ES rychtujecca ŭvieści pošliny na impart zbožža z Rasii i Biełarusi. Nakolki heta zakranie Biełaruś?

Jak piša The Financial Times, Brusiel doŭhi čas supraciŭlaŭsia cisku z boku Polščy i krain Bałtyi, jakija patrabujuć abmiežavać rasijski i biełaruski impart. Kiraŭnictva ES śćviardžała, što taki krok moža parušyć funkcyjanavańnie suśvietnych charčovych rynkaŭ i nanieści škodu krainam, jakija raźvivajucca.

Vydańnie adznačaje, što impart z Rasii ŭ ES zhadanych praduktaŭ — zbožžavych, nasieńnia alejnych kultur i ich vytvornych — dasiahnuŭ rekordnaj adznaki 4 miljony ton u 2023 hodzie, što składaje 1% ad ahulnaha spažyvańnia Jeŭrasajuza.

Kamisar ES pa sielskaj haspadarcy Januš Vajciachoŭski, jaki raniej nazyvaŭ rasijski ekspart zbožža ŭ Polšču «niaznačnym», źmianiŭ svaju pazicyju padčas vizitu na minułym tydni ŭ rodnuju Polšču. «Kali Rasija vykarystoŭvaje charčavańnie ŭ jakaści zbroi, my pavinny reahavać», — cytuje vydańnie słovy jeŭrakamisara.

Raniej premjer-ministr Polščy Donald Tusk zajaviŭ, što Polšča moža pajści ŭśled za Łatvijaj i ŭvieści ŭłasnuju zabaronu na ekspart sielskahaspadarčaj pradukcyi z Rasii i Biełarusi. Adnak Tusk padkreśliŭ, što addaje pieravahu tamu, kab było pryniata ahulnaje rašeńnie ES.

Jak miarkujuć analityki, ES chutčej za ŭsio ŭviadzie handlovyja pošliny, a nie sankcyi, pakolki heta nie zapatrabuje adnahałosnaj uchvały jeŭrapiejskich stalic, jak u vypadku z sankcyjami. Hetaja miera dazvolić pradukcyi prachodzić praź ES pa darozie ŭ Afryku i Aziju.

Pavodle słovaŭ znajomych z płanami ludziej, čakajecca, što ŭ bližejšyja dni Jeŭrapiejskaja kamisija ŭviadzie pošlinu ŭ pamiery 95 jeŭra za tonu na zbožža z Rasii i Biełarusi. Pa słovach surazmoŭcaŭ, heta pryviadzie da rostu koštaŭ jak minimum na 50% i źniščyć popyt. Pošliny ŭ pamiery 50% taksama buduć uviedzieny na nasieńnie alejnych kultur i pradukty ich pierapracoŭki.

Aficyjny pradstaŭnik ES adznačyŭ, što ceny na zbožža znachodziacca na čatyrochhadovych minimumach, a Rasija «vielmi kankurentazdolnaja na rynkach zbožža i akazvaje značny cisk». Pavodle słoŭ subiasiednika, pošlina budzie ŭstanoŭlena na ŭzroŭni, maksimalna dapuščalnym pa praviłach Suśvietnaj handlovaj arhanizacyi. Rasija moža pryniać miery ŭ adkaz, ale jana ŭžo zabaraniła impart bolšaści praduktaŭ charčavańnia ź ES, a mnohija jeŭrapiejskija kampanii, jakija pracujuć u hetym siektary, u apošnija hady syšli z krainy.

Pakazčyki ekspartu biełaruskaj sielhaspradukcyi ŭ ES nie takija vialikija, kab havaryć ab istotnym upłyvie płanujemych pošlin na ekanomiku krainy.

Jak adznačaje «Biełsat», u 2023 hodzie Biełaruś ekspartavała ŭ Polšču zbožža na 201 tysiaču jeŭra (u asnoŭnym hrečku), što na pałovu bolš, čym u 2022 hodzie. U naturalnym vyražeńni ekspart zbožža ŭ 2023-m u paraŭnańni z 2022 pavialičyŭsia ŭ 2,6 raza (s 181,4 da 480,9 ton). Adnak heta našmat mienš za pakazčyk 2021 hoda — tady było 2497,5 ton.

Pa infarmacyi ŭkrainskaj «Ekanamičnaj praŭdy», letaś Polšča zapłaciła Biełarusi za nabytuju sielhaspradukcyju ahułam $55 miljonaŭ. Dla paraŭnańnia, Ukraina atrymała ŭ 24 razy bolš — $1,3 miljarda.

Adnak niemałavažnym zjaŭlajecca toj fakt, što siarod impartu ź Biełarusi byŭ rapsavy šrot (reštki pierapracoŭki rapsu, jakija iduć na korm chatniaj žyviole), impart jakoha z Ukrainy Polšča pad ciskam pratestoŭcaŭ zabaraniła ź vieraśnia 2023 hodu. Bolš za toje, paśla ŭviadzieńnia embarha abjomy pavialičylisia: u kastryčniku-śniežni palaki zakupili ŭ Biełarusi rapsavaha šrotu na $7,7 miljona.

Čytajcie jašče:

Litva pastrožyła kantrol za zbožžam ź Biełarusi i Rasii

Polšča moža ŭvieści embarha na sielskahaspadarčuju pradukcyju ź Biełarusi i Rasii

Čaho chočuć jeŭrapiejskija fiermiery?

Łatvija zabaraniła ŭvoz sielhaspradukcyi ź Biełarusi i Rasii

• 9
• 0
• 2
• 0
• 1
• 3
• 4
• 0