Minčanka zdała kvateru «jurystu Andreju» i ŭžo dziesiać miesiacaŭ nie moža vysielić niepłacielščyka
Minčanka Maryja Ivanaŭna 15 hadoŭ zdavała svaju adnapakajovuju kvateru na vulicy Sialickaha ŭ Šabanach i nikoli nie mieła prablem z arandatarami. Ale letaś u jaje žyllo zasialiŭsia mužčyna, jaki nazvaŭsia jurystam. U vyniku haspadynia ŭžo dziesiać miesiacaŭ nie atrymlivaje arendnuju płatu i sama nie moža trapić u svaju kvateru, piša «Anłajnier».
Paśla ramontu žančyna razam z dačkoj vystaviła kvateru na arendu za 850 rubloŭ u miesiac plus kamunalnyja płaciažy. Pieršaj patencyjnaj arandatarkaj stała žančyna, jakaja skazała, što budzie žyć z mužam, dziciom i katom. Jana zapeŭnivała, što prablem z apłataj nie budzie, bo muž pracuje jurystam.
Pry afarmleńni damovy ŭ ŽES vyśvietliłasia, što para aficyjna nie žanataja. Niahledziačy na sumnievy, Maryja Ivanaŭna padpisała z Andrejem damovu na hod. Spačatku jon płaciŭ svoječasova, ale praź niekalki miesiacaŭ pierastaŭ. Spačatku abiacaŭ raźličycca paśla palapšeńnia finansavaj situacyi, a potym naohuł pierastaŭ vychodzić na suviaź.
Kali haspadynia razam z dačkoj pryjechała ŭ kvateru, nichto nie adčyniaŭ dźviery. Daviałosia vyklikać milicyju. Vyśvietliłasia, što arandatary byli ŭnutry. Kvatera za hety čas stała brudnaj, jaje prakuryli, a dźviery paškodzili. Pavodle słoŭ haspadyni, susiedzi taksama nieadnarazova vyklikali milicyju praz pavodziny žycharoŭ.
Maryja Ivanaŭna źviarnułasia da jurysta i aficyjna papiaredziła arandataraŭ ab skasavańni damovy. Adnak jany vyjazdžać admovilisia. U krasaviku žančyna padała pazoŭ u sud.
Sud staŭ na jaje bok: damovu skasavali, a Andreja abaviazali vypłacić 9525 rubloŭ — zapazyčanaść za arendu i kamunalnyja pasłuhi, a taksama sudovyja vydatki. Ale navat paśla hetaha mužčyna nie vyjechaŭ z kvatery.
U kancy červienia haspadynia zapatrabavała, kab jon pakinuŭ žyllo razam z sužycielkaj i jaje dziciom. Andrej adkazaŭ, što pakul nie hatovy vyjazdžać. U vyniku da kanca žniŭnia jany praciahvali žyć u kvatery, choć damova ŭžo była skasavanaja.
Maryja Ivanaŭna źviartałasia da ŭčastkovaha i ŭ milicyju. Joj paraili znoŭ źviarnucca ŭ sud — užo z patrabavańniem ab vysialeńni. Dakumienty paśla pieršaha rašeńnia jana taksama pieradała sudovym vykanaŭcam, ale situacyja chutka nie źmianiłasia.
Bolš za toje, haspadynia sprabavała pamianiać zamki. Jana zapłaciła bolš za 500 rubloŭ za pracu, ale padčas jaje adsutnaści zamok znoŭ zamianili, i žančyna kančatkova straciła dostup da ŭłasnaha žylla.
Pavodle infarmacyi Maryi Ivanaŭny, u Andreja ŭžo jość jašče adna sprava ab zapazyčanaści pierad inšym arendadaŭcam u Minsku. Tam jon nibyta taksama zavinavaciŭsia kala 6000 rubloŭ.
Sam arandatar śćviardžaje, što nie «zachoplivaŭ» kvateru i abiacaje vyjechać da kanca žniŭnia. Na pytańni haspadyni pra zapazyčanaść jon adkazvaje, što abaviazkova raźličycca, ale dakładnych terminaŭ nie nazyvaje.
Kolki kaštuje źniać žyllo dla studenta ŭ Minsku i inšych haradach
«Strachavali kvateru, kab być spakojnymi, a ŭ vyniku…» Adnapakajoŭku minčan surjozna zatapiła
«Studyja ŭ «Minsk-Śviecie» pavinna kaštavać $300 pa kursie, dvuchpakajoŭka — $500». Minčuk pra ceny na žyllo
Čynoŭniki pierabłytali numar kvatery i zasialili žančynu nie tudy, a kali jana zrabiła ramont, zapatrabavali pamianiacca z susiedam
U Minsku pradajuć kvateru, interjer jakoj niemahčyma zabyć, chacia niekamu i zachočacca
Ciapier čytajuć
Natalla Kalehava raskazała pra dapamohu biełaruskim uciekačam, svaju siamju, staŭleńnie da Cichanoŭskaj. I patłumačyła, chto takija «babry» i «zajcy»19
Kamientary