Vahnieraŭcy ŭzvodziać fartyfikacyi na palihonie «Repišča» pad Asipovičami. Spadarožnikavy zdymak
Svaboda atrymała ekskluziŭny spadarožnikavy zdymak palihona «Repišča» pad Asipovičami ad 31 lipienia. Jon mieścicca za 15 kiłamietraŭ ad łahiera najmitaŭ «Vahnier» u vioscy Cel. Na zdymku servisu Planet Labs vidać, što na terytoryi palihona iduć aktyŭnyja budaŭničyja pracy.
Možna zaŭvažyć uźviadzieńnie šmatlikich fartyfikacyjaŭ, mahčyma, ziamlanak. Kala ich vidać abjekty, padobnyja da lehkavych aŭtamabilaŭ i śvietła-šerych mikraaŭtobusaŭ UAZ (tak zvanych «buchanak»), pracujuć buldoziery.
29 lipienia Ministerstva abarony Biełarusi zajaviła pra sumiesnyja vučeńni na hetym palihonie 51-j artyleryjskaj bryhady razam z «instruktarami PVK «Vahnier». Paviedamlali pra vykanańnie «ahniavych zadačaŭ z vykarystańniem kvadrakoptaraŭ».
Nie tak daŭno ŭ adnym z telehram-kanałaŭ, źviazanym z najmitami «Vahniera», źjaviłasia videa, na jakim vidać budaŭnictva lasnoha ŭmacavanaha łahiera. Ziamlanki tam abstalavanyja nievialikimi piečkami, tamu łahier moža być prydatny dla žyćcia ŭ chałodnuju paru hoda. Vyznačyć miesca zdymak dakładniej nie ŭdałosia.
Na asobnych stajankach jość budaŭničaja technika, a taksama płatformy dla jaje pieravozki. Hetyja płatformy całkam supadajuć kolerami z tymi, što byli na videa telehram-kanała «Biełaruś hołovnoho mozha», jakoje raniej vieryfikavała Svaboda. Jano źniataje na babrujskaj abjaznoj trasie, kali kałona pierasiakała raku Biarezinu. Mašyny tady ruchalisia da vioski Cel, ale całkam vierahodna, što mahli da jaje nie dajechać, a zbočyć na darohu da palihona «Repišča».
Ciapier čytajuć
«Ad biazvychadnaści źjeździŭ u Biełaruś, dzie jamu zrabili apieracyju». Pabracim raskazaŭ, što viadoma pra aryštavanaha kalinoŭca Andreja Siarhiejeva1313
Kamientary