Novym hiendyrektaram Nacyjanalnaj biblijateki moža stać Hihin?

Na sajcie Nacyjalnaj biblijateki hienieralny dyrektar nie paznačany, a ŭ pryjomnaj adkazali, što Hihina ŭ ich jašče niama.

Raniej dyrektaram biblijateki była Aksana Knižnikava. Jaje pryznačyli na hetuju pasadu 1 červienia 2021-ha.

Jaje papiarednik — Raman Matulski — pracavaŭ u Nacbiblijatecy z 2003 pa 2021 hady.

Vadzim Hihin — prychilnik režymu Łukašenki, praŭładny palitołah i historyk, staršynia praŭleńnia biełaruskaha tavarystva «Viedy».

Z 2016 pa 2021 hod zajmaŭ pasadu dekana fakulteta fiłasofii i sacyjalnych navuk BDU. 

Vosieńniu 2022-ha Hihin jeździŭ naziralnikam na «refierendum» u tak zvanuju «Łuhanskuju Narodnuju Respubliku». 

U prapahandysckich miedyja jon časta vykazvajecca pra vajnu va Ukrainie.

Niadaŭna, naprykład, Hihin pryznaŭsia, što ni pra jakija pieramovy nie dumaje, jamu karcić tolki adno — «pieramoha Rasii ŭ SVA» i razhrom Ukrainy:

«Nie treba vykručvacca, — skazaŭ Hihin. — Pieramoha Rasii ŭ SVA — heta i pieramoha Biełarusi. Usie patryjatyčnyja siły, prychilniki Alaksandra Łukašenki pierakananyja ŭ hetym. My jeździm pa krainie, my razmaŭlajem ź ludźmi. Treba pra heta havaryć naŭprost:

tak, Biełaruś nie ŭdzielničaje ŭ bajavych dziejańniach, i heta naš pryncypovy vybar, naša linija, naša pazicyja. Ale davajcie kazać naŭprost: my zaŭziejem za Rasiju, my žadajem pośpiechu rasijskaj armii, my žadajem pieramohi Rasii, my žadajem razhromu nieanacysckaj zhrai, jakaja nazyvajecca Uzbrojenyja siły Ukrainy. My žadajem razhromu kliki Zialenskaha».

Praciŭnikam Łukašenki Vadzim Hihin lubić naŭprost pahražać. 

Jaho asobnych cytat užo nie adroźniš ad słoŭ Azaronka.

U pieradačy «Azarionok. Napriamuju» łukašenkaŭski ideołah krytykavaŭ kanfierencyju demakratyčnych sił «Novaja Biełaruś», jakaja prajšła 8 i 9 žniŭnia 2022-ha ŭ Vilni. Ën pahražaŭ apanientam režymu za miažoj zabojstvami.

«Krainy NATA praspansavali tak zvanuju kanfierencyju, faktyčna zboryšča kałabaracyjanistaŭ u duchu 1943-1944 hadoŭ, usich hetych niedabitych padonkaŭ, usich hetych adkidaŭ i pazadkaŭ biełaruskaha hramadstva, usioj hetaj dreni i poskudzi, usioj hetaj ubohaj navałačy, jakaja sprabavała ŭziać uładu ŭ našaj krainie. Usich hetych vyludkaŭ rodu čałaviečaha. Takich, jak Łatuška, Cichanoŭskaja, Viačorka i ŭsiakaha astatniaha zbrodu, dzie hałoŭnaj temaj była vajennaja interviencyja suprać Biełarusi», — kazaŭ jon. 

• 2
• 0
• 4
• 1
• 3
• 1
• 22
• 0