Čamu ŭ Rasii niama svajoj Cichanoŭskaj?

Śviatłana Cichanoŭskaja ličyć, što źjaŭleńnie ŭ apazicyi svajho lidara śviedčyć pra stałaść nacyi:

«Čamu ŭ Biełarusi nie było Śviatłany Cichanoŭskaj u 2010 hodzie, naprykład, ci ŭ 2005, 2006-m? Ja dumaju, što heta stałaść nacyi. Kali ludzi ŭžo na miažy taho, što pavinny być pieramieny ŭ krainie, i abjadnoŭvajucca vakoł čahości. U našym vypadku, «Cichanoŭskaja» heta vielmi ŭmoŭnaje paniaćcie. Ludzi abjadnalisia vakoł idei, mety».

Akramia hetaha, jak ličyć Cichanoŭskaja, u biełarusaŭ i rasijan rozny palityčny kantekst. «U nas byli vybary, na jakich my pieramahli. U rasijskaj apazicyi niama takoha čałavieka ci abjadnaŭčaj mety, vakoł jakoj možna budavać supolnaść ci demakratyčnyja instytuty. Tam niekalki lidaraŭ, i ŭ kožnaha svaja kamanda. Mahčyma, jany taksama damaŭlajucca pra niejkuju supolnuju pracu».

Śviatłana vykazała dapuščeńnie, što, mahčyma, paśla novych prezidenckich vybaraŭ u Rasii zjavicca svaja «Cichanoŭskaja».

Pra kantakty z rasijskaj apazicyjaj

Cichanoŭskaja raspaviała pra svaje adnosiny z rasijskaj apazicyjaj. Pa jaje słovach, jana niekalki razoŭ sustrakałasia z Uładzimiram Kara-Murzoj, pakul jaho nie pasadzili. Akramia hetaha jana kamunikuje z Žanaj Niamcovaj — udavoju rasijskaha apazicyjnaha palityka i hramadskaha dziejača Barysa Niamcova, zabitaha ŭ 2015 hodzie. Sustrečy z pradstaŭnikami rasijskaj apazicyi adbyvajucca pad čas supolnych mierapryjemstvaŭ.

«Ale ja adčuvaju, kali Biełaruś i Rasija abmiarkoŭvajucca razam na adnoj paneli, to Rasija zaŭždy vyciskaje Biełaruś. A mnie vielmi važna trymać Biełaruś na paradku dnia, kab pra Biełaruś kazali. I tamu, kali jość niejki ivent, dzie abmiarkoŭvajuć Rasiju i Biełaruś, ja prašu, kab panel pa Biełarusi vynosili asobna. Nie kładzicie nas u adzin koš, u nas roznyja kanteksty».

«My, biełarusy, nie nazyvajem siabie apazicyjaj, bo razumiejem, što nas bolšaść. A tam heta niejkaja prynaležnaść da partyjaŭ, da pohladaŭ. Naš pohlad adzin — demakratyčnaja Biełaruś, vyzvaleńnie źniavolenych i novyja vybary».

Cichanoŭskaja zaŭvažyła, što biełaruskija demakratyčnyja siły mohuć vučycca asobnamu ŭ rasijskaj apazicyi. Naprykład, marafon salidarnaści z palitviaźniami — kalka z rasijskaj inicyjatyvy. «Tak, u nas atrymałasia troški lepš. Ale čamuści my da takoha nie dadumalisia. I heta dobry prykład, jak možna ŭziać inicyjatyvu i pierakłaści jaje ŭ biełaruskija realii».

Hladzicie całkam:

• 40
• 0
• 1
• 6
• 0
• 0
• 5
• 0