, na vialikija śviaty my ź siostrami źbirajemsia ŭ mamy ŭsie razam», — kazaŭ vajskoviec.
Šukaŭ žonku — tolki biełarusku
Žonka Łukjanoviča Śviatłana taksama rodam sa Smarhoni. «Mnie jašče babula kazała: dźviuch radzim nie byvaje. Heta aznačała, što žonku treba brać ź Biełarusi», — pryznavaŭsia jon u hutarcy sa «Źviazdoj».
Jak sapraŭdnaja žonka aficera, Śviatłana pajechała ź im na raźmierkavańnie va Ułan-Ude i jeździła ź im usiudy, dzie b jon ni byŭ. Łukjanovič pryznavaŭsia, što žonka vielmi padobnaja da jaho maci.
Maje troch dziaciej, dačka vučycca ŭ Hiermanii
Jak pisała «Źviazda», starejšy syn Jaŭhien pajšoŭ pa śladach baćki: ros pobač z aeradromam, časta byvaŭ u vajskovych čaściach, dzie słužyŭ jaho baćka. Praŭda, pajšoŭ u hramadzianskuju avijacyju i pracuje ŭ rasijskaj avijakampanii.
Jašče ŭ Andreja Łukjanoviča — darosłaja dačka, syn-školnik. Nastaśsia vučycca ŭ Hiermanii. Kali pryjšoŭ čas pastupać, vydatnica adrazu prajšła ŭ try VNU, potym daviałosia vybirać. Mikita vučycca ŭ dziasiatym kłasie i schilny da dakładnych navuk. Taksama cikavicca samalotami, adnak stać lotčykam nie dazvolić zdaroŭje.
Źjaŭlajecca delehatam UNS
Svaju łajalnaść da dziejnaj ułady Łukjanovič vykazvaje publična. Vajskoviec źjaŭlajecca delehatam UNS, a taksama vystupaŭ za papraŭki ŭ Kanstytucyju na apošnim refierendumie.
«Ja hałasuju za pastupovaje i pastupalnaje raźvićcio dziaržavy. Ništo nie staić na miescy, usio raźvivajecca. Asnoŭny zakon našaj dziaržavy patrabuje peŭnych źmien u suviazi z abstanoŭkaj, jakaja mianiajecca, asabliva vakoł našaj krainy.
Ciapier my atrymali vielmi vyvierany, dakładny dakumient, jaki, dumaju, jość sens padtrymać dla taho, kab naša kraina raźvivałasia dalej», — cytavali dziaržaŭnyja ŚMI słovy Łukjanoviča.
Znachodzicca pad sankcyjami
Imia Andreja Łukjanoviča znachodzicca ŭ sankcyjnych śpisach Jeŭrasajuza, Vialikabrytanii, Kanady, Šviejcaryi i Ukrainy. Tudy jon patrapiŭ za ŭdzieł u sumiesnych vajskovych vučeńniach Rasii i Biełarusi pierad napadam na Ukrainu 24 lutaha.
«Uvachodzić u skład biełaruskaha vojska, jakoje padtrymała vajennuju ahresiju Rasii suprać Ukrainy. Takim čynam, jon niasie adkaznaść i aktyŭna padtrymlivaje dziejańni, jakija padryvajuć terytaryjalnuju cełasnaść, suvierenitet i niezaležnaść Ukrainy, a taksama stabilnaść i biaśpieku va Ukrainie», — udakładniajecca na sajcie ŭkrainskaj bazy sankcyj.
«Naša Niva» — bastyjon biełaruščyny
PADTRYMAĆCiapier čytajuć
Kvadrat u Minsku kaštuje rekordna doraha: narešcie pabity rekord 2007 hoda2
Kamientary
NN sprosili by, kak otnositsia k ruskomirskim priestuplenijam protiv čiełoviečnosti i vojennym ruskomirskim priestuplenijam v Ukrainie.
Chotia, niet smysła, u nich vsio ravno, to malčiki raśpiatyje, to trupy nie śviežije i privieziennyje iz Anhlii......