«Ja nikudy nie dzienusia». Tramp prybyŭ u Fłarydu, dzie jamu vystaviać novyja abvinavačańni
Były prezident ZŠA Donald Tramp u paniadziełak prybyŭ u Mižnarodny aeraport Majami napiaredadni pasiadžeńnia suda, dzie jamu buduć aficyjna vystaŭleny abvinavačańni pa spravie ab nienaležnym zachoŭvańni sakretnych dakumientaŭ.
Na minułym tydni amierykanskija ŭłady apublikavali abvinavaŭčaje zaklučeńnie suprać Trampa — u im utrymlivajucca abvinavačańni pa 37 punktach, u tym liku ŭ dačy łžyvych pakazańniaŭ i złačynnaj zmovie, piša Bi-bi-si.
Sam eks-prezident zajaŭlaje ab svajoj nievinavataści, a pieraśled nazyvaje palityčnym.
Pasiadžeńnie zapłanavana na 22:00 pa Minsku (15:00 pa tamtejšym časie) i projdzie ŭ sudzie Paŭdniovaj akruhi štata Fłaryda.
Jak čakajecca, da pasiadžeńnia Tramp budzie sustrakacca sa svaimi advakatami — pakul niezrazumieła, chto ź ich budzie pradstaŭlać jaho intaresy ŭ Fłarydzie.
Hrupa najbujniejšych amierykanskich miedyja tym časam źviarnułasia da suda z prośbaj dazvolić fota— i videazdymku ŭ zale pasiadžeńniaŭ i ŭ kalidory, a taksama dać aŭdyjazapis pasiadžeńnia adrazu paśla jaho zakančeńnia.
Fiederalnyja sudy zvyčajna nie dazvalajuć zdymku ŭ zale suda (tam pracujuć mastaki, jakija robiać sudovyja zamaloŭki) i nie dajuć dostup da tranślacyi ŭ režymie realnaha času, adnak u suviazi ź vialikim rezanansam žurnalisty prosiać sud zrabić vyklučeńnie.
Vakoł budynka suda ŭzmocnieny miery biaśpieki. Palicyja Majami čakaje, što tam mohuć sabracca dziasiatki tysiač prychilnikaŭ Trampa, u tym liku čalcy miascovaj jačejki ultrapravaj hrupoŭki «Hordyja chłopcy», jakija brali aktyŭny ŭdzieł u šturmie Kapitolija ŭ studzieni 2021 hoda.
«My hatovyja. U nas jość dośvied praviadzieńnia vialikich demanstracyj. Heta Majami», — zajaviŭ šef miascovaj palicyi Meni Marales.
Pavodle jaho słoŭ, padzialać prychilnikaŭ i praciŭnikaŭ Trampa, a taksama stavić śpiecyjalnyja aharodžy vakoł budynka suda nie płanujecca.
«My spadziajomsia, što aŭtorak budzie mirnym. My zaklikajem ludziej da mirnaha vyjaŭleńnia svaich emocyj», — skazaŭ žurnalistam mer Majami Frensis Suares.
Čakajecca, što pasiadžeńnie pradoŭžycca kala dźviuch hadzin, paśla čaho Tramp vierniecca ŭ svoj holf-kłub u Biedminstery ŭ štacie Ńju-Džersi, kab vystupić z zajavaj.
U minułyja vychadnyja były prezident zajaviŭ, što novyja abvinavačańni nie prymusiać jaho vyjści z prezidenckaj honki.
«Ja nikudy nie dzienusia. Pasłuchajcie, kali b ja adyšoŭ, ja b adyšoŭ jašče da pačatku pieradvybarnaj honki ŭ 2016 hodzie», — skazaŭ Tramp vydańniu Politico na borcie svajho samalota.
Ciapier čytajuć
Deputatka, jakaja rychtuje pryhažuń dla Łukašenki, vyjšła zamuž12
Kamientary