«Moža, u niejkaj stupieni budzie nie tanna». Dla prapahandystaŭ Rasii i Biełarusi stvorać ahulny miedyjachołdynh
Padrychtavany prajekt pastanovy Vyšejšaha dziaržsavieta ab stvareńni adzinaj miedyjakampanii Sajuznaj dziaržavy. Pra heta raskazaŭ žurnalistam dziaržaŭny sakratar Sajuznaj dziaržavy Dźmitryj Mieziencaŭ, pieradaje BIEŁTA.
«My padrychtavali prajekt pastanovy VDS. Praduhledžvajecca stvareńnie adzinaj miedyjakampanii Sajuznaj dziaržavy, jakaja voźmie na siabie kaardynacyju i zabiaśpiečyć vypusk na staronkach drukavanych vydańniaŭ, telekanała i internet-resursnaha napramku (jamu šmat budzie ŭdzielena ŭvahi) taho kantentu, infarmacyi, jakaja budzie źviazana nie tolki z uzajemadziejańniem u farmatach Sajuznaj dziaržavy.
Pra našu historyju, pra našy płany, pra toje, jak my reahujem na toj nacisk, u tym liku mientalny. My chočam, kab heta byŭ vielmi cikavy, mahutny nabor zadač, jaki budzie pad siłu abnoŭlenamu kalektyvu», — skazaŭ Mieziencaŭ.
Tema stvareńnia sajuznaha miedyjachołdynha ŭžo abmiarkoŭvajecca na praciahu niekatoraha času, u tym liku na vyšejšym uzroŭni. U krasaviku 2023 hoda na pasiadžeńni Vyšejšaha dziaržsavieta ŭ Kramli Alaksandr Łukašenka skazaŭ: «My z Uładzimiram Uładzimiravičam [Pucinym] damovilisia jašče ŭ Piciery, što nam treba mieć surjozny sajuzny miedyjachołdynh. Treba stvarać hety miedyjachołdynh. Tak, heta, moža, u niejkaj stupieni budzie nie tanna, ale kali my chočam, kab paradak dnia hučaŭ (jość pra što havaryć), treba stvarać hety miedyjachołdynh, nie pryklejvajučy jaho da niejkich inšych arhanizacyj. Pra heta my damovilisia. Ale heta nie adrazu robicca. Tym bolš što patrebny peŭnyja srodki».
22 studzienia na sustrečy ŭ Minsku Alaksandr Łukašenka abmierkavaŭ ź Dźmitryjem Mieziencavym padrychtoŭku da čarhovaha pasiadžeńnia VDS. Jano pavinna prajści ŭžo ŭ bližejšy čas.
Na zaćviardžeńnie ŭdzielnikaŭ mierapryjemstva płanujecca vynieści ŭ tym liku prajekt Asnoŭnych napramkaŭ realizacyi pałažeńniaŭ Dahavora ab stvareńni Sajuznaj dziaržavy na 2024-2026 hady.
Papiaredni taki dakumient achoplivaŭ 2021-2023 hady i realizoŭvaŭsia razam z 28 pryniatymi sajuznymi prahramami.
Kardynalnaje adroźnieńnie Asnoŭnych napramkaŭ realizacyi pałažeńniaŭ Dahavora ab stvareńni Sajuznaj dziaržavy na 2024-2026 hady ad anałahičnaha dakumienta na 2021-2023 hady ŭ tym, što
ŭ prajekt na novy trochhadovy pieryjad uklučany vialiki błok humanitarnych, kulturnych i sacyjalnych pytańniaŭ, u toj čas jak papiaredni dakumient razam z 28 sajuznymi prahramami kancentravaŭsia pieravažna na ekanamičnym składniku supracoŭnictva, pramysłovaści, bankaŭskaj śfiery i inšych takich napramkach.
To-bok, prapahandzie ŭ tak zvanaj Sajuznaj dziaržavie budzie nadavacca bolš uvahi.
Kamientary