Prapahandysty vinavaciać Nastu Łojku ŭ «špijanažy». Voś što jany razumiejuć pad hetym słovam
20 śniežnia «Biełaruś Siehodnia» vypuściła materyjał pra «špijonskuju sietku pad vyhladam vałancioraŭ-pravaabaroncaŭ». Ź jaho stanovicca zrazumiełym, u čym mohuć abvinavacić zatrymanuju pravaabaroncu Nastu Łojka.
Prapahandystka Ludmiła Hładkaja piša, što pravaabarončaja arhanizacyja Human Constanta nibyta «źbirała infarmacyju pra biełarusaŭ i pieradavała jaje śpiecsłužbam».
«Dokazami» jana nazyvaje toje, što vałanciory arhanizacyi vučylisia i stažyravalisia za miažoj, rychtavali analityčnyja materyjały z adkrytych sudoŭ, byli naziralnikami na vybarach, zapisvali pakazańni paciarpiełych padčas zatrymańniaŭ, dziažuryli kala RUUS.
Łojku prapahandystka abvinavaciła ŭ tym, što jana kansultavała ludziej pa pravavych pytańniach, dapamahała rabić dakumienty. U vinu joj stavicca i toje, što jana davała kamientary zamiežnym žurnalistam i biełaruskim niezaležnym ŚMI.
Hładkaj nie spadabałasia toje, kamu dapamahali pravaabaroncy.
«Dyk zastupiciesia za ludziej! Za paralimpijcaŭ, jakich Zachad pazbaŭlaje spabornictvaŭ! Zastupiciesia za dziaciej ź ciažkimi zachvorvańniami, jakija nie mohuć atrymać lačeńnie ŭ našym sanatoryi ŭ Litvie! Za zmučanych biežancaŭ zastupiciesia. Tupnicie, narešcie, nahoj suprać sankcyj!» — aburajecca prapahandystka.
Pravaabarončaja arhanizacyja Human Constanta adreahavała na abvinavačvańni ŭ «špijanažy».
«Z samoha svajho zasnavańnia pravaabarončaja arhanizacyja Human Constanta ažyćciaŭlała dziejnaść vyklučna mirnaha i pravaabarončaha charaktaru. My chočam padkreślić, što takaja dziejnaść źjaŭlajecca pravamiernaj i harantavanaja pravaabaroncam Kanstytucyjaj Respubliki Biełaruś i mižnarodnymi normami ŭ halinie pravoŭ čałavieka, u tym liku Dekłaracyjaj ab pravaabaroncach, zaćvierdžanaj Hienasamblejaj AAN 9 śniežnia 1998 hoda.
U suviazi z hetym, ličym, što ŭsie abvinavačvańni, jakija pryvodziacca ŭ artykule, źjaŭlajucca nieabhruntavanymi.
My, jak i raniej, budziem praciahvać svaju pravaabarončuju dziejnaść i dalej adstojvać pravy čałavieka dla kožnaha(aj), a taksama patrabavać spynić usie sproby pieraśledu i cisku na biełaruskich pravaabaroncaŭ u suviazi z ažyćciaŭleńniem imi prafiesijnaj dziejnaści».
Nahadajem, što Nasta Łojka znachodzicca za kratami z 28 kastryčnika. Joj niekalki razoŭ prysudžali sutki.
Ciapier čytajuć
Łukašenka zahavaryŭ pra prarasijskaść Cichanoŭskaha, bajučysia nazvać jaho imia41
Kamientary
Što da akreślenych Hładkaj pytańniaŭ, to prava ŭdzielničać u paraalimpijskich spabornictvach, prava lekavacca ŭ biełaruskim sanatoryi ŭ Litvie i prava dziaržaŭ nie padviarhacca ekanamičnym sankcyjam niama va Usieahulnaj dekłaracyi pravoŭ čałavieka. To bok - hetyja rečy nie ŭvachodziać u śfieru, jakaja razhladajecca jak pravy čałavieka, i jakoj zajmajucca pravaabaroncy. Heta rečy ź inšaj śfiery dziejnaści.