Rasija masiravana atakavała Ukrainu: 12 zahinułych, siarod ich hramadzianin Indyi
U noč na 1 vieraśnia Rasija naniesła masiravany ŭdar pa Ukrainie rakietami i bieśpiłotnikami. Zahinuli 12 čałaviek, jašče dziasiatki atrymali ranieńni. Siarod zahinułych — hramadzianin Indyi, paviedamiŭ prezident Ukrainy Uładzimir Zialenski.
«Usiaho 12 čałaviek zahinuli, siarod ich hramadzianin Indyi, jašče dziasiatki paranienych u vyniku ataki. Maje spačuvańni ŭsim, chto straciŭ rodnych i blizkich», — napisaŭ Zialenski ŭ sacyjalnych sietkach.
Dla ataki rasijskija vojski ŭžyli vialikuju kolkaść reaktyŭnych bieśpiłotnikaŭ i balistyčnych rakiet. Paškodžanaja žyłaja i inšaja hramadzianskaja infrastruktura.
U Baryspali paškodžany piacipaviarchovy žyły dom, adkul evakujavali 50 čałaviek. Taksama pad udary trapili pradpryjemstvy. U horadzie zahinuli čatyry čałavieki, jašče 13 paciarpieli.
U Kijevie rasijski balistyčny ŭdar pryjšoŭsia pa čyhunačnym depo i inšych abjektach čyhunki. Zahinuli siem čałaviek, šaściora ź ich — supracoŭniki «Ukrzaliźnici». Adzin rabotnik byŭ špitalizavany z ranieńniami. Staršynia praŭleńnia kampanii Alaksandr Piarcoŭski paviedamiŭ, što adzin z cechaŭ całkam razburany.
Udary taksama nanosilisia pa Adesie i vobłaści. Tysiačy siemjaŭ zastalisia biez elektryčnaści.
Akramia taho, byŭ paškodžany punkt propusku na miažy Ukrainy z Rumynijaj.
Pad abstrełami apynulisia taksama Chiersonskaja, Danieckaja, Zaparožskaja, Charkaŭskaja, Čarnihaŭskaja, Žytomirskaja, Sumskaja i Dnieprapiatroŭskaja vobłaści.
Pavodle Pavietranych sił Ukrainy, u noč na 1 vieraśnia rasijskija vojski vykarystali balistyčnyja rakiety «Iskander-M»/KN-23/S-400, supraćkarabielnyja rakiety «Cyrkon», kryłatyja rakiety «Kalibr», supraćradyjołakacyjnyja Ch-31P, a taksama 218 bieśpiłotnikaŭ roznych typaŭ. Traplańni zafiksavali ŭ 28 miescach. Ukrainskaja SPA, pavodle vajskoŭcaŭ, abiasškodziła 199 pavietranych celaŭ.
Zialenski paśla ataki znoŭ zaklikaŭ partnioraŭ pavialičyć pastaŭki srodkaŭ supraćpavietranaj abarony Ukrainie.
«Kolkaść achviar rasijskaha teroru naŭprost zaležyć ad kožnaha novaha pakieta dapamohi», — zajaviŭ jon.
Kamientary