U Rumynii, Estonii i Łatvii abviaščali pavietranuju tryvohu i padymali źniščalniki NATA praź bieśpiłotniki
U noč z 31 žniŭnia na 1 vieraśnia adrazu niekalki krain NATA — Rumynija, Łatvija i Estonija — abviaścili pavietranuju tryvohu i padniali ŭ nieba vajskovuju avijacyju praz pahrozy ŭ pavietranaj prastory.
U Rumynii načnyja incydenty byli źviazanyja z rasijskaj atakaj pa poŭdni Adeskaj vobłaści Ukrainy. Kala 23:30 radyjołakacyjnyja sistemy zafiksavali dźvie pavietranyja celi za 24 km ad Viłkava. U nieba padnialisia dva ispanskija źniščalniki F-18 i viertalot VPS Rumynii. Piłoty nazirali vybuchi na ŭkrainskaj terytoryi, ale parušeńniaŭ rumynskaj miažy zafiksavana nie było.
Kala 2:00 pavietranuju tryvohu abviaścili ŭ łatvijskim Łudzienskim rajonie, a bližej da 4:00 — u Ałukśnienskim krai. Łatvijskija vajskoŭcy paviedamili, što bieśpiłotnik, jaki zalacieŭ na ich terytoryju, zatym nakiravaŭsia ŭ bok Estonii.
Estonskija siły abarony abviaścili pahrozu dla žycharoŭ 8 ujezdaŭ. Na pierachop dronaŭ, jakija ruchalisia ŭzdoŭž uschodniaj miažy i ŭvachodzili ŭ estonskuju pavietranuju prastoru, padniali tureckija źniščalniki ź misii NATA. Kala 6:00 tryvohu admianili.
Na fonie incydentaŭ krainy Bałtyjskaha rehijona płanujuć stvaryć sumiesnuju apieratyŭnuju hrupu dla abarony ad bieśpiłotnikaŭ i supraćdziejańnia hibrydnym atakam. Premjer-ministr Estonii Krysten Michał adznačyŭ, što prostaj pahrozy vajennaha pašyreńnia na krainy Bałtyi pakul niama, adnak Rasija praciahvaje hibrydny cisk na Jeŭropu.
Kamientary