Tavary na sumu bolš za miljard dalaraŭ, adpraŭlenyja ŭ 2022 hodzie ź Jeŭrasajuza ŭ Kazachstan, Armieniju i Kyrhyzstan, «źnikli» pry tranzicie praz Rasiju, nie dajšoŭšy da kančatkovych punktaŭ pryznačeńnia. Pra heta paviedamlaje telekanał «Dožd́» sa spasyłkaj na daśledavańnie Financial Times.
Usiaho za 2022 hod na terytoryi Rasii takim čynam «zhubiłasia» pałova adpraŭlenych ź ES tavaraŭ padvojnaha pryznačeńnia, jakija ŭ tym liku možna vykarystoŭvać u vajennaj pramysłovaści.
Pry hetym, «niepraparcyjna vialikaja častka fantomnaha ekspartu» išła z krain Bałtyi, jakija miažujuć z Rasijaj i Biełaruśsiu.
Žurnalisty zrabili vysnovu, što tavary, ekspart jakich u Rasiju byŭ zabaronieny paśla pačatku poŭnamaštabnaha ŭvarvańnia va Ukrainu, traplali ŭ RF na padstavie taho, što jany nibyta pryznačalisia dla inšych dziaržaŭ.
Rasija zmahła abyści sankcyi, pakazaŭšy falšyvyja punkty pryznačeńnia ŭ mytnych dekłaracyjach ES. Heta dapamahło Maskvie zachavać dostup da najvažniejšych jeŭrapiejskich tavaraŭ, uklučajučy kampanienty samalotaŭ, aptyčnaje abstalavańnie i hazavyja turbiny.
Paśla pačatku poŭnamaštabnaha ŭvarvańnia va Ukrainu zachodnija krainy ŭviali suprać Rasii sankcyi, jakija ŭ tym liku zabaraniajuć uvoz u krainu tavaraŭ padvojnaha pryznačeńnia. U 2023 hodzie ES taksama abmiežavaŭ tranzit takich tavaraŭ, kab jany nie patrapili ŭ Rasiju ŭ abychod sankcyj.
Kamientary