Pieršaha namieśnika hiendyrektara «Biełviesta» pasadzili na try z pałovaj hady za palityku
Viktar Huryn kiravaŭ bujnymi prajektami ŭ Biełarusi i Rasii, ukaraniaŭ u abutkovuju vytvorčaść štučny intelekt i robataŭ, ale staŭ čarhovaj achviaraj palityčnaha pieraśledu.
Viktaru Hurynu 57 hadoŭ. Jon naradziŭsia ŭ Pinsku, dzie skončyŭ miascovuju škołu №6. Vyšejšuju adukacyju atrymaŭ na fakultecie radyjofiziki Biełaruskaha dziaržaŭnaha ŭniviersiteta, a paźniej taksama skončyŭ Akademiju kiravańnia.
Za plačyma mieniedžara šmathadovaja karjera kiraŭnika: jon uznačalvaŭ departamient u rasijskim šynnym chołdynhu Amtel, kiravaŭ handlovym domam kancerna «Biełdziaržcharčpram» u Rasii, pracavaŭ pieršym namieśnikam hiendyrektara «Narylskhazprama» i «Tajmyrhaza» ŭ struktury «Narylskaha nikiela», a taksama kiravaŭ kampanijami «Izabud» i «Baŭsiervis».
Z 2017 pa 2021 hod Huryn uznačalvaŭ kampaniju «Kampazitnyja kanstrukcyi» — ambicyjny prajekt u industryjalnym parku «Vialiki kamień» koštam 220 miljonaŭ jeŭra, jaki musiŭ stać bujnym navukova-vytvorčym centram u śfiery palimiernych kampazitaŭ.
Paśla pracy apieracyjnym dyrektaram u meblevym chołdynhu «Anhstrem» Viktar u śniežni 2022 hoda zaniaŭ pasadu pieršaha namieśnika hienieralnaha dyrektara «Biełviesta». Tam jon kuryravaŭ inavacyjnyja prajekty — pieravod vytvorčaści ŭ ličbavaje vymiareńnie, aŭtamatyčny raskroj skury i ŭkaranieńnie rabatyzavanych kompleksaŭ ź sistemami mašynnaha zroku i niejrasietak.
A ŭ sakaviku 2026 hoda top-mieniedžara zatrymali siłaviki. Pa źviestkach «Viasny», padstavaj dla kryminalnaj spravy stali jahonyja paviedamleńni ŭ telehram-čatach u 2020 i 2021 hadach z rezkaj krytykaj dziejańniaŭ siłavikoŭ i Alaksandra Łukašenki.
Minski haradski sud pryznaŭ Viktara Huryna vinavatym pavodle cełaha šerahu artykułaŭ: «raspalvańnie varožaści» (č. 1 art. 130 KK), «abraza Łukašenki» (č. 1 art. 368 KK), «abraza pradstaŭnika ŭłady» (art. 369 KK), a taksama «sadziejničańnie ekstremisckaj dziejnaści» (č. 1 i 2 art. 361‑4 KK).
Viktaru Hurynu dali try z pałovaj hady kałonii va ŭmovach uzmocnienaha režymu i bujny štraf u pamiery 600 bazavych vieličyń.
Masavyja palityčnyja represii ŭ krainie pačalisia paśla 2020 hoda. Tady Alaksandr Łukašenka prajhraŭ Śviatłanie Cichanoŭskaj, ale nie addaŭ joj ułady, a zmusiŭ jaje vyjechać za miažu. Adbylisia masavyja narodnyja pratesty suprać dyktatury i falsifikacyi vybaraŭ. Na heta ŭłady adkazali represijami.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony jak minimum 10050 čałaviek, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy, vymušanaja emihracyja) zakranuli sotni tysiač biełarusaŭ.
«Ekstremizmam» ułady Biełarusi ličać patrabavańnie pravieści svabodnyja vybary z prazrystym padlikam hałasoŭ, a taksama praktyčna ŭsialakuju krytyku ŭładaŭ, prarasijskich histaryčnych naratyvaŭ, prajavy salidarnaści z Ukrainaj, antyvajennyja vystupy.
«Naša Niva» — bastyjon biełaruščyny
PADTRYMAĆ
Kamientary