Pačobut nie staŭ razmaŭlać z šaściorkami — ni z Pratasievičam, ni z Vaskrasienskim
Tak, vidać, supała, ale ŭ adzin i toj ža dzień dva najbolš viadomyja pierabiežčyki z demakratyčnaha łahiera ŭ praŭładny, Raman Pratasievič i Juryj Vaskrasienski, padzialilisia historyjami pra toje, jak jany chacieli padabrać klučy da palitźniavolenaha žurnalista Andreja Pačobuta, ale toj ich kateharyčna adšyŭ.
Raman Pratasievič raskazaŭ svaju historyju padčas efiru ŭ prahramie prapahandysta Ryhora Azaronka, kali toj spytaŭsia jahonuju dumku pra toje, što dalej budzie z Andrejem Pačobutam u chodzie raźvićcia mahčymaha dyjałohu režymu Łukašenki z Polščaj.
«Mahu skazać tolki toje, što peŭny čas tamu ja sprabavaŭ pabačycca z tym samym hramadzianinam (majecca na ŭvazie Andrej Pačobut — Zaŭv. red.), ale jon uvohule kateharyčna admoviŭsia sustrakacca, pačaŭ havaryć niecenzurna i hetak dalej. Na hetym usia heta historyja i skončyłasia», — skazaŭ na heta Pratasievič.
Praktyčna anałahičnuju historyju padčas siońniašniaj razmovy z pravaabaroncam Leanidam Sudalenkam raskazaŭ i Juryj Vaskrasienski:
«Ja sustrakaŭsia z Pačobutam u Śledčym kamitecie, u prysutnaści časovaha pavieranaha ŭ spravach Polščy. Jak jon nakinuŭsia, pačaŭ abražać, kryčać! Heta značyć pavodziŭ siabie jak sacyjapat. Choć ja jaho naohuł upieršyniu ŭ žyćci ŭbačyŭ. Ja ž jamu nikoli kiepskaha ničoha nie rabiŭ, nie zyčyŭ».
Varta adznačyć, što padobnuju historyju Vaskrasienski raskazvaŭ jašče ŭ krasaviku 2023 hoda, prytym jana i tady ŭžo adbyłasia «prykładna paŭtara hoda tamu». Kali svaju sprobu rabiŭ Pratasievič — nieviadoma, ale možna mierkavać, što jana mahła mieć miesca prykładna hod tamu, kali ŭłady sprabavali vykarystać hetaha błohiera dla prapahandysckaha vykarystańnia klučavych palitźniavolenych. Mienavita tady ŭ efir vyjšli frahmienty jahonaj razmovy ź Viktaram Babarykam.
U kožnym razie vyhladaje, što Andrej Pačobut cudoŭna razumieje nikčemnaść fihur jak Vaskrasienskaha, tak i Pratasieviča, a tamu kateharyčna ŭchilajecca ad lubych kantaktaŭ ź imi.
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni13
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary
[Zredahavana]