Pra źmieny na telekanale raskazaŭ padčas pres-kanfierencyi kiraŭnik «Biełsata» Alaksiej Dzikavicki.
Asnoŭnaje pryvodzić ahienctva «Pozirk».
«My musim admovicca ad častki prajektaŭ, jakija jašče nie pačali, na ščaście. Taksama niekatoryja prajekty rabić radziej, a ad niekatorych admovicca», — skazaŭ Dzikavicki.
I ŭdakładniŭ:
«Štotydniovyja pieradačy buduć vychodzić radziej, płanujecca skaracić vydatki na kankretnyja prahramy, nie buduć praciahnutyja histaryčny prajekt «Łabirynty», zdymki mastackaha sieryjała «Pracesy».
Dzikavicki taksama dadaŭ, što jany, peŭna, nie zapuściać muzyčnyja prahramy.
Taksama, skazaŭ jon, «Biełsat» admovicca ad testavych vypuskaŭ novych prajektaŭ na jutubie.
Ruskamoŭnyja prahramy «Biełsata» pačnuć vychodzić taksama na mižnarodnym kanale TVP World (jon, jak i «Biełsat», uvachodzić u strukturu Polskaha telebačańnia) u anhłamoŭnym tłumačeńni.
U 2023 hodzie «Biełsat», asnoŭnaj krynicaj finansavańnia jakoha źjaŭlajucca srodki ad MZS Polščy, atrymaŭ ad viedamstva 63 młn złotych (kala 15,8 młn dalaraŭ na siońnia). Na ciapierašni hod hetaja suma skaročana da 40 młn (trochi bolej za 10 młn).
Pavole Dzikavickaha, pačaŭsia pošuk inšych donaraŭ srodkaŭ, akramia MZS Polščy. Situacyja ź finansavańniem «moža pierałamicca ŭ druhoj pałovie hetaha hoda», miarkuje kiraŭnik miedyja.
«Kali ja hladžu na biudžet, jaki ŭžo abrezany, na siońnia nam, kab zachavać samaje kaštoŭnaje, što ŭ nas jość, — kalektyŭ i našuju raznarodnaść — nam nie chapaje kala 10-11 młn złotych», — zajaviŭ jon.
Na siońnia na «Biełsacie» pracuje ahułam kala 300 čałaviek. «Kali b byŭ tolki infarmacyjny kanał, to chapiła b pałovy hetaha piersanału», — udakładniŭ Dzikavicki.
Jon prakamientavaŭ taksama novyja patrabavańni da telekanała z boku MZS Polščy:
«Žadańni takija, što… Jany byli adnym skazam mnie asabista skazanyja, što sietka «Biełsata» pavinna być bolš pryvabnaj, — dadaŭ jon. — Ale heta ahulnyja słovy. Ja nie viedaju, što takoje pryvabnaja. Dla mianie vielmi pryvabnaj była b sietka viaščańnia, dzie b ad ranicy da viečara byŭ chevi-mietał i chard-rok. Dla majho svajaka — rybałka. Dla kahości — Vital Cyhankoŭ kab byŭ ceły dzień, a jašče dla kahości — dakumientalnaje kino. Tamu heta niajasnaje patrabavańnie. Spadziajusia, takaja razmova jašče budzie».
Dyrektarka «Biełsata»: Mianie zvolnili pa dyscyplinarnym artykule
«Što značyć, što mnie chopić kiravać?» Byłaja kiraŭnica «Biełsata» raskazała, čamu jašče nie hatovaja pakinuć kanał
«Musim farmavać pazityŭny vobraz Biełarusi, a nie tolki «dapamažycie, palitviaźni, represii». Dyrektar «Biełsata» Dzikavicki ab pieramienach
Ciapier čytajuć
Vyśvietlili, dzie adbyvaŭsia «dopyt» kalinoŭca Vasila Hračychi15
Kamientary