U Biełarusi ŭpieršyniu zaćvierdzili pratakoł lačeńnia dziaciej sa SMA
Ministerstva achovy zdaroŭja zaćvierdziła kliničny pratakoł pa lačeńni dziaciej sa SMA (śpinalnaj myšačnaj atrafijaj). Taki dakumient dla hetaha zachvorvańnia pryniaty ŭ Biełarusi ŭpieršyniu, paviedamlaje pres-słužba viedamstva. Što heta takoje i čamu heta važna, tłumačyć CityDog.io.
Śpinalnaja myšačnaja atrafija (SMA) — hienietyčnaje niervova-ciahlicavaje zachvorvańnie, jakoje vyjaŭlajecca ŭ roznym uzroście i pastupova prahresuje. Pry SMA słabaść pačynajecca ź ciahlic noh i ŭsiaho cieła, a ŭ vyniku dachodzić da ciahlic, jakija adkazvajuć za hłytańnie i dychańnie.
Terapija, jakaja jość ciapier, nie vylečvaje ad SMA, adnak dziakujučy preparatam zachvorvańnie nie prahresuje i (abo) značna palapšajucca matornyja navyki. Čym raniej čałaviek, chvory na SMA, atrymaje leki, tym bolš ruchalnych funkcyj jon zachavaje.
Klinična dakazana, što śpiecyjalnyja preparaty dajuć ludziam sa SMA šaniec vieści jakasnaje, doŭhaje, sacyjalna aktyŭnaje i praduktyŭnaje žyćcio. Adnak nivodnaja z najaŭnych u śviecie terapij hetaj chvaroby nie dastupnaja na terytoryi Biełarusi. A dzieci i darosłyja, chvoryja na SMA, nie mohuć doŭha čakać: z kožnym dniom ich stan paharšajecca.
U pratakole Ministerstva achovy zdaroŭja paznačany nieabchodny abjom dapamohi, dyjahnostyki i daśledavańniaŭ, jakija treba pravieści dziciaci sa SMA, a taksama prapisany ŭmovy pryznačeńnia i nabyćcia preparataŭ, jakija mohuć dapamahčy ŭ vyzdaraŭleńni.
U 2020 hodzie ŭ ZŠA i ES byŭ uchvaleny pieršy preparat hiennaj terapii dla lačeńnia SMA — «Zołhiensma» (Zolgensma), jaki ličycca samym darahim u śviecie. Cana adnoj injekcyi — kala 2 młn dalaraŭ. Jaje robiać tolki adzin raz va ŭzroście da dvuch hadoŭ.
Jość jašče adzin varyjant terapii — preparat «Śpinraza», košt jakoha bolš za 100 tysiač dalaraŭ, ale prymać jaho treba pažyćciova, niekalki razoŭ na hod.
«Rysdypłam» — jašče adzin preparat dla pažyćciovaj terapii, jaho košt — 300 tysiač dalaraŭ u hod.
U Biełarusi ŭsie hetyja leki biaspłatna dziaržavaj nie vydajucca.
Ciapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ5
Kamientary