Vatykan paćvierdziŭ zabaronu dla katalikoŭ stanavicca masonami

Vatykanskaja dykasteryja daktryny viery (DDV, najstarejšaja z šasnaccaci Dykasteryj Rymskaj kuryi, u zadaču jakoj uvachodzić nazirańnie za čyścinioj vieravučeńnia ŭ Katalickim kaściole) apublikavała dakumient, jaki paćviardžaje, što katalikam zabaroniena być masonami, piša Bi-bi-si.

Jak havorycca ŭ novym dakumiencie za podpisam Papy Franciška i kardynała Viktara Manuela Fiernandesa, jaki ŭznačalvaje DDV, katalickaja daktryna i masonstva niesumiaščalnyja.

Hety dakumient staŭ adkazam na zapyt adnaho ź filipinskich biskupaŭ, jaki vykazaŭ zaniepakojenaść z nahody rostu katalikoŭ u jaho dyjacezii, što stanoviacca masonami, i paprasiŭ parady, jak jamu jak pastyru reahavać na heta.

U adkazie Dykasteryi ad 13 listapada ŭtrymlivajecca zaklik vypracavać pry ŭdziele ŭsich siabroŭ Kanfierencyi katalickich biskupaŭ Filipin skaardynavanuju stratehiju pa daniasieńni «va ŭsich parafijach pryčyn nieprymirymaści pamiž katalickaj vieraj i masonstvam».

Masony — najbujniejšaje ŭ śviecie tajemnaje tavarystva. Masonstva prapahanduje idei i rytuały, niesumiaščalnyja z katalickaj vieraj, u tym liku pastułat ab tym, što čałaviek niezaležna ad jaho vieravyznańnia moža być adnolkava daspadoby Bohu.

U dakumiencie Vatykana paćviardžajecca, što tyja, chto farmalna i śviadoma ŭstupiŭ u masonskija łožy i pryniaŭ masonskija pryncypy, padpadajuć pad pałažeńni «Dekłaracyi ab masonskich asacyjacyjach» Katalickaha kaścioła ad 1983 hoda.

Hetaja dekłaracyja, padpisanaja kardynałam Jozefam Ratcynhieram, kali jon uznačalvaŭ Kanhrehacyju daktryny viery (jana ž Śviataja inkvizicyja), zajaŭlaje, što kataliki, jakija ŭstupajuć u masonskija asacyjacyi, «znachodziacca ŭ stanie ciažkaha hrachu i nie mohuć prymać śviatuju kamuniju».

Novy dakumient DDV padrabiaźniej tłumačyć hetuju dekłaracyju, pakazvajučy na toje, što vyšejpieraličanyja miery taksama prymianialnyja da lubych śviataroŭ, jakija ŭstupili ŭ masonstva.

Dykasteryja prapanavała filipinskim biskupam razhledzieć mahčymaść publičnaj zajavy z nahody vučeńnia katalickaj carkvy ab masonstvie.

«Pytańnie masonstva na Filipinach vielmi važnaje, pakolki da jaho adnosiacca nie tolki tyja, chto farmalna znachodzicca ŭ masonskich łožach, ale, u bolš šyrokim sensie, vialikaja kolkaść spačuvajučych i adnadumcaŭ, asabista pierakananych u tym, što nie isnuje supiarečnaści pamiž prynaležnaściu da katalickaj carkvy i da masonskich łožaŭ, — havorycca ŭ dakumiencie DDV. — Ale na ŭzroŭni daktryny nieabchodna pamiatać, što aktyŭnaje siabroŭstva ŭ masonstvie viernikaŭ zabaronienaje praź niesumiaščalnaść pamiž Katalickaj daktrynaj i masonstvam».

Zabarona na masonstva ŭzychodzić jašče da papy Klimienta XII, jaki aficyjna asudziŭ masonstva ŭ Papskaj bule ŭ 1738 hodzie.

• 3
• 0
• 0
• 2
• 0
• 0
• 0
• 0