Kłop zaprasiŭ śmiarotna chvoraha Eryksana na adzin dzień uznačalić «Livierpul»

Hałoŭny trenier «Livierpula» Jurhien Kłop pryvitaje Śviena-Jorana Eryksana ŭ kłubie, kab švied moh realizavać svaju maru stać kiraŭnikom kłuba na adzin dzień paśla dyjahnostyki nievylečnaha raku, piša Guardian.

Raniej pastupali zvanki z prośbaj dazvolić Eryksanu być hałoŭnym trenieram na matčy lehiend «Livierpula» suprać «Ajaksa» ŭ sakaviku. 75-hadovy trenier, zaŭziatar brytanskaha kłuba, raniej kazaŭ, što zaŭsiody chacieŭ kiravać kłubam, ale takoj mahčymaści tak i nie pradstaviłasia za ŭsiu jaho šyrokuju karjeru, padčas jakoj jon uznačalvaŭ Anhliju, «Łacya» i «Mančester Sici», a taksama mnohija inšyja.

«Ja ŭpieršyniu pačuŭ pra jaho zachapleńnie ci luboŭ da «Livierpula» i što jon byŭ zaŭziataram usio svajo žyćcio», — skazaŭ Kłop.

«My vielmi rady, što jon pryjšoŭ siudy, i jon moža siadzieć na maim miescy ŭ maim ofisie i vykonvać maju pracu na praciahu dnia, kali zachoča — heta nie prablema. Zaprasić jaho siudy i pakazać jamu ŭsio, i jak hety vydatny kłub raźvivaŭsia na praciahu mnohich hadoŭ, ja dumaju, my jamu raskažam. Ja ŭpeŭnieny, jon moža pryjechać i pravieści tut niekalki vydatnych hadzin», — skazaŭ niamiecki śpiecyjalist.

***

Na minułym tydni Śvien-Joran Eryksan pryznaŭsia, što kala hoda tamu jamu dyjahnastavali nieapierabielny rak mozha, i ciapier daktary prahnazujuć dla jaho jašče ad siły hod žyćcia. U suviazi z hetym jon zajaviŭ, što pastarajecca zrabić tak, kab hety hod staŭ najlepšym z usich pražytych.

«Ja budu supraciŭlacca stolki, kolki zmahu», — skazaŭ Eryksan.

Jon pačaŭ karjeru futbolnaha treniera ŭ 1976 hodzie ŭ siabie na radzimie, uznačaliŭšy spačatku šviedski kłub «Dehierfors», a zatym «Hioteborh».

Z 1982 hoda jon pracavaŭ z roznymi zamiežnymi kłubami, uklučajučy takich hrandaŭ, jak partuhalskaja «Bienfika», italjanskaja «Roma», anhlijskija «Mančester Sici» i «Lester Sici» i mnohija inšyja. Šviedski śpiecyjalist staŭ pieršym zamiežnym trenieram zbornaj Anhlii. Jon zaniaŭ svaju pasadu ŭ 2001 hodzie i ŭžo ŭ 2002-m vyvieŭ svaju kamandu ŭ čverćfinał čempijanatu śvietu.

Pad jaho kiraŭnictvam anhličanie taksama vychodzili ŭ čverćfinały čempijanatu Jeŭropy-2004 i ČS-2006.

Ahułam jon kiravaŭ roznymi futbolnymi kłubami ciaham 47 hadoŭ.

Ciapier Śvien-Joran žyvie ŭ chośpisie, ale, pavodle jaho, viadzie absalutna narmalny ład žyćcia: naviedvaje svaich blizkich, a jany — jaho. Jon šmat kantaktuje ź inšymi pacyjentami i zajmajecca sportam, choć značna mienš, čym navat hod tamu.

«Kali tabie abviaščajuć taki dyjahnaz, raptam pačynaješ šanavać kožny dzień i ščaślivy ŭžo ad taho, što pračnuŭsia ranicaj i adčuvaješ siabie dobra», — skazaŭ Eryksan.

«Mnie skazali, što pryznačać lačeńnie, kab maksimalna padoŭžyć majo žyćcio. Ale dyjahnaz kančatkovy, i apieracyja, na žal, niemahčymaja», — kaža Eryksan.

• 9
• 0
• 1
• 2
• 1
• 17
• 1
• 0