Rahačoŭskaja milicyja pryznała fota prezidenta Polščy Andžeja Dudy «prapahandaj ekstremisckaj dziejnaści»

Aktyvist z Rahačova Dzianis Daškievič užo hod žyvie ŭ Polščy, ale miascovaja milicyja pa-raniejšamu składaje na jaho pratakoły. Hetym razam «ekstremizm» znajšli ŭ artykułach, jakija aktyvist raźmiaščaŭ na sajcie «Rohačiov. Onłajn», piša «Radyjo Svaboda».

U składzienym 31 lipienia ad imia ŭčastkovaha Vitala Simakova pratakole havorycca, što aktyvist i redaktar sajta «Rohačiov. Onłajn», budučy ŭ nieŭstanoŭlenym miescy, z 11.06.2021 pa 17.07.2023 «raźmiaściŭ infarmacyjnuju pradukcyju, jakaja prapahanduje ekstremisckuju dziejnaść». Pieraličany publikacyi na sajcie, siarod jakich jość pieradruk materyjału Reuters «Prezident Andžej Duda pravioŭ kansultacyi z premjer-ministram i kiraŭnikom Ministerstva abarony». Dla ilustracyi hetaj publikacyi Daškievič vykarystaŭ zdymak Andžeja Dudy na fonie bieł-čyrvona-biełaha ściaha.

Jak raskazaŭ «Svabodzie» sam Daškievič, jon užo hod žyvie ŭ Polščy. Pavodle surazmoŭcy, heta viedajuć u rahačoŭskim rajvykankamie, milicyi i rajonnaj haziecie, jakaja raźmiaściła niekalki artykułaŭ z abrazami ŭ adras Daškieviča.

«Ale milicyja ŭsio chodzić na adras, dzie ja žyŭ u Rahačovie. Pierad hetym pratakołam praviali «ahlad žytła», šukali techniku. Ničoha nie znajšli. Dapytvali svajakoŭ: dzie mienavita ja žyvu, chto jašče pracuje na sajt «Rohačiov. Onłajn». Chadzili nie tolki da maich svajakoŭ i siabroŭ, ale i da pradprymalnikaŭ, jakija da 2020 hoda davali rekłamu na našym sajcie», — dadaŭ aktyvist.

Jon kaža, što nie razumieje, jak prezident Polščy moža «prapahandavać ekstremisckuju dziejnaść». Pavodle infarmacyi Daškieviča, cisnuć na jaho «z padačy miascovaha ideołaha Natalli Prus».

«Jana napisała skarhu ŭ prakuraturu, maŭlaŭ, na sajcie «Rohačiov. Onłajn» jość vyjavy bieł-čyrvona-biełaha ściaha. Prakuratura ŭhledzieła ŭ hetym «ekstremizm», navat u prezidencie Polščy. I ŭžo milicyja na zahad prakuratury skłała hety pratakoł. Što tyčycca bieł-čyrvona-biełaha ściaha, to na sajcie rajonnaj haziety «Svabodnaje słova» možna znajści dziasiatak artykułaŭ, dzie jość hety ściah. Ci pryciahnuć rajonku da adkaznaści za «ekstremizm»? — razvažaje Daškievič.

Aktyvist z 2017 pa 2020 hod pracavaŭ dyrektaram Centra kultury ŭ vioscy Pobałava. Zvolnili Daškieviča ŭvosień 2020-ha. U rajonnaj haziecie «Svabodnaje słova» pieryjadyčna źjaŭlajucca artykuły sa źniavažlivymi charaktarystykami ŭ jahony adras.

• 1
• 0
• 22
• 4
• 1
• 1
• 9
• 0