U Homieli pačynajecca zakryty sud nad žurnalistkaj Łarysaj Ščyrakovaj. Joj pahražaje da siami hadoŭ
Homielski abłasny sud pačynaje razhlad kryminalnaj spravy viadomaj žurnalistki i kulturnickaj dziajački Łarysy Ščyrakovaj. Jaje abvinavačvajuć pavodle art. 369-1 KK (dyskredytacyja Respubliki Biełaruś), č. 1 i č. 2 art. 361-4 KK (sadziejničańnie ekstremisckaj dziejnaści i toje ž dziejańnie, jakoje ažyćciaŭlajecca paŭtorna). Sudovy praces budzie prachodzić u zakrytym režymie.
Spravu pryznačany razhladać sudździa Mikałaj Dola. Jon viadomy tym, što ŭžo adpraviŭ za kraty na piać hadoŭ žurnalistku Irynu Słaŭnikavu, piša «Viasna».
Łarysu zatrymali ŭviečary 6 śniežnia 2022 hoda paśla pieratrusu ŭ jaje domie. Jaje niepaŭnaletniaha syna źmiaścili ŭ prytułak. Były muž palitźniavolenaj, jaki apošnija hady žyŭ u Rasii, sabraŭ nieabchodnyja dakumienty i 23 śniežnia zabraŭ Śviatasłava. Inšym svajakam chłopčyka nie addavali.
Napačatku na Łarysu zaviali kryminalnuju spravu pavodle art. 369-1 KK (dyskredytacyja Respubliki Biełaruś) i źmiaścili ŭ homielski SIZA №3. Bolš jak miesiac tamu pamierła maci žančyny. Žurnalistku navat nie adpuścili ź SIZA na pachavańnie.
Pavodle materyjałaŭ śledstva, Łarysa Ščyrakova «sa žniŭnia 2020 hoda pa śniežań 2022 hoda, vykarystoŭvajučy napružanuju hramadskuju situacyju i imknučysia destabilizavać abstanoŭku ŭ krainie, praz roznyja miesiendžary i ŭlikovyja zapisy ŭ sacsietkach pieradała dla raźmiaščeńnia i raźmiaściła ŭ internecie, u tym liku na destruktyŭnych resursach, infarmacyjnyja materyjały z zahadzia łžyvymi źviestkami, jakija dyskredytavali Respubliku Biełaruś».
Jana ž, pa mierkavańni prakuratury, «ažyćciaŭlała zbor, stvareńnie, apracoŭku, zachoŭvańnie i pieradaču aŭdyja-, videa-, fota— i tekstavaj infarmacyi dla dalejšaha vykarystańnia ŭ metach zabieśpiačeńnia ekstremisckaj dziejnaści infarmacyjnaha resursu «Viasna» i ekstremisckaha farmavańnia «Biełsat»».
Za svaju žurnalisckuju dziejnaść Łarysu Ščyrakovu bolej za 40 razoŭ pryciahvali da administracyjnaj adkaznaści ŭ vyhladzie štrafaŭ i aryštaŭ. Urešcie jana vymušanaja była zajavić ab tym, što adychodzić ad žurnalisckaj dziejnaści i budzie zajmacca etnafotasiesijami i psichałohijaj.
Padtrymać žurnalistku: SIZA-3, 246003, Homiel, Knižnaja, 1A, Łarysa Fiodaraŭna Ščyrakova.
Čytajcie taksama:
Paŭłu Mažejku i Julii Jurhilevič prysudzili pa 6 hadoŭ kałonii
Hety małady biełarus stajaŭ la vytokaŭ ChatGPT. Voś što jon zrabiŭ5
Kamientary