Łukašenka chacieŭ dałučycca da NATO, ale apynuŭsia ŭ rasijskaj pastcy — Makron
Prezident Francyi vykazaŭ takoje mierkavańnie na mižnarodnym forumie pa biaśpiecy GlobSec u Bracisłavie.
Padrabiaznaściami padzialiŭsia žurnalist «Svabody» Alaksiej Znatkievič na jutub-kanale «Svaboda Premium», jaki niepasredna prysutničaŭ na forumie.
Jak užo paviedamlałasia raniej, Emaniuel Makron na mižnarodnaj kanfierencyi GlobSec zajaviŭ, što da 2020 hoda administracyja Łukašenki sprabavała pakazać, što dystancujecca ad Rasii. Prezident Francyi zaklikaŭ cisnuć na Łukašenku, ale pakidać jamu pole dla manieŭru, mahčymaść dla vychadu z toj situacyi, jakaja skłałasia siońnia.
Padčas pres-kanfierencyi ŭ Bracisłavie Makron adkazaŭ na pytańnie Paŭła Śluńkina ab tym, ci nie słaby adkaz Zachadu, ci dastatkova tolki padtrymki hramadzianskaj supolnaści, kali ŭ Biełarusi rasijskija tanki. Makron pry adkazie na hetaje pytańnie siarod inšaha adznačyŭ:
«Ja dumaju, što ŭ 2020 hodzie my pryniali vielmi jasnyja rašeńni, uvioŭšy sankcyi. Ale davajcie budziem ščyrymi: my padšturchnuli Biełaruś i jaje palityčnuju sistemu da Rasii. Nie varta zabyvacca, što ŭ Biełarusi, jakim by ni byŭ Łukašenka, byli sfalsifikavanyja vybary i što heta nie dziaržava, dzie pavažajuć viaršenstva zakonu. Tam nie było pavahi da vybaraŭ, i my pravilna zrabili, što zaniali žorstkuju pazicyju».
Druhi momant, jaki prahučaŭ z vusnaŭ Makrona, śviedčyć ab tym, što Łukašenka i častka jahonaj administracyi ŭ pryvatnych razmovach, pryvatnaj kamunikacyi z Zachadam kazali, što jany bajacca Rasii i što jany ŭ budučyni nie prosta chacieli b zbližeńnia z Zachadam, a dałučeńnia da NATA:
«Ale faktyčna heta była kraina, dzie prezident i častka jahonaj administracyi chacieli dałučycca da NATA i byli vielmi aściarožnyja z Rasijaj. My pastavili jaho ŭ situacyju, dzie jon apynuŭsia ŭ pastcy Rasii», — miarkuje Emaniuel Makron.
Jak zhadaŭ karespandent «Svabody» Dźmitryj Hurnievič, u takim ža klučy vykazvaŭsia ŭ svaich miemuarach i daradca Trampa Bołtan, jaki naviedvaŭ Minsk da vybaraŭ u 2019 hodzie. Jon pisaŭ, što Łukašenka pakazvaŭ jamu niejkija mapy ŭ dokaz taho, što niebiaśpieka sychodzić ad Rasii.
Čytajcie jašče:
Makron prapanavaŭ novuju ideju dla pieramovaŭ Ukrainy i Rasii
«Nazvaŭ Emaniuela słovam z čatyroch litar, pieršaja — «S». Borys Džonsan mocna vyłajaŭsia na Makrona
Voś jak pamianiałasia francuzskaje hramadstva. Toje samaje čakaje hramadstva biełaruskaje?
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary