Z 1 studzienia 2027 hoda ŭ Biełarusi pačnuć dziejničać abnoŭlenyja patrabavańni da padrychtoŭki kiroŭcaŭ i praviadzieńnia ekzamienaŭ u aŭtaškołach. Źmieny zakranuć navučalnyja aŭtamabili, tearetyčnyja zaniatki, kvalifikacyju instruktaraŭ i videafiksacyju ekzamienaŭ.
Abnoŭlenyja dziaržaŭnyja standarty STB 2191. 1‑2020 i STB 2191. 2‑2020 apublikavali 16 kastryčnika na Nacyjanalnym pravavym internet-partale. Dakumienty zaćvierdžanyja pastanovami Dziaržaŭnaha kamiteta pa standartyzacyi ad 30 vieraśnia 2026 hoda.
Adnym z hałoŭnych novaŭviadzieńniaŭ stanie abaviazkovaja videafiksacyja tematyčnaha kantrolu i praktyčnych ekzamienaŭ pa kiravańni transpartnymi srodkami. Zapis pavinien achoplivać nie tolki darožnuju abstanoŭku, ale i dziejańni kursanta i ekzamienatara, a taksama ich hałasy.
Videarehistratary pavinny mieć vuhał ahladu nie mienš za 120 hradusaŭ. Razroźnieńnie asnoŭnaj kamiery musić składać nie mienš za 1920 × 1080 piksielaŭ, dadatkovaj — nie mienš za 1280 × 720. Zapis pavinien vieścisia z častatoj nie mienš za 25 kadraŭ u siekundu, z abaviazkovaj fiksacyjaj daty i času.
Pierad pačatkam kantrolu abo ekzamienu adkazny supracoŭnik pavinien pravieryć spraŭnaść abstalavańnia i pravilnaść ustanoŭlenych daty i času.
Zapisy ekzamienaŭ i tematyčnaha kantrolu aŭtaškoły buduć abaviazanyja zachoŭvać šeść miesiacaŭ, a videa zvyčajnych praktyčnych zaniatkaŭ — adzin miesiac. Paśla zakančeńnia hetych terminaŭ zapisy treba vydalać. Pry hetym zdymać na videa kožny ŭrok kiravańnia nie abaviazkova: patrabavańnie tyčycca mienavita tematyčnaha kantrolu i praktyčnych ekzamienaŭ.
Tearetyčnyja zaniatki ŭ aŭtaškołach pavinny buduć pravodzicca tolki vočna, kali zakanadaŭstva nie praduhledžvaje inšaha. Razam z tym dazvalajecca vykarystoŭvać sučasnyja technałohii, u tym liku trenažory-simulatary, virtualnuju realnaść i inšyja interaktyŭnyja srodki navučańnia.
Udakładniajucca i patrabavańni da instruktaraŭ pa kiravańni. Majstar vytvorčaha navučańnia pavinien mieć vyšejšuju abo siaredniuju śpiecyjalnuju adukacyju, paśviedčańnie ab pavyšeńni kvalifikacyi pa adpaviednaj prahramie i nie mienš za try hady stažu kiravańnia transpartnym srodkam patrebnaj katehoryi. Dla instruktaraŭ, jakija navučajuć kiravańniu kołavymi traktarami i samachodnymi mašynami, dastatkova dvuch hadoŭ adpaviednaha stažu.
Abnoŭleny standart taksama vyznačaje patrabavańni da navučalnych aŭtamabilaŭ. Jany pavinny być zarehistravanyja ŭ DAI jak navučalnyja, z asobnymi vyklučeńniami, i abstalavanyja sistemaj spadarožnikavaha manitorynhu GPS. Jana musić dazvalać u realnym časie adsočvać miescaznachodžańnie i paramietry ruchu aŭtamabila, a taksama zachoŭvać hetyja źviestki.
Adnak kali praktyčnyja zaniatki fiksujucca na videa, navučalny aŭtamabil možna nie abstaloŭvać GPS. Asobnyja vyklučeńni praduhledžanyja dla matacykłaŭ, pryčepaŭ, kołavych traktaroŭ, samachodnych mašyn i transpartu niekatorych dziaržaŭnych orhanaŭ.
U standarcie ŭdakładnili i techničnyja charaktarystyki transpartu dla navučańnia. Dla katehoryi A patrebny matacykł z rabočym abjomam ruchavika nie mienš za 220 kubičnych santymietraŭ abo z elektraruchavikom maksimalnaj mahutnaściu bolš za 11 kVt. Dla katehoryi B — aŭtamabil z technična dapuščalnaj ahulnaj masaj nie bolš za 3,5 tony i nie bolš jak vaśmiu pasažyrskimi miescami. Dla katehoryi C patrebny hruzavik masaj nie mienš za 8 ton, a dla katehoryi D — transpartny srodak bolš čym z 17 siadziačymi miescami i daŭžynioj nie mienš za 6,5 mietra. Asobnyja patrabavańni vyznačanyja dla aŭtamabilaŭ z pryčepami.
Zdać ekzamien na inšym navučalnym aŭtamabili taksama budzie mahčyma, ale tolki ŭ vyklučnych abstavinach. Heta dazvalajecca, kali mašynu, na jakoj kursant vučyŭsia kiravać, niemahčyma padać na ekzamien praz surjoznuju techničnuju niaspraŭnaść, što patrabuje praciahłaha ramontu, darožna-transpartnaje zdareńnie abo inšyja niepieraadolnyja abstaviny. Zamiest jaje možna vykarystać navučalny aŭtamabil toj ža marki i madeli abo inšuju mašynu adpaviednaj katehoryi.
Udakładnienyja taksama patrabavańni da staršyniaŭ ekzamienacyjnych kamisij aŭtaškoł. Jany pavinny adpaviadać ustanoŭlenym patrabavańniam da adukacyi i mieć paśviedčańnie kiroŭcy luboj katehoryi. Akramia taho, skarektavanyja asobnyja pałažeńni ab vykarystańni prahramnaha zabieśpiačeńnia, abstalavańni aŭtadromaŭ i afarmleńni paśviedčańniaŭ ab navučańni.
Pavieličeńnia kolkaści hadzin navučańnia novyja źmieny, vierahodna, nie praduhledžvajuć. Abnoŭlenyja standarty nie vyznačajuć novaj praciahłaści tearetyčnych i praktyčnych zaniatkaŭ: minimalnyja terminy padrychtoŭki, pieralik pradmietaŭ i kolkaść hadzin vyznačajucca adpaviednymi adzinymi prahramami navučańnia.
Nie ŭvodziacca i novyja praviły naličeńnia štrafnych bałaŭ abo aceńvańnia pamyłak kursantaŭ padčas ekzamienaŭ. Usie pieraličanyja źmieny pačnuć dziejničać 1 studzienia 2027 hoda.
Kamientary