Кіроўцаў еўрасаюзных фураў судзяць за запраўку ў Беларусі не тым палівам
Дальнабойшчыкаў, якія ездзяць па Беларусі на машынах, зарэгістраваных у Еўрасаюзе, абвінавачваюць у «непадпарадкаванні законнаму распараджэнню службовай асобы» за тое, што яны куплялі салярку на звычайнай АЗС і па звычайнай цане, піша «Ганцавіцкі час». Бо для іх мінулай вясной урад увёў спецыяльныя запраўкі з завышанымі цэнамі.
У маі 2022 года ў рамках «контрсанкцый» беларускія ўлады абавязалі кіроўцаў грузавых аўтамабіляў на нумарах краін Еўрасаюза запраўляцца толькі на пэўных АЗС, дзе ўстаноўленая павышаная цана на канкрэтны від дызельнага паліва.
На той момант (19 мая 2022 года) кіроўцам фураў на еўрапейскіх нумарах прапаноўваўся спецыяльны від дызпаліва (ДТ-Л-К5 ECO) па «спецыяльнай» цане — 3,58 рубля за літр.
Ніякіх іншых альтэрнатыў для перавозчыкаў з ЕС не было, хоць фуры на беларускіх нумарах маглі тады заправіцца значна танней (літр саляркі каштаваў 2,34 рубля).
Пры гэтым канцэрн «Белнафтахім» разаслаў на АЗС, дзе дызпаліва прадаецца па звычайных цэнах, памятку для аператараў. Згодна з гэтай інструкцыяй, работнікі заправак павінны былі адсочваць нумары фур, якія прыехалі па паліва. Калі гэта грузавік з ЕС, то на працягу паўгадзіны аператары АЗС павінны паведаміць пра факт запраўкі ў мытню. На падставе гэтых даносаў мытнікі складалі пратаколы аб адміністрацыйным парушэнні.
Цяпер гэты працэс набыў маштабны характар: вядома, што толькі за снежань 2022 года суды ў Брэсце пакаралі некалькіх кіроўцаў фур з еўрапейскімі нумарамі.
У дачыненні да іх былі вынесеныя пастановы аб адміністрацыйным правапарушэнні па артыкуле 24.3 КаАП (непадпарадкаванне законнаму распараджэнню ці патрабаванню службовай асобы пры выкананні ёй службовых паўнамоцтваў).
Ва ўсіх выпадках рашэнні судоў былі як пад капірку — прызнанне дальнабойшчыкаў вінаватымі і штраф у памеры 50 базавых велічынь (1600 рублёў на канец 2022 года).
Цікава, што ніводзін з кіроўцаў на судовае пасяджэнне не з'явіўся. У большасці выпадкаў на канфіскаваныя ў іх грошы на суму штрафу накладалі арышт: іх прадпісвалася забраць у кошт выплаты спагнання ў выпадку невыканання пастановы.
Як правіла, гэта тычылася грамадзян Беларусі і Польшчы, якія былі за рулём фур на еўрапейскіх нумарах і заехалі на тэрыторыю нашай краіны для перачэпкі.
Усе яны абвінавачваліся ў адным і тым жа: заправіліся на АЗС, не ўключаных у пэўны пералік для перавозчыкаў з ЕС, набылі паліва па звычайнай цане (а не завышанай), чым парушылі пастанову Савета Міністраў № 247 «Аб перамяшчэнні транспартных сродкаў».
З 16 красавіка 2022 года Беларусь увяла «контрсанкцыі» супраць аўтаперавозчыкаў з Еўрасаюза. Цяпер яны могуць уязджаць у нашу краіну толькі для дастаўкі грузаў у спецыяльныя транспартна-лагістычныя цэнтры для перачэпкі (далей груз могуць дастаўляць беларускія перавозчыкі).
Пры гэтым еўрапейскія грузавікі могуць уехаць у Беларусь толькі праз пэўныя пункты пропуску. Менавіта каля гэтых пагранпераходаў і размешчаны АЗС, дзе прадаюць спецыяльнае дызпаліва ДТ-Л-К5 ECO, якім павінны запраўляцца фуры на заходніх нумарах.
Напрыклад, у Брэсцкай вобласці яго можна набыць на дзвюх запраўках, якія знаходзяцца ля пункта пропуску «Казловічы».
Наста Базар паступіла на праграму Каліноўскага і хоча стаць сацыялагіняй: «Вучоба пасля 40 гадоў — своеасаблівы эліксір маладосці»72
Каментары