Z kamisii pa viartańni aficyjna vyklučyli svajho aryštavanaha siabra
A Hanna Kanapackaja aficyjna stała Hannaj Truchanovič.
Alaksandr Łukašenka ŭkazam № 360 ad 14 kastryčnika 2026 hoda źmianiŭ skład kamisii, jakaja razhladaje zvaroty biełarusaŭ z-za miažy — tak zvanaj «kamisii pa viartańni».
Kamisiju pa-raniejšamu ŭznačalvaje hienieralny prakuror Dźmitryj Hara. Jon zamianiŭ u hetaj roli Andreja Švieda ŭ lutym 2026 hoda, kali Švieda pieraviali kiravać Viarchoŭnym sudom.
Novym namieśnikam staršyni staŭ namieśnik hienieralnaha prakurora Hienadź Dysko.
Jon zojmie miesca, jakoje raniej naležała Alaksieju Stuku — taho adpravili na piensiju z Hienieralnaj prakuratury, a zaadno vykraślili i sa składu kamisii.
Dysko viadomy tym, što ŭ listapadzie 2020 hoda publična namahaŭ, što zabity Raman Bandarenka byŭ pjany. Heta było chłuśnioj.
Miesca ŭ kamisii dastałasia novamu kiraŭniku Biełaruskaj respublikanskaj kalehii advakataŭ Vitalu Dziemidoviču. Jon miechanična zamianiŭ svajho papiarednika z advakatury Alaksieja Švakava.
Prapaŭ sa śpisu i Uładzimir Baśko — były hienieralny dyrektar navukova-technałahičnaj asacyjacyi «Infapark» i adzin z zasnavalnikaŭ Parka vysokich technałohij. U listapadzie 2025 hoda «Naša Niva» paviedamiła pra jaho zatrymańnie, imavierna, źviazanaje sa spravaj «Softkłaba». Dalejšy los Baśko nieviadomy, dziaržaŭnyja miedyja tak ničoha i nie paviedamili pra toje, što ŭ siłavikoŭ uźnikli pytańni da jaho.
Taksama ŭkaz abnaŭlaje źviestki pra niekalkich členaŭ, jakija zastajucca ŭ kamisii.
Hannu Kanapackuju ciapier aficyjna pierajmienavali ŭ Hannu Truchanovič. Šmatrazovaja sparynh-partniorka Alaksandra Łukašenki na prezidenckich vybarach viarnuła svajo dziavočaje proźvišča.
Narešcie, jašče troje čałaviek zastalisia ŭ kamisii, ale z abnoŭlenymi pasadami — heta ŭpaŭnavažany ŭ spravach relihij i nacyjanalnaściaŭ Aleh Dziačenka, ministr kultury Marat Markaŭ i čynoŭnik z Sajuznaj dziaržavy Alaksandr Markievič.
Za ŭvieś čas dziejańnia kamisii praź jaje ŭ Biełaruś viarnułasia niekalki dziasiatkaŭ čałaviek.
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ2
Kamientary