Siertyfikaty CE i atestaty vypuskniki 11-ch kłasaŭ atrymajuć 10 červienia
Vynikovaja atestacyja dla vypusknikoŭ škoł u 2023 h.projdzie ŭ novym farmacie. Pra heta žurnalistam raspaviała načalnica upraŭleńnia ahulnaj siaredniaj adukacyi Ministerstva adukacyi Iryna Karžova, paviedamlajuć Minsk-naviny.
— Adzinaccacikłaśnikam treba budzie zdać dva centralizavanyja ekzamieny (CE). Adzin ź ich pa ruskaj abo biełaruskaj movie, druhi — pa vučebnym pradmiecie pa vybary navučenca. Pieravahi takich navin, na naš pohlad, vidavočnyja, — adznačyła Karžova. — Raniej vypuskniki zdavali čatyry ekzamieny ŭ škole, a paśla, praź nievialiki pramiežak času, — jašče jak minimum try CT. Siońnia ž im treba budzie vytrymać dva CE i — dla pastupleńnia ŭ VNU —adno CT. Akramia taho, adbyłasia ŭnifikacyja form praviadzieńnia vypusknych i ŭstupnych ekzamienaŭ. Ciapier niama pierakazaŭ, kantrolnych i vusnych ekzamienaŭ, usie vyprabavańni — u formie testavańnia.
Pa słovach načalnicy ŭpraŭleńnia ahulnaj siaredniaj adukacyi, sistema ŭ cełym hatovaja da praviadzieńnia vynikovaj atestacyi vypusknikoŭ u novym vyhladzie. Buduć pracavać 144 punkty CE, ź ich 30 — u VNU, 60 — na bazie kaledžaŭ i 54 — u škołach, licejach i himnazijach. Vyznačanyja i asnoŭnyja daty centralizavanaha ekzamienu — 14 i 21 maja.
— Akramia taho, praduhledžanyja reziervovyja dni — 23 i 25 maja. Tyja navučency, jakija pa ŭvažlivaj pryčynie nie zmahli prajści CE ŭ nazvanyja daty, mohuć zrabić heta jašče ŭ lipieni i žniŭni, — skazała Karžova.
Vyniki centralizavanaha ekzamienu pieravodziacca ŭ 10-balnuju škału. Z ulikam atrymanaha vyniku, a taksama hadavoj adznaki pa pradmiecie budzie vystaŭlenaja vynikovaja acenka ŭ atestat.
— Atestaty razam ź siertyfikatami CE moładź atrymaje na vypusknym viečary. Jany zapłanavanyja na 10 červienia, — padsumavała Karžova.
Kamientary