Miełanija Tramp zajaviła, što damahłasia humanitarnaha pieramirja ŭ Aleškach

Pavodle acenak ukrainskaha ŭrada, u błakadzie ŭ Aleškach apynulisia ad dźviuch da šaści tysiač mirnych žycharoŭ. Horad užo šmat miesiacaŭ adrezany ad pastavak praduktaŭ charčavańnia i lekaŭ. Ludzi haładajuć: raniej žychary raskazvali, što vymušanyja, varyć sup z pustaziella. Vybracca z horada taksama vielmi niebiaśpiečna praz zaminavanyja darohi.

Miełanija Tramp nazvała situacyju ŭ Aleškach krytyčnaj i zajaviła, što horad znachodzicca na miažy katastrofy. Bolšaść tych, chto zastaŭsia tam, — pažyłyja ludzi, jakim terminova patrebnyja miedycynskaja dapamoha, leki, ježa i čystaja vada.

Horad apynuŭsia ŭ pastcy praz svajo hieahrafičnaje stanovišča i bajavyja dziejańni. Na poŭnačy i zachadzie jaho adździalaje raka Dniapro, a masty razburanyja. Darohi na poŭdni i ŭschodzie niebiaśpiečnyja abo nieprachodnyja. Pry hetym suchaputnyja šlachi da Alešak ciapier isnujuć tolki z boku terytoryi, jakuju kantralujuć rasijskija vojski. Z boku Ukrainy ŭsie masty padarvanyja.

Pavodle słoŭ Miełanii Tramp, pra stanovišča ŭ horadzie jana daviedałasia padčas pryvatnaj razmovy na Hienieralnaj Asamblei AAN. Jana śćviardžaje, što vystupiła pasiarednicaj u pieramovach z kiraŭnictvam Rasii i Ukrainy, inicyjavała ich i ŭzhadniła techničnyja pracedury i terminy spynieńnia ahniu.

Płan praduhledžvaje časovaje spynieńnie bajavych dziejańniaŭ, dastaŭku humanitarnaj dapamohi i arhanizacyju biaśpiečnaha kalidora dla evakuacyi. Pa słovach pieršaj łedzi ZŠA, žycharam, jakija zachočuć pakinuć horad, daduć transpart i inšuju nieabchodnuju padtrymku. Jana čakaje, što častka ludziej vyrašyć evakujavacca ŭ Rasiju, a častka — va Ukrainu.

Miełanija Tramp taksama paviedamiła, što žycharoŭ Alešak buduć naviedvać cyvilnyja pradstaŭniki abiedźviuch krain, jakija nie źviazanyja z vajskovymi strukturami. Niezaležnaja amierykanskaja miedyjaarhanizacyja pavinna supravadžać rasijskija i ŭkrainskija hrupy i dakumientavać ich pracu.

Pakul, adnak, zastajecca niezrazumiełym, ź jakoha boku buduć dastaŭlać dapamohu i arhanizoŭvać humanitarny kalidor. Vierahodna, heta budzie terytoryja, kantralavanaja Rasijaj. U zajavie Miełanija Tramp taksama nie patłumačyła, jak płanujuć vyrašać prablemu zaminavanych terytoryj. Raniej miascovyja žychary raskazvali, što sproby vyjechać z horada abo dastavić tudy pradukty źviazanyja z ryzykaj zahinuć na zaminavanych darohach.

Raniej dapamahčy žycharam Alešak zaklikali Papa Leŭ XIV, ukrainski ŭpaŭnavažany pa pravach čałavieka Dźmitryj Łubiniec i vice-prezidentka Jeŭraparłamienta, jakaja navat abviaściła haładoŭku na znak pratestu suprać situacyi.

Paśla razbureńnia Kachoŭskaj hidraelektrastancyi ŭ červieni 2023 hoda kala 90% terytoryi Alešak było zatoplena. Horad praciahvaje rehularna abstrelvacca. Ci dazvolić abvieščanaje pieramirje sapraŭdy dastavić ludziam ježu i leki i biaśpiečna vyvieźci tych, chto hetaha choča, pakul nieviadoma.

• 0
• 0
• 0
• 1
• 0
• 1
• 0
• 0