«My chacieli b, kab sud byŭ u Haazie». Zialenski i premjer Niderłandaŭ abmierkavali stvareńnie śpiectrybunała pa rasijskaj ahresii
Prezident Ukrainy Uładzimir Zialenski i premjer-ministr Niderłandaŭ Mark Rute na sustrečy ŭ Kijevie abmierkavali temu stvareńnia ŭ Haazie śpiecyjalnaha trybunała pa rasijskaj ahresii, paviedamlaje Bi-bi-si.
Niderłandy stvarajuć Mižnarodny centr dla prakurorskich dziejańniaŭ pa ahresii. «Tam źbirajucca dokazy, dakumientujucca złačynstvy», — raspavioŭ Rute.
Jak pieradaje ahienctva Reuters, Rute zajaviŭ, što sioleta Niderłandy nakirujuć va Ukrainu jašče dźvie sudova-śledčyja misii.
«My chacieli b, kab sud byŭ u Haazie. Pieršy ofis moh by być u Jeŭrajuście (jurydyčnaje viedamstva ES). Važna, kab my pracavali nad hetym, ale heta praciahły praces, patrabuje značnych namahańniaŭ», — adznačyŭ jon.
Niderłandy hatovyja dać placoŭku, pryniaćcie rašeńniaŭ mahčyma paśla kansultacyi z partniorami, padkreśliŭ Rute.
Zialenski vykazaŭ nadzieju na adkryćcio adpaviednaha ofisa i stvareńnie reparacyjnaha miechanizmu.
Akramia taho, Zialenski i Rute abmiarkoŭvali pastaŭki ŭzbrajeńniaŭ Ukrainie.
U pačatku lutaha Ukraina padała aficyjnuju zajaŭku Niderłandam na pastaŭku źniščalnikaŭ F-16. Raniej ułady krainy zajaŭlali pra hatoŭnaść pieradać Ukrainie svaje źniščalniki, kali Kijeŭ pra heta paprosić.
Adnak, kali zajaŭka była padadziena, ministr abarony Niderłandaŭ Kajsa Ołanhren zajaviła, što vykanać jaje budzie nialohka. Źniščalniki F-16 — heta častka sistemy abarony ZŠA, tamu treba atrymać dazvoł amierykanskaha ŭrada.
Na sumiesnaj z prezidentam Ukrainy pres-kanfierencyi siońnia Rute skazaŭ tolki ab pieršaj partyi tankaŭ «Leapard», jakija Niderłandy, Danija i Hiermanija kuplajuć dla Ukrainy. Pavodle jaho, jak tolki jana budzie hatovaja, jaje tut ža dastaviać va Ukrainu.
Słova «Unavatuna» značyć «raj». Dzie na Šry-Łancy adpačyvała Mielnikava13
Kamientary