Tom Chołander vypadkova «atrymaŭ» hrošy Toma Chołanda. I pierastaŭ być zadavoleny saboj
Zorka filma «Bieły łotas» Tom Chołander u efiry pieradačy Late Night pryznaŭ, što vonkava jaho naŭrad ci možna pryniać za brytanskaha akciora Toma Chołanda, jaki prasłaviŭsia dziakujučy roli čałavieka-pavuka ŭ filmach Marvel. Ale ŭsio ž taki jany ciozki i ich proźviščy padobnyja, što nie raz pryvodziła da błytaniny. Vierahodna, z hetaj pryčyny 56-hadovy Chołander adnojčy «atrymaŭ» premiju svajho 27-hadovaha kalehi. Padrabiaznaści pryvodzić The Guardian.
Chołander uspomniŭ, što byŭ na śpiektakli siabra, za jaki toj atrymlivaŭ pa 300 jeŭra na tydzień.
«Ja tady taki samazadavoleny byŭ — tolki što źniaŭsia ŭ šoŭ Bi-bi-si za 30 tys. ci kala taho. Hetych hrošaj mnie b chapiła na hod. Ja ličyŭ siabie bahatym», — kaža akcior.
Paśla śpiektakla jon źbiraŭsia padyści da siabra, vystupić u jakaści jahonaha apiekuna i pachvalić jaho. Ale padčas antraktu Chołander vyrašyŭ pravieryć elektronnuju poštu i ŭbačyŭ tam paviedamleńnie, pryznačanaje dla Chołanda.
List byŭ paznačany jak pieršy tranš kasavych zboraŭ za «Mściŭcaŭ».
«Dziŭnaja suma. Heta byŭ navat nie zarobak, a pieršy bonus za kasavyja zbory. Takich vialikich hrošaj ja ŭ žyćci nie bačyŭ. Suma była siamiznačnaj. Maja samazadavolenaść źnikła», — zajaviŭ Chołander.
Praŭda, nie kožny prajekt Marvel moža pachvalicca hałavakružnaj kasaj. Samyja drennyja zbory z usich prajektaŭ franšyzy ŭ debiutnym prakacie prademanstravaŭ «Kapitan Marveł 2». U ZŠA na starcie hetaja stužka zarabiła 47 młn dalaraŭ. Mahčyma, na zborach adbiłasia toje, što aŭdytoryja stamiłasia ad supierhieroiki. Jašče adna pryčyna — zabastoŭka akcioraŭ, jakaja pieraškodziła vykanaŭcam hałoŭnych rolaŭ udzielničać u prasoŭvańni karciny, adznačaje RBK Life.
Kamientary