SK nazvaŭ samyja hučnyja karupcyjnyja spravy minułaha hoda i samy vialiki pamier chabaru
Baranavicki avijazavod, transpartnaja inśpiekcyja, Naftan, MTZ — ab hučnych karupcyjnych spravach u intervju BIEŁTA raskazaŭ namieśnik staršyni Śledčaha kamiteta Biełarusi Anatol Vasiljeŭ.
U 2023 hodzie, havoryć Vasiljeŭ, śledčyja hałoŭnaha ŭpraŭleńnia pracavali pa spravach, zaviedzienych pa faktach chabarnictva, złoŭžyvańnia i pieravyšeńnia paŭnamoctvaŭ słužbovymi asobami takich pradpryjemstvaŭ, jak «Naftan», «Hazprom transhaz Biełaruś», MTZ, BiełAZ, «MAPID», «Atłant» i inšych.
Da kryminalnaj adkaznaści pryciahnuty pradstaŭniki miascovych vykanaŭčych orhanaŭ, a taksama pravaachoŭniki, kaža Vasiljeŭ.
Jon raspavioŭ, što niadaŭna skončana papiaredniaje rasśledavańnie i nakiravana ŭ sud kryminalnaja sprava ŭ dačynieńni da vaśmi słužbovych asob i adnaho rabotnika baranavickaha AAT «558 Avijacyjny ramontny zavod» u atrymańni chabaru i niezakonnaha ŭznaharodžańnia ŭ pieryjad sa žniŭnia 2016 hoda pa luty 2022 hoda na ahulnuju sumu bolšuju za 670 tysiač rubloŭ. Chabar byŭ ad pradstaŭnikoŭ zamiežnych kamiercyjnych kampanij.
U chodzie śledstva byŭ nakładzieny aryšt na majomaść abvinavačanych ahulnym koštam zvyš 2,7 młn rubloŭ.
Taksama ciapier śledčyja raźbirajucca pa kryminalnaj spravie, uzbudžanaj u dačynieńni da słužbovych asob adnaho z najbujniejšych pradpryjemstvaŭ pa vytvorčaści i pierapracoŭcy sielskahaspadarčaj pradukcyi pa fakcie atrymańnia niezakonnaha hrašovaha ŭznaharodžańnia ŭ pamiery 300 000 jeŭra za łabijavańnie intaresaŭ kamiercyjnaj arhanizacyi pry praviadzieńni zakupak abstalavańnia. Vasiljeŭ pradpryjemstva nie nazvaŭ.
Taksama z rezanansnych i vialikich spraŭ, skončanych uvosień, jon vyłučyŭ spravu ab chabary i złoŭžyvańni słužbovymi paŭnamoctvami ŭ adnosinach da słužbovych asob adnaho z najbujniejšych bankaŭ. Pavodle SK, da kryminalnaj adkaznaści pryciahnuty troje asob. «Supraćpraŭnaja dziejnaść imi raspačata ŭ 2018 hodzie i palahała ŭ vykarystańni hrašovych srodkaŭ banka dla praviadzieńnia asabistych śpiekulatyŭnych apieracyj. Fihurantami atrymany niezakonny dachod na sumu nie mienšuju za Br1,5 młn, ź jakich dla paśpiachovaha funkcyjanavańnia raspracavanaj złačynnaj schiemy ŭ jakaści chabaraŭ byłomu staršyni Praŭleńnia banka pieradadziena bolš za Br600 tysiač», — kaža Vasiljeŭ.
Na pytańnie pra najvialikšy chabar minułaha hoda pradstaŭnik SK adkazaŭ, što chabar pa adnoj sa spravaŭ, skončanaj u kancy 2022 hoda śledčymi hałoŭnaha ŭpraŭleńnia, skłaŭ $1 młn.
A minimalnaja suma chabaru była 15 rubloŭ. Hety fakt fihuruje ŭ spravie pra chabarnictva ŭ dačynieńni da 11 słužbovych asob Transpartnaj inśpiekcyi Ministerstva transpartu i kamunikacyj Respubliki Biełaruś. Abvinavačanyja, kaža Vasiljeŭ, byli hatovy prymać lubyja sumy, jakija byli pry sabie ŭ spynienych imi kiroŭcaŭ.
Kamientary