Dzie znachodzicca centr Jeŭropy? Adkaz moža być zusim niečakanym
Dzie znachodzicca hieahrafičny centr Jeŭropy, i jak hety samy centr ličyć? Niekalki krain pretendujuć na toje, kab nazyvajecca centram Jeŭropy. U biełarusaŭ, ukraincaŭ, palakaŭ, litoŭcaŭ, mahčyma, u kahości jašče isnujuć navat hieahrafičnyja znaki, i ŭ kožnaha svaja, samaja pravilnaja mietadałohija (jak hetaja mietadałohija spałučajecca z usprymańniem Rasii jak nie častki Jeŭropy, pytać nie budziem). Ale dla mianie biassprečnym centram Jeŭropy źjaŭlajecca aŭstryjski Insbruk, piša ŭ fejsbuku Maksim Machańkoŭ.
Hladzicie sami. Horad znachodzicca ŭ toj vuzkaj zachodniaj častcy Aŭstryi, jakaja «zacisnutaja» pamiž vialikimi pa płoščy i nasielnictvie Niamieččynaj i Italijaj (z centra Insbruka da Italii i Niamieččyny možna dajechać chvilin za 20). Za niekalki hadzin na mašynie možna dabracca da Lichtenštejna, Šviejcaryi i Francyi, a taksama Słavienii i Čechii. Nu čym vam nie centr Jeŭropy?
Čamu centr Jeŭropy nie ŭ Biełarusi i nie va Ukrainie? Nie, nie tamu što Rasija nie Jeŭropa (biez usialakich sumnieńniaŭ, Rasija heta jeŭrapiejskaja kraina, chacia i pieryfieryjnaja dy adstałaja).
Reč u tym, što kali havorka idzie pra Jeŭropu, pra kulturna-histaryčna-cyvilizacyjny rehijon, prastoru nielha vymiarać vyklučna kiłamietražom.
Prastora pavinna mieć niekalki vymiareńniaŭ, i ŭličvać ščylnaść nasielnictva, moŭna-kulturnuju i pryrodnuju raznastajnaść, uzrovień ekanamičnaha raźvićcia, kulturny ŭpłyŭ, jakaść transpartnaj infrastruktury i mnohaje-mnohaje inšaje.
Choć Rasija i źjaŭlajecca jeŭrapiejskaj krainaj (jak hieahrafična, bo absalutnaja bolšaść nasielnictva i ekanamičnaj aktyŭnaści znachodziacca ŭ Jeŭropie, tak i ŭ histaryčna-palityčnym płanie), ale Rasiju nu nijak nielha ličyć za pałovu Jeŭropy.
Na hetych vialikich prastorach vielmi nizkaja ščylnaść nasielnictva (na vielizarnaj Jeŭrapiejskaj častcy Rasii ludziej žyvie prykładna stolki ž, jak u Niamieččynie).
Hetaja vialikaja terytoryja adnosna hamahiennaja ŭ moŭna-kulturnym i infarmacyjnym płanie, a vakoł umoŭnaha Insbruka nie toje što dyjalekty, a navat movy źmianiajucca adna za adnoj u pracesie pierasoŭvańnia kožnyja 20 chvilin.
U kulturnym, navukovym i ekanamičnym płanie Rasija taksama daloka nie pałova Jeŭropy, tym bolš, što jana supraćpastaŭlaje siabie Jeŭropie na ŭsich uzroŭniach.
Kali ž brać usie hetyja pieraličanyja mnoj kulturna-hieahrafična-palityčna-ekanamičnyja vymiareńni prastory, to centr Jeŭropy heta, biezumoŭna, Insbruk.
Čytajcie taksama:
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary