Kanadskaja pravincyja Albierta praviadzie papiaredni refierendum ab niezaležnaści

Vystupajučy ŭ čaćvier na mitynhu za adzinuju Kanadu ŭ Kałhary, Karni, jaki sam naradziŭsia ŭ Albiercie, nazvaŭ momant dla takoha refierendumu nadzvyčaj niaŭdałym. Jon zaklikaŭ ziemlakoŭ pryjści na ŭčastki i vyrazna vykazacca suprać adździaleńnia.

Refierendum ab refierendumie

Pytańnie pra niezaležnaść — adno ź dziesiaci, na jakija žychary Albierty zmohuć adkazać padčas hałasavańnia. Astatnija tyčacca pieravažna paŭnamoctvaŭ miascovych uładaŭ. Vyniki refierendumu nie buduć mieć abaviazkovaj jurydyčnaj siły.

U mai hetaha hoda Daniel Śmit uklučyła pytańnie ŭ biuleteń paśla pietycyi prychilnikaŭ adździaleńnia, pad jakoj sabrali kala 300 tysiač podpisaŭ.

Adnak žycharam prapanujuć nie hałasavać za niezaležnaść niepasredna, a vykazacca, ci varta pravodzić jurydyčna abaviazkovy refierendum ab vychadzie Albierty sa składu Kanady ŭ adpaviednaści z kanstytucyjaj krainy.

Apytańni apošnich tydniaŭ pakazvajuć, što navat takuju papiaredniuju prapanovu hatovyja padtrymać tolki kala čverci žycharoŭ, a prykładna 70% vystupajuć suprać. Niahledziačy na heta, Karni zaklikaŭ prychilnikaŭ adzinstva nie rassłablacca i abaviazkova prahałasavać. Pavodle jaho słoŭ, vynik budzie zaležać ad jaŭki.

Napiaredadni hałasavańnia ŭ Albiercie prachodziać mitynhi i sustrečy z udziełam viadučych palitykaŭ pravincyi i ŭsioj krainy. U piatnicu Daniel Śmit vystupić u Kałhary na mierapryjemstvie suprać adździaleńnia razam ź lidaram apazicyjnaj Kansiervatyŭnaj partyi Pjeram Puaŭjeŭram. U subotu prychilniki niezaležnaści płanujuć pravieści mitynh u Edmantanie.

Śmit sama naležyć da kansiervataraŭ, a siarod jaje vybarščykaŭ jość i prychilniki niezaležnaści. Adnak jana vystupaje suprać vychadu z Kanady i śćviardžaje, što refierendum daje žycharam mahčymaść niepasredna vykazać svaju pazicyju.

Nafta jak arhumient za niezaležnaść

Albierta — hałoŭnaja naftahazavaja pravincyja Kanady. Na jaje prypadaje kala 80% zdabyčy nafty ŭ krainie. Syraja nafta zastajecca asnoŭnym ekspartnym tavaram Kanady: u minułym hodzie jaje prodaž za miažu prynios 142 miljardy kanadskich dalaraŭ, abo kala 100 miljardaŭ dalaraŭ ZŠA.

Pravincyja znachodzicca na zachadzie krainy i nie maje vychadu da akijana. Značnuju častku nafty pastaŭlajuć na naftapierapracoŭčyja zavody ŭ ZŠA.

Prychilniki niezaležnaści ličać, što Albierta pieradaje fiederalnamu ŭradu zanadta šmat hrošaj, a ŭzamien atrymlivaje niedastatkova. Jany taksama krytykujuć Libieralnuju partyju, jakaja kiruje Kanadaj apošnija dziesiać hadoŭ, za praźmiernuju ŭvahu da baraćby sa źmianieńniem klimatu i, na ich dumku, pieraškody dla raźvićcia naftahazavaj haliny.

Mark Karni, u adroźnieńnie ad svajho papiarednika Džaścina Trudo, abiacaje padtrymlivać naftahazavyja prajekty ŭ Albiercie. Niadaŭna jon abviaściŭ, što ŭrad paskoryć praceduru ŭzhadnieńnia budaŭnictva novaha naftapravoda, jaki złučyć pravincyju ź cichaakijanskim uźbiarežžam.

Na taki kurs u značnaj stupieni ŭpłyvajuć varožyja zajavy i dziejańni prezidenta ZŠA Donalda Trampa i jahonaj administracyi. Kanadskija ŭłady imknucca znajści mahčymaści dla ekspartu nafty, jakija dazvolili b mienš zaležać ad amierykanskaha rynku.

Upłyŭ Donalda Trampa

U Kanadzie šyroka abmiarkoŭvajuć mahčymuju rolu administracyi Trampa ŭ padtrymcy sieparatysckaha ruchu ŭ Albiercie. Ministr finansaŭ ZŠA Skot Biesient nazyvaŭ pravincyju «naturalnym partnioram» Złučanych Štataŭ.

Lidary sieparatysckaj arhanizacyi «Prajekt roskvitu Albierty» niekalki razoŭ naviedvali sustrečy ŭ Dziaržaŭnym departamiencie ZŠA. U kastryčniku kanadskaja hazieta Globe and Mail apublikavała materyjał pra kantakty kiraŭnika arhanizacyi Mitča Silviestra i jahonaj kamandy z pradstaŭnikami Respublikanskaj partyi ZŠA.

Pavialičyć

U intervju ahienctvu AFP Silviestr zajaviŭ, što pakul sieparatysty nie ŭznačalili ŭrad niezaležnaj Albierty, intaresy ZŠA dla jaho nie majuć vyrašalnaha značeńnia. Adnak u vypadku niezaležnaści jon paabiacaŭ zabiaśpiečyć svabodny handal z paŭdniovym susiedam.

Pa słovach Silviestra, Albierta nie maje varožych nastrojaŭ da Amieryki i nie bačyć pryčyn spyniać handal z najbujniejšaj ekanomikaj śvietu.

Kolki budzie kaštavać niezaležnaść

U Albiercie žyvuć kala 4,5 miljona čałaviek z amal 42 miljonaŭ žycharoŭ Kanady. Rehijanalny vałavy pradukt na dušu nasielnictva pieravyšaje 50 tysiač dalaraŭ ZŠA ŭ hod — prykładna stolki ž, kolki ŭ siarednim pa krainie.

Prychilniki niezaležnaści śćviardžajuć, što pravincyja budzie kvitnieć, kali zmoža pakidać u siabie ŭsie dachody ad prodažu nafty. Praciŭniki adździaleńnia, naadvarot, papiaredžvajuć pra značnyja dadatkovyja vydatki, jakija mohuć pieravažyć ekanamičnyja vyhady.

Zhodna z dakładam, zamoŭlenym uradam Daniel Śmit i apublikavanym u kastryčniku, niezaležnaść moža kaštavać Albiercie ad 50 da 170 miljardaŭ kanadskich dalaraŭ štohod na praciahu pieršych piaci hadoŭ. Heta ekvivalentna prykładna 35—120 miljardam dalaraŭ ZŠA. Aŭtary dakładu taksama prahnazujuć, što niavyznačanaść moža pryvieści da adtoku inviestycyj i skaračeńnia častki źniešniaha handlu.

Niezaležnaj Albiercie daviałosia b stvaryć ułasnyja dziaržaŭnyja ŭstanovy — ad padatkovaj słužby da ministerstvaŭ zamiežnych spraŭ i abarony. Akramia taho, treba było b raspracavać kanstytucyju, stvaryć sudovuju sistemu i damovicca z Kanadaj pra padzieł fiederalnaj majomaści, u tym liku nacyjanalnych parkaŭ i vajskovych baz.

Pravincyi taksama daviałosia b uziać na siabie adpaviednuju dolu dziaržaŭnaj zapazyčanaści Kanady. Pavodle raźlikaŭ aŭtaraŭ dakładu, u vyniku dachody, jakimi žychary Albierty mahli b svabodna rasparadžacca, skaracilisia b amal na 6%.

• 0
• 0
• 0
• 0
• 0
• 0
• 0
• 0