Pamior hreka-katalicki śviatar Ihar Kandraćjeŭ. Padčas pratestaŭ u Breście jon patrabavaŭ ad uładaŭ vypuścić viaźniaŭ
Iharu Kandraćjevu było 67 hadoŭ. Pra jaho śmierć paviedamili ŭ hreka-katalickaj supołcy ŭ fejsbuku.
Jak havorycca ŭ paviedamleńni, Ihar Kandraćjeŭ pamior na Śviatoj Ziamli paśla ciažkaj ankałahičnaj chvaroby. Jon šmat hadoŭ ačolvaŭ hreka-katalickuju supolnaść u Breście i Bresckaj vobłaści.
Ihar Kandraćjeŭ naradziŭsia ŭ 1959 hodzie ŭ Sibiry ŭ siamji represavanych.
Pa baćkavaj linii mieŭ prodkaŭ, jakich jašče ŭ XIX st. vysłali z terytoryi Biełarusi paśla adnaho z paŭstańniaŭ. Siarod jahonych prodkaŭ byli śviatary i ikanapiscy.
Atrymaŭ architekturnuju adukacyju, zajmaŭsia restaŭracyjaj chramaŭ i ikanapisam.
U 1988 hodzie byŭ rukapakładzieny ŭ śviatary, a z 1995 hoda pačaŭ svajo słužeńnie ŭ Biełaruskaj Hreka-Katalickaj Carkvie. Pryjechaŭšy ŭ Biełaruś, jon chutka vyvučyŭ biełaruskuju movu i z 1996 hoda ačolvaŭ redakcyju relihijnaj haziety «Carkva».
Śviatar stajaŭ la vytokaŭ stvareńnia hreka-katalickich parafij u Bieraści, Ivacevičach, Baranavičach, Pinsku, Słonimie i Astraŭcy, a taksama aktyŭna zajmaŭsia budaŭnictvam dušpastyrskich centraŭ, ekumieničnym dyjałoham i papularyzacyjaj biełaruskich pierakładaŭ Biblii.
Mieŭ žonku Volhu, jakaja dapamahała jamu ŭ słužeńni jak muzyka i rehient, i dvuch synoŭ.
U 2022 hodzie Ihar Kandraćjeŭ byŭ zatrymany razam z redaktaram haziety «Carkva» Iharam Baranoŭskim. Śviataru prysudzili 12 sutak administratyŭnaha aryštu za raspaŭsiud «ekstremisckich materyjałaŭ».
U žniŭni 2020 hoda ŭ Breście padčas masavych pratestaŭ Kandraćjeŭ byŭ adnym z udzielnikaŭ sustrečy haradskoj hramadskaści z tahačasnym staršynioj Bresckaha harvykankamu Alaksandram Rahačukom. Śviatar zaklikaŭ vypuścić zatrymanych. Kali čynoŭnik zhadziŭsia, Kandraćjeŭ pajšoŭ da miascovaha IČU i pravioŭ tam usiu noč, pakul apošni zatrymany nie vyjšaŭ na volu.
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni5
Kamientary