«Našym budzie ciažka, bo «Armata» — mif». Strałkoŭ prakamientavaŭ pieradaču tankaŭ Ukrainie
Pieradača ciažkaj braniatechniki dla Ukrainy krainami Zachadu stanie rehularnaj, a pryniaćcie rašeńniaŭ ab masavaj pieradačy tankaŭ Ukrainie — heta tolki pieršy krok. Takoje mierkavańnie vykazaŭ były ministr abarony tak zvanaj «DNR» Ihar Strałkoŭ, kamientujučy rašeńnie ZŠA adpravić Kijevu tanki M1 Abrams.
«Pakolki Rasijskaja Fiederacyja ničoha nie zdoleła z hetaj nahody skazać u adkaz, to, miarkuju, dalejšyja pastaŭki buduć rehularnymi. Miarkuju, što 30 tankaŭ Abrams, a taksama niekalki dziasiatkaŭ [tankaŭ niamieckaj vytvorčaści] Leopard, jakija pastaviać inšyja krainy NATA, stvorać dla Ukrainy dzieści praz dva miesiacy dastatkova mahutnuju tankavuju bryhadu z sučasnym uzbrajeńniem, zabieśpiačeńniem zapčastkami, haručym i navučanymi na Zachadzie ekipažami. I, dumaju, našym vojskam, na žal, nie pazdarovicca ŭ bajach z hetaj bryhadaj», — skazaŭ jon.
Strałkoŭ ličyć, što zachodniaja braniatechnika pa mnohich paramietrach pieraŭzychodzić tuju techniku, jakaja jość ciapier u rasijskich vojskach.
Na jaho dumku, supraćstajać tankam Abrams i Leopard-2 šostaj i siomaj madeli rasijskija sučasnyja tanki «mohuć tolki adnosna paśpiachova».
«A tyja tanki, jakija ŭ nas płanavałasia supraćpastavić im, tak zvanyja «Armata» T-14, u nas prosta nie vyrablajucca. Jany tak i zastalisia tvoram falkłoru Ministerstva abarony, niahledziačy na dziesiać hadoŭ i vializnyja hrošy, vydatkavanyja na ich raspracoŭku», — dadaŭ Strałkoŭ.
Jon skazaŭ, što Ukraina paprasiła 300 tankaŭ, 300 bajavych mašyn piachoty sučasnych i 500 sučasnych samachodnych artyleryjskich ustanovak, paabiacaŭšy, što pry ich atrymańni zmoža vyjści na miežy 2013 hoda.
«Kali ŭ ich budzie mahčymaść utrymlivać takoha kštałtu hrupoŭku ŭvieś čas, to, mabyć, jany zmohuć stvaryć faktyčna cełaje tankavaje vojska. I našym vojskam budzie vajavać ź imi nadzvyčaj ciažka, asabliva ŭličvajučy, što ŭ nas na front z reziervu pajšli ŭžo T-62, jakija daŭnym-daŭno byli źniatyja z uzbrajeńnia nie tolki ŭ Rasijskaj Fiederacyi, ale navat u SSSR», — dadaŭ jon.
Strałkoŭ ličyć, što, niahledziačy na składanaść zachodniaj techniki, za dva miesiacy intensiŭnych zaniatkaŭ kiravać joj možna navučyć značnuju častku ŭkrainskich vajskoŭcaŭ.
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja9
Kamientary